NUKATAE ame geɖe dagbana le agbe me gake womekpɔa ta gobi aɖeke nɛ o? “Amegbetɔ nyɔnu tɔ dzidzia, eƒe agbe le kpuie, eye fuɖeɖe ti kɔ nɛ. Edona abe seƒoƒo ene, eye wòyrɔna; esina abe vɔvɔli ene, eye metɔna ɖi o.” (Hiob 14:1, 2) Nusi gblẽ ameƒomea ƒe mɔkpɔkpɔ nyuia me dzɔ ɖe amegbetɔ atsu kple asi gbãtɔawo dzi le Paradiso me.

² Hafi amegbetɔƒomea nanɔ dzidzɔ vavãtɔ kpɔm la, ele be ƒomedodo nyui nanɔ wo kple Mawu dome—esi manye dzizizi o ke wòatso lɔlɔ̃nu faa me. (Mose V, 30:15-20; Yosua 24:15) Yehowa di toɖoɖo kple subɔsubɔ si tso dzime, esi tso lɔlɔ̃ me. (Mose V, 6:5) Eyata le Eden-bɔa me la, Yehowa de se aɖe si na mɔnukpɔkpɔ ŋutsu gbãtɔa be wòaɖe eƒe nuteƒewɔwɔ si tso dzime afia. Mawu gblɔ na Adam be: “Ðu abɔmetiawo katã ƒe tsetse faa; ke ati, si na wodzea si nyui kple vɔ̃ la, megaɖu eya ƒe tsetse aɖeke o; gbesigbe naɖu eƒe ɖe, ku ke naku.” (Mose I, 2:16, 17) Dodokpɔ bɔbɔe aɖe ko wònye. Ati siwo katã nɔ abɔa me dometɔ ɖeka ko ŋue Yehowa de se ɖo na Adam be megaɖu o. Ati ma tsi tre ɖi na gome si le Wɔla nusianunyala la si be wòaɖo nusi nyo kple nusi nye vɔ̃. Ŋutsu gbãtɔa gblɔ Mawu ƒe sedede sia na srɔ̃a, amesi Yehowa wɔ na ‘Adam wònye kpeɖeŋutɔ, si sɔ nɛ.’ (Mose I, 2:18) Ðoɖo sia dze wo ame evea siaa ŋu—si nye be woanɔ agbe le Mawu ƒe dziɖulanyenye te—awɔ eƒe lɔlɔ̃nu ŋudzedzekpɔkpɔtɔe ahato ema dzi aɖe lɔlɔ̃ si le wo si na wo Wɔla kple Agbenala la afia.

³ Emegbe da aɖe va ƒo nu na Xawa gbeɖeka hebiae be: “Vavãe Mawu gblɔ bena, migaɖu abɔmetiawo katã ƒe tsetse aɖeke o mahã?” Xawa ɖo eŋu be “ati [ɖeka] si  le abɔa titina,” si nye sidzedze nyui kple vɔ̃ ƒe ati ƒe tsetse ko ŋue wode se ɖo, ‘bena yewomagaku o.’—Mose I, 3:1-3.

⁴ Amekae nye da sia? Biblia-gbalẽ si nye Nyaɖeɖefia tɔ asi “da xoxo la” dzi be eyae nye “Abosam kple Satana, amesi nye xexeame katã blela.” (Nyaɖeɖefia 12:9) Mawue wɔ Satana Abosama? Ao, Yehowa ƒe nuwɔnawo de blibo henyo. (Mose V, 32:4) Gbɔgbɔmenuwɔwɔ sia wɔ eɖokui Abosam, si gɔmee nye “Amegɔmezɔla,” kple Satana, si gɔmee nye “Tsitretsiɖeŋula.” ‘Eya ŋutɔ ƒe dzodzroe hee heblee,’ edzroe be yeanɔ Mawu ƒe nɔƒe, eye ena wòdze aglã ɖe Wɔla la ŋu.—Yakobo 1:14.

⁵ Satana Abosam yi edzi gblɔ na Xawa be: “Miele kuku ge akpɔ o; ke boŋ Mawu nyae bena, gbesigbe ke miaɖu eƒe ɖe la, miaƒe ŋkuwo laʋu, eye mianɔ abe Mawu ene, anya nyui kple vɔ̃.” (Mose I, 3:4, 5) Satana na sidzedze nyui kple vɔ̃ ƒe atia ƒe tsetse ɖuɖu dze nudzroame aɖee. Nya si ko wòdi be yeagblɔ enye be: ‘Mawu le nu nyui aɖe tem mi. Miawo ya miɖu atia ƒe tsetse kpɔ ko, ana mianɔ abe Mawu ene ale be miate ŋu aɖo nusi nyo kple nusi menyo o na mia ɖokui.’ Nukpɔsusu sia kee Satana le zazãm egbea tsɔ le mɔ xem na ame geɖe be womele Mawu subɔm o. Egblɔna be ‘Wɔ nusi dze ŋuwò. Wò ya ŋe aɖaba ƒu nusi wòle be nàwɔ na Amesi na agbe wò la wɔwɔ dzi ko.’—Nyaɖeɖefia 4:11.

⁶ Enumake atia ƒe tsetse va zu nusi dzroa ame, nusi womate ŋu agbe ɖuɖu o! Xawa gbe atikutsetsea, eɖu eƒe ɖe, eye wòtsɔ ɖe na srɔ̃a. Togbɔ be Adam nya nusi ado tso eme nyuie hã la, eɖo to srɔ̃a ƒe gbe heɖu atikutsetsea. Nukae do tso eme? Fɔbunya si Yehowa gblɔ na nyɔnua enye be: “Mana nakpe fu geɖe le fufɔfɔ me, àlé ku hafi àdzi vi, ke wò tame anɔ srɔ̃wo ŋu, eye eya anye gã ɖe dziwò.” Nya kae wògblɔ na ŋutsua hã? “Woaƒo fi ade anyigba le tawò, àkpe fu hafi akpɔ nu aɖu tso me le wò agbe me ŋkekewo katã me. Ŋu kple aŋɔka amie na wò, eye naɖu anyigba dzi amagbewo! Fifia ate wò, hafi nakpɔ abolo aɖu, vaseɖe esime nagatrɔ azu anyi, elabena eya mee woɖe  wò tsoe. Anyi nènye, eye anyi ke nagatrɔ azu!” Azɔ woɖe asi le Adam kple Xawa ŋu be woadi dzidzɔkpɔkpɔ kple dzidzeme alesi woa ŋutɔwo dii. Ðe agbagba siwo amegbetɔwo adze be yewoanɔ dzidzemegbenɔnɔ Mawu ƒe tameɖoɖo manɔmee adze edzia? Ðe dɔ dodzidzɔname si nye Paradiso si le abe abɔ ene dzi kpɔkpɔ ahakekee ɖe enu wòaɖo anyigba ƒe seƒewo ke teƒe la, dɔ sesẽ tikɔname be woakpɔ nu aɖu anɔ agbe dzro ta koe wova nɔ wɔwɔm, eye womenɔ naneke wɔm hena wo Wɔla ŋuti kɔkɔ o.—Mose I, 3:6-19.

⁷ Gbesigbe amegbetɔ atsu kple asi gbãtɔa ɖu sidzedze nyui kple vɔ̃ ƒe atia ƒe tsetse ko la, woku le Mawu ƒe nukpɔkpɔ nu eye woɖo ta woƒe ku ŋutɔŋutɔ gbɔ. Nukae dzɔ ɖe wo dzi esi wova ku mlɔeba? Biblia kɔ nɔnɔme si me ame kukuwo le la me. “Agbagbeawo nyae be, yewogbɔna kuku ge, ke kukuawo menya naneke o, fetu aɖeke megali na wo o, eye woŋlɔ woƒe ŋkɔ be.” (Nyagblɔla 9:5; Psalmo 146:4) Naneke megali woyɔna be “luʋɔ” si nɔa agbe le ku megbe o. Nuvɔ̃ ƒe tohehee nye ku, ke menye funyafunyawɔame tegbetegbe le dzomavɔ me o. Gakpe ɖe eŋu la, ku mekplɔa ame yia vivisese mavɔ me le dziƒo o. *

⁸ Abe alesi dzesi anɔ abolo ŋu alo wòabɔ ɖe eme kokoko ne womee le abologba si bɔ ɖe eme me ene la, nenema ke vi madebliwo koe ŋutsu kple nyɔnu siwo megade blibo azɔ o la hã ate ŋu adzi. Biblia ɖe nɔnɔmea me be: “To ame ɖeka dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo katã dzi yi, esi wo katã wɔ nuvɔ̃ ŋuti.” (Romatɔwo 5:12) Eyata wodzi mí katã de nuvɔ̃ me, eye míaƒe nusianu zu yaka. Adam ƒe dzidzimeviwo ƒe agbenɔnɔ va zu agbe tikɔname si ɖea dzi le ame ƒo. Gake ɖe egbɔkpɔnu aɖe lia?