Ɔnhɔn, Bibulu be se k’i dɛmɛ! Ala sagokɛla minw man kɛnɛ, a b’a janto u la. Bibulu b’a fɔ Ala sagokɛla dɔ koo la ko: “Masaba b’a . . . janto a la bana waati la.” (Zaburuw 41:4). Ni bana dɔ b’i la min be to k’i sɛgɛn, ladili saba nunu be se k’i dɛmɛ k’o muɲu:

1.   Delili kɛ walisa ka fanga sɔrɔ k’o muɲu: “Ala ka hɛrɛ min tɛmɛna mɔgɔw ka faamuyali ma,” o be se ka dɔ bɔ i ka hami na ani k’i dɛmɛ k’o gwɛlɛya muɲu.—Filipikaw 4:6, 7.

2.   Koow filɛ ni ɲɛɛ ɲuman ye: Bibulu b’a fɔ ko: “Nisɔndiya be banabagatɔ kɛnɛya. Dusukasi be mɔgɔ fasa.” (Talenw 17:22). N’i be to ka yɛlɛko koow kɛ, o be se ka dɔ bɔ i ka dusukasi la ani k’i ka kɛnɛyako fisaya.

3.   A ɲini ka kɛ ni jigiya ɲuman ye siniɲasigi koo la: Jigiya barikaman be se k’i dɛmɛ ka ninsɔndiya i ka bana bɛɛ n’a ta (Ɔrɔmukaw 12:12). Bibulu ko wagati dɔ bena se “[mɔgɔ] si ten’a fɔ ko: ‘Ne man kɛnɛ.’” (Ezayi 33:24). Ala bena banaw bɛɛ ban, hali dɔgɔtɔrɔw ma se ka fura sɔrɔ minw na. Misali la, mɔgɔkɔrɔbaw bena segi ka kɛ kanbelew ni sunguruw ye. Bibulu b’a fɔ ko: “A farisogo be segi ka kɛ a cogo kɔrɔ la yen, a be kɛ i ko a wilitɔ kura.”—Zɔbu 33:25.

 I janto: Hali ni Jehova Seerew lanin b’a la ko Ala b’u dɛmɛ u ka bana wagati la, o t’u bali ka dɛmɛ ɲini dɔgɔtɔrɔw fɛ walisa k’u yɛrɛ furakɛ (Mariki 2:17). Jehova Seerew t’a yira mɔgɔ ka ɲi k’a yɛrɛ furakɛ cogo tigitigi min na. U b’a to bɛɛ k’a latigɛ a bena a yɛrɛ furakɛ cogo min na.