Vinyɔnu aɖe nɔ Izebel si si ŋkɔe nye Ataliya, eƒe tagbɔ sẽ abe nɔa ene. Ataliya nye Yuda-fia srɔ̃. Esi Ataliya srɔ̃ ku la, via zu fia ɖe eteƒe. Gake esi via hã ku la Ataliya ɖo eɖokui Yuda-fiae. Edze agbagba be yeatsrɔ̃ fiaƒome bliboa, ewu ame siwo katã dze aɖu fia la, ewu mamayɔviawo gɔ̃ hã. Amewo katã vɔ̃na nɛ.

Nunɔlagã Yehoyada kple srɔ̃a Yehoseba nya nyuie be nu si wɔm Ataliya nɔ la menyo o. Wode woƒe agbe afɔku me eye wotsɔ Ataliya mamayɔviawo dometɔ ɖeka, si ŋkɔe nye Yehoas la ɣla. Wonyii le gbedoxɔa me.

Esi Yehoas xɔ ƒe adre la, Yehoyada yɔ amegãwo kple Lewi viwo katã ƒo ƒu eye wògblɔ na wo be: ‘Midzɔ gbedoxɔa ƒe ʋɔtruwo nu, migana ame aɖeke nage ɖe eme o.’ Eye Yehoyada ɖo Yehoas Yuda-fiae heɖɔ fiakuku nɛ. Eye ameawo do ɣli be: ‘Fia nenɔ agbe tegbee!’

Esi fianyɔnu Ataliya se ɣlia la, eƒu du yi gbedoxɔa me. Esi wòkpɔ fia yeyea la, edo ɣli be: “Nugbeɖoɖoe! Nugbeɖoɖoe!” Amegãwo lé fianyɔnu vɔ̃ɖia, wokplɔe dzoe, eye wowui. Ke ŋusẽ gbegblẽ si eƒe nuwɔnawo kpɔ ɖe dukɔa dzi ya ɖe?

Yehoyada kpe ɖe dukɔa ŋu wobla nu kple Yehowa, eye wodo ŋugbe na Mawu be yewoasubɔ eya ɖeɖe ko. Yehoyada na wogbã Baal ƒe trɔ̃xɔ kple legbawo gudugudu. Eɖo nunɔlawo kple Lewi viwo be woawɔ gbedoxɔa me dɔwo ale be ameawo nagate ŋu asubɔ le afi ma. Eɖo agbonudzɔlawo be woadzɔ gbedoxɔa ŋu ale be ame makɔmakɔ  aɖeke nagage ɖe eme o. Azɔ Yehoyada kple amegãwo kplɔ Yehoas yi fiasã la me eye wotsɔe ɖo fiazikpui la dzi. Yudatɔwo kpɔ dzidzɔ ŋutɔ. Fifia woate ŋu asubɔ Yehowa le ablɔɖe me Ataliya vɔ̃ɖi la manɔmee eye Baal subɔsubɔ hã makpɔ ŋusẽ ɖe wo dzi o. Mèkpɔe be Yehoyada ƒe dzinɔameƒoa ɖe vi na ame geɖe oa?