Esi Yehowa ɖo ƒomea anyi la, dzilawoe wòtsɔ ɖo wo viwo nu. (Kolosetɔwo 3:20) Mi dzilawo ƒe agbae wònye be miahe mia viwo bene woalɔ̃ Yehowa eye woava zu ame ɖɔʋuwo ne wova tsi. (2 Timoteo 1:5; 3:15) Ele be mianya nu siwo le mia viwo ƒe dzi me. Ke hã, ele vevie be miaɖo kpɔɖeŋu ɖi na wo. Ne mina Yehowa ƒe Nyaa le dzi me na mi la, ke miate ŋu afiae mia viwo nyuie.​—Psalmo 40:9.

NYA SI BIBLIA GBLƆ: ‘Ðe abla le nusese me, nɔ blewu le nuƒoƒo me.’ (Yakobo 1:19) Ele eme be èdi be ye viwo naɖo dze kpli ye faa. Ekema na woakpɔe be èle klalo be yease yewoƒe nyawo. Na wòanɔ bɔbɔe na wo be woaƒo nu faa. (Yakobo 3:18) Ne wokpɔe be àda gbe ɖe yewo gbɔ alo àhe nya ɖe yewo ŋu la, ke womaɖe woƒe dzimenyawo agblɔ na wò o. Gbɔ dzi ɖi na viwòwo eye nɔ kakaɖedzi nam wo edziedzi be yelɔ̃ wo.​—Mateo 3:17; 1 Korintotɔwo 8:1.

NU SI NÀTE ŊU AWƆ:

• Nɔ klalo be yeaɖo to ne viwòwo di be yewoaɖo dze kpli wò

• Nɔ dze ɖom kple viwòwo edziedzi, menye ne wowɔ nu gbegblẽ aɖe hafi o

NYA SI BIBLIA GBLƆ: “Ame si léa to ɖe nya ŋu la, eƒe asi sua nyui dzi.” (Lododowo 16:20) Ɣeaɖewoɣi la, ahiã be nàse nya si tututu gblɔm viwòwo le la gɔme hafi nàte ŋu anya ale si wole sesem le wo ɖokui me. Zi geɖe la, ɖeviwo megblɔa ale si tututu nyaa le o. “Ne ame aɖe mekpɔ se nya, hafi ɖo eŋu o la, bometsitsi kple ŋukpe wònye nɛ.” (Lododowo 18:13) Mègado dziku kabakaba o.—Lododowo 19:11.

NU SI NÀTE ŊU AWƆ:

• Eɖanye nya ka kee viwòa gblɔ o, ɖoe be yematsi nya ɖe enu alo awɔ nu wòagbɔ eme o

• Ðo ŋku ale si nèwɔa nu esime nènɔ ɖevime kple nu siwo nɔa vevie na wò ɣemaɣi la dzi

NYA SI BIBLIA GBLƆ: “Vinye, se fofowò ƒe amehehe, eye mègagblẽ dawò ƒe nufiame ɖi o.” (Lododowo 1:8) Yehowa tsɔ mi vifofowo kple vidadawo ɖo mia viwo nu. Ele be miafia mia viwo be woabu mi ahaɖo to mi. (Efesotɔwo 6:1-3) Ðeviwo tea ŋu dea dzesii ne wo dzilawo ƒe nu mesɔ o. (1 Korintotɔwo 1:10) Eya ta ne miaƒe nu mesɔ le nane me o la, miganɔ nya hem kple mia nɔewo le ɖeviawo gbɔ o, elabena esia ana womagade bubu mia ŋu o.

NU SI MIATE ŊU AWƆ:

• Miɖo dze tso ale si miahe mia viwo ŋu eye mialɔ̃ ɖe nya ɖeka dzi

• Ne miaƒe susu to vovo le ale si miahe mia viwo ŋui la, dze agbagba nàse srɔ̃wòa ƒe susuwo gɔme

NYA SI BIBLIA GBLƆ: “Mla ɖevi ɖe mɔ, si wòato la ŋu.” (Lododowo 22:6) Mia viwo hehe be woazu ame ɖɔʋuwo mava le eɖokui si o. Ehiã be miawɔ ɖoɖo ɖe wo hehe ŋu, eye esia ƒe akpa aɖe lɔ tohehe na wo ɖe eme. (Psalmo 127:4; Lododowo 29:17) Mia viwo hehe yi ŋgɔ wu tohehe na wo ɖeɖe ko, ebia hã be miana woase susu siwo tae miede sewo ɖo la gɔme. (Lododowo 28:7) Tsɔ kpe ɖe eŋu la, mifia wo be woalɔ̃ Yehowa ƒe Nya la ahade dzesi mɔfiame siwo le eme. (Psalmo 1:2) Esia akpe ɖe wo ŋu dzitsinya nyui nasu wo si.​—Hebritɔwo 5:14.

NU SI NÀTE ŊU AWƆ:

• Na viwòwo nakpɔe be Mawu nye Ame ŋutɔŋutɔ si dzi yewoate ŋu aka ɖo

• Kpe ɖe wo ŋu woakpɔ nuwɔna siwo akplɔ wo ade afɔku me, abe Internet kple Internet dzi hahoo kadodowo zazã madzemadzee ene, adze sii ahaƒo asa na wo. Fia ale si woawɔ aƒo asa na ame siwo blea ɖeviwo dɔa wo gbɔ la hã wo