1-3. Futɔ kae nyã mí katã ɖe nu, eye nukatae nusi Biblia fia me dzodzro ana míakpɔ gbɔdzɔe?

TSƆE BE futɔ vɔ̃ɖivɔ̃ɖi aɖe kplɔ wò ɖo vevie kple du. Futɔa sesẽ wu wò eye eƒe afɔ hã le tsɔtsɔm wu tɔwò. Ènyae nyuie be mekpɔa nublanui na ame o elabena èkpɔ eteƒe wòwu xɔ̃wò vevi aɖewo xoxo. Aleke ke nèle dua simee o, èkpɔe be tetem ko wòle ɖe ŋuwò. Edze abe mɔkpɔkpɔ aɖeke kura megali na wò o ene. Gake kasia, ame aɖee nye ma va do be yeaxɔ na wò. Amea sesẽ kura wu wò futɔa, eye wògblɔ na wò be yeakpe ɖe ŋuwò. Gbɔdzɔe ka gbegbee nye si esia ana nàkpɔ!

² Le mɔ aɖe nu la, futɔ sia tɔgbe nyã wò ɖe nu ŋutɔŋutɔ. Enyã mí katã ɖe nu. Abe alesi míesrɔ̃e le ta si do ŋgɔ me ene la, Biblia la yɔ ku be futɔ. Mía dometɔ aɖeke meli si ate ŋu asi le enu loo alo ate ŋu awɔ avu kplii aɖu edzi o. Mía dometɔ akpa gãtɔ míekpɔ eteƒe futɔ sia kplɔ míaƒe ame veviwo dzoe. Gake ŋusẽ le Yehowa si kura wu ku. Yehowae nye Xɔnametɔ lɔ̃ame si ɖee fia xoxo be yeate ŋu aɖu futɔ sia dzi. Eye edo ŋugbe hã be yeatsrɔ̃ futɔ sia si nye ku la ɖa kura tegbee. Biblia fia mí be: “Futɔ mamlɛtɔ, si woaɖe ɖa la, enye ku.” (Korintotɔwo I, 15:26) Nyanyui aɖee nye ma!

 ³ Azɔ na míabu alesi míesena le mía ɖokui me ne ku va kplɔ míaƒe ame vevi aɖe dzoe ŋu akpɔ vie. Esia wɔwɔ ana míava se nane si ahe dzidzɔ vɛ na mí la gɔme nyuie. Nya lae nye be Yehowa do ŋugbe be ame kukuwo agava nɔ agbe ake. (Yesaya 26:19) Woagatrɔ ava agbe me. Emae nye tsitretsitsi ƒe mɔkpɔkpɔ la.

4. (a) Nukatae ne míenya alesi Yesu se le eɖokui me esi eƒe ame vevi aɖe ku la, ate ŋu ana míanya alesi Yehowa hã sena le eɖokui me le ku ŋu? (b) Amekawoe va nye Yesu xɔlɔ̃ veviwo?

⁴ Ame vevi aɖe ku na wò kpɔa? Vevesese, nuxaxa, kple wɔnamanɔameŋu ƒe seselelãme siwo wòhena vɛ dzena abe ɖe wowu tsɔtsɔ ene. Ne míeɖo nɔnɔme siawo me la, Mawu ƒe Nya la mee wòle be míadi akɔfafa atsoe. (Korintotɔwo II, 1:3, 4) Biblia la kpe ɖe mía ŋu míese alesi Yehowa kple Yesu sena le wo ɖokui me le ku ŋu gɔme. Yesu, amesi ƒe amenyenye kple nɔnɔme sɔ kple Fofoa tɔ pɛpɛpɛ la, nya vevesese si gbegbe wònyena ne ku dzɔ ɖe ame dzi. (Yohanes 14:9) Ne Yesu yi Yerusalem la, eɖia tsa yina Betania si nye du si medidi tso afima o me va srãa Lazaro kple nɔvianyɔnu Maria kple Marta kpɔna. Wova zu xɔlɔ̃ veviwo. Biblia gblɔ be: “Yesu lɔ̃a Marta kple nɔvianyɔnua kpakple Lazaro.” (Yohanes 11:5) Gake abe alesi míesrɔ̃e le ta si do ŋgɔ me ene la, Lazaro enye ma ku.

5, 6. (a) Aleke Yesu wɔ nui esi wòyi Lazaro ƒometɔ siwo nɔ nu xam gbɔ? (b) Nukata Yesu ƒe nuxaxa nye nusi naa dzi ɖoa mía ƒo?

⁵ Aleke Yesu se le eɖokui me esi exɔlɔ̃a ku? Nuŋlɔɖia gblɔ na mí be Yesu yi Lazaro ƒometɔwo kple xɔlɔ̃wo gbɔ esime wonɔ woƒe ame si ku la fam. Alesi wonɔ nu xamee la teƒekpɔkpɔ wɔ dɔ ɖe Yesu dzi vevie. Nuŋlɔɖia gblɔ be Yesu ‘xa nu vevie le gbɔgbɔ la me, eye eƒe dzi ʋuʋu.’ Tete “Yesu fa avi.” (Yohanes 11:33, 35) Ðe Yesu ƒe nuxaxa fia be mɔkpɔkpɔ aɖeke menɔ esi oa? Ao, menye nenemae kura o. Le nyateƒe me la, Yesu nya be yele nu wɔnuku aɖe wɔ ge le afima kpuie. (Yohanes 11:3, 4) Ke hã enya vevesese kple nuxaxa si gbegbe ku hena vɛ.

 ⁶ Le mɔ aɖe nu la, Yesu ƒe nuxaxa nye nusi naa dzi ɖoa mía ƒo. Efia mí be Yesu kple Fofoa, Yehowa, medi kura be ku nanɔ anyi o. Gake Yehowa Mawu ate ŋu aɖu futɔ ma dzi bɔbɔe! Mina míakpɔ nusi Mawu na Yesu wɔ ɖa.

7, 8. Nukatae wòdze abe Lazaro ƒe nɔnɔmea na mɔkpɔkpɔ aɖeke meganɔ fanametɔwo si o ene, gake nukae Yesu wɔ?

⁷ Kpeto aɖe mee woɖi Lazaro ɖo, eyata Yesu bia be woamli kpe si wotsɔ xe doa nui la ɖa. Marta melɔ̃ ɖe edzi o elabena ŋkeke ene va yi xoxo tso esime Lazaro ku, eye enya be fifia eƒe ŋutilã ate gbegblẽ. (Yohanes 11:39) Amekae aganɔ mɔ kpɔm be woate ŋu awɔ nane le nɔnɔmea ŋu?

⁸ Womli kpea ɖa, eye Yesu do ɣli sesĩe be: “Lazaro lee, do go!” Nukae dzɔ? ‘Amesi ku hafi la do go va.’ (Yohanes 11:43, 44) Àte ŋu akpɔ alesi amesiwo nɔ afima la akpɔ dzidzɔe ɖa le susu mea? Lazaro ɖanye wo nɔviŋutsu, ƒometɔ, xɔlɔ̃, alo aƒelika o, wo katã wonya nyuie be eku. Gake fifia, ame ma si wolɔ̃ vevie la tututue nye ma gava le tsitre ɖe wo dome. Anya wɔ na wo abe drɔ̃e kum yewonɔ ene. Ðikeke mele eme o be wo dometɔ geɖe anya wɔ atuu na Lazaro kple dzidzɔ gã aɖe. Ku dzi ɖuɖu ka gbegbee nye si!

9, 10. (a) Aleke Yesu ɖe Amesi gbɔ ŋusẽ si wòtsɔ fɔ Lazaro ɖe tsitre tso la fiae? (b) Viɖe kawoe míakpɔ ne míexlẽ tsitretsitsi ŋu nya siwo woŋlɔ ɖe Biblia me?

⁹ Yesu megblɔ be ye ŋutɔ yeƒe ŋusẽe yetsɔ wɔ nukunu gã sia o. Le gbe si wòdo ɖa do ŋgɔ hafi yɔ Lazaro me la, ena wòdze ƒã be Yehowae nye Amesi gbɔ tsitretsitsia tso. (Yohanes 11:41, 42) Menye esiae nye zi gbãtɔ si Yehowa zã eƒe ŋusẽa le mɔ sia nu o. Lazaro fɔfɔ ɖe tsitre nye nukunu sia tɔgbe asieke siwo woŋlɔ ɖe Mawu ƒe Nya la me dometɔ ɖeka ko. * Nuŋlɔɖi siawo xexlẽ kple nusrɔsrɔ̃ tso wo ŋu doa dzidzɔ  na ame ŋutɔ. Wofia mí be Mawu mekpɔa ame ŋkume o, elabena efɔ ɖeviwo kple tsitsiawo, ŋutsuwo kple nyɔnuwo, Israel-viwo kple amesiwo menye Israel-viwo o siaa ɖe tsitre. Eye aleke gbegbe ŋutinya mawo ɖee fia be amewo kpɔ dzidzɔe nye si! Le kpɔɖeŋu me, esi Yesu fɔ nyɔnuvi sue aɖe ɖe tsitre la, edzilawo ‘gli kple dzidzɔ gã.’ (Marko 5:42) Nyateƒee, nusi Yehowa wɔ na wo la do dzidzɔ na wo ale gbegbe be womaŋlɔe be akpɔ o.

¹⁰ Ele eme baa be amesiwo Yesu fɔ ɖe tsitre la gaku mlɔeba ya. Ke ɖe wòfia be wo fɔfɔ ɖe tsitre meɖe vi aɖeke oa? Menye nenemae kura o. Biblia ƒe nuŋlɔɖi siawo ɖo kpe nyateƒenya veviwo dzi na mí eye wògana mɔkpɔkpɔ hã mí.

11. Aleke Lazaro fɔfɔ ɖe tsitre ŋuti nuŋlɔɖia ɖo kpe nya si le Nyagblɔla 9:5 ƒe nyateƒenyenye dzii?

¹¹ Biblia fia mí be “kukuawo menya naneke o.” Womegale agbe o eye womegale afi aɖeke hã o. Lazaro ƒe tsitretsitsi ŋuti nuŋlɔɖia ɖo kpe nyateƒenya sia dzi. Esi Lazaro gagbɔ agbe la, ɖe wòva ɖɔ alesi dziƒo le na amewo wòdzɔ dzi na woa? Alo ɖe wòƒo nu tso dzomavɔ ƒe fukpekpe dziŋɔ aɖe ŋu wòna vɔvɔ̃ ɖo amewoa? Ao. Nya aɖeke mele Biblia me si fia be Lazaro gblɔ nya siawo ƒe ɖeke o. Le ŋkeke ene siwo me wòku la, ‘meganya naneke o.’ (Nyagblɔla 9:5) Ðeko Lazaro nɔ alɔ̃ dɔm le ku me.—Yohanes 11:11.

12. Nukata míate ŋu aka ɖe edzi be wofɔ Lazaro ɖe tsitre ŋutɔŋutɔ?

¹² Lazaro ŋuti nuŋlɔɖia gafia mí hã be nu ŋutɔŋutɔe tsitretsitsia nye, ke menye nyakpakpa aɖe ko o. Yesu fɔ Lazaro ɖe tsitre eye ameha gã aɖe kpɔ eteƒe. Subɔsubɔhakplɔla siwo lé fu Yesu kura gɔ̃ hã megbe be nukunu sia dzɔ o. Nya si wogblɔ boŋ enye: “Nuka míawɔ? Elabena amesia [Yesu] le dzesi geɖewo wɔm.” (Yohanes 11:47) Ame geɖe yi va kpɔ ŋutsu si wofɔ ɖe tsitre la. Esia na be ame geɖe wu gava xɔ Yesu dzi se.  Wokpɔe dze sii be agbe gbɔgbɔ Lazaro nye kpeɖodzi ŋutɔŋutɔ be Mawue dɔ Yesu ɖo ɖa. Kpeɖodzi ŋutɔŋutɔ sia sẽ ŋu ale gbegbe be Yuda-subɔsubɔhakplɔla siwo nye dzimesesẽtɔwo ɖo nugbe be yewoawu Yesu kple Lazaro siaa.—Yohanes 11:53; 12:9-11.

13. Kpeɖodzi kae le mía si si ta míaxɔe ase be Yehowa ate ŋu afɔ ame kukuwo ɖe tsitre ŋutɔŋutɔ?

¹³ Ðe susu le eme be míaxɔe ase be woava fɔ ame kukuwo ɖe tsitre ŋutɔŋutɔa? Ẽ, elabena Yesu gblɔ be ŋkeke gbɔna si woafɔ ‘amesiwo katã le ŋkuɖodzi yɔdowo me’ la ɖe tsitre. (Yohanes 5:28) Yehowae nye nusianu si le agbe la Wɔla. Ðe wòasesẽ na mí be míaxɔe ase be ate ŋu agbugbɔ agbe ana nusi me agbe mele oa? Le nyateƒe me la, esia dzixɔxɔse atso alesi gbegbe Yehowa ate ŋu aɖo ŋku nu dzii gbɔ. Ke ɖe wòate ŋu aɖo ŋku míaƒe lɔlɔ̃tɔ siwo ku dzia? Ɣletivi gbogbo manyaxlẽ aɖee le dziƒonutoa me katã, ke hã Mawu yɔa wo dometɔ ɖesiaɖe ƒe ŋkɔ! (Yesaya 40:26) Eyata Yehowa Mawu ate ŋu aɖo ŋku míaƒe lɔlɔ̃tɔ siwo ku la dzi pɛpɛpɛ le nusianu me, eye ele klalo be yeagbɔ agbe wo hã.

14, 15. Abe alesi Hiob ƒe nyawo ɖee fiae ene la, aleke gbegbe Yehowa di be yeagbɔ agbe ame kukuwoe?

¹⁴ Gake aleke gbegbe Yehowa di be yeagbɔ agbe ame kukuwoe? Biblia fia mí be enye eƒe didi vevie be yeafɔ ame kukuwo ɖe tsitre. Nuteƒewɔla Hiob bia nya sia be: “Ne ŋutsu ku la, ɖe wògagbɔa agbea?” Hiob nɔ nu ƒom tso alesi wòanɔ yɔdo me anɔ lalam vaseɖe esime ɣeyiɣia nade be Mawu naɖo ŋku edzi ŋu. Egblɔ na Yehowa be: “Àyɔm, eye matɔ na wò, [elabena] wò asinudɔwɔwɔ ƒe nu le dzrowòm.”—Hiob 14:13-15.

¹⁵ Wò ya bu eŋu kpɔ ko! Ele Yehowa dzrom vevie ŋutɔ be yeagbɔ agbe ame kukuwo. Ðe mefaa dzi na mí be míasrɔ̃e be aleae Yehowa sena le eɖokui me oa? Gake aleke tsitretsitsi si le ŋgɔ gbɔna la anɔ? Amekawoe woafɔ ɖe tsitre, eye le afika?

16. Teƒe ka ƒomevie amesiwo woafɔ ɖe tsitre la ava nɔ?

¹⁶ Amewo fɔfɔ ɖe tsitre ŋuti nuŋlɔɖi siwo le Biblia me la fia nu geɖe mí tso tsitretsitsi si le ŋgɔ gbɔna ŋu. Anyigba dzi afisiae wogbɔ agbe amewo le eye wogava wɔ ɖeka kple woƒe ƒometɔwo. Aleae tsitretsitsi si le ŋgɔ gbɔna la anɔ—gake eya anyo wu sasasã. Míesrɔ̃e le Ta 3 lia me be Mawu ƒe tameɖoɖoe nye be anyigba bliboa nazu paradiso. Eyata menye xexe si me yɔ fũ kple aʋawɔwɔ, nuvlowɔwɔ, kple dɔléle mee woafɔ amewo woava nɔ o. Mɔnukpɔkpɔ asu wo si be woanɔ agbe tegbee le ŋutifafa kple dzidzɔ blibo me le anyigba sia dzi.

17. Ame nenie woafɔ ɖe tsitre?

¹⁷ Amekawoe woafɔ ɖe tsitre? Yesu gblɔ be ‘amesiwo katã le ŋkuɖodzi yɔdowo me ase yeƒe gbe eye woado go.’ (Yohanes 5:28, 29) Nenema ke Nyaɖeɖefia 20:13 hã gblɔ be: “Atsiaƒu ɖe ame kuku, siwo le eme la, hena, eye ku kple tsiẽƒe [Hades] woɖe ame kuku, siwo le wo si la, hena.” Eyata “tsiẽƒe,” alo Hades, tsi tre ɖi na ameƒomea ƒe yɔdo. (Kpɔ Megbenyawo, le axa 212-13.) Yɔdo mawo katã atsi ƒuƒlu. Ame biliɔn geɖe siwo le gbɔgbɔm ɖe eme le wo me la agagbɔ agbe. Apostolo Paulo gblɔ be: “Tsitretsitsi li na ame dzɔdzɔewo kple ame madzɔmadzɔwo siaa.” (Dɔwɔwɔwo 24:15) Nya mawo gɔme ɖe?

18. Amekawoe nye ‘ame dzɔdzɔe’ siwo woafɔ ɖe tsitre, eye aleke tsitretsitsi mɔkpɔkpɔa ate ŋu aɖe vi na wò ŋutɔe?

¹⁸ ‘Ame dzɔdzɔe’ siawo dometɔ aɖewoe nye ame geɖe siwo ŋu nya míexlẽna le Biblia me siwo nɔ anyi hafi Yesu va anyigba dzi. Ðewohĩ wò susu ayi amewo abe Noa, Abraham, Sara, Mose, Rut, Ester, kple bubuawo ene dzi. Woƒo nu tso ŋutsu kple nyɔnu xɔsetɔ siawo dometɔ aɖewo ŋu le Hebritɔwo ta 11 lia me. Gake menye woawo koe nye “ame dzɔdzɔewo” o, ke boŋ Yehowa subɔla siwo ku le míaƒe ŋkeke siawo me hã le wo dome. Enyo ŋutɔ be le tsitretsitsi mɔkpɔkpɔa ta míate ŋu avo tso vɔvɔ̃ na ku me azɔ.—Hebritɔwo 2:15.

19. Amekawoe nye “ame madzɔmadzɔwo,” eye mɔnukpɔkpɔ kae Yehowa aʋu ɖi na wo lɔlɔ̃tɔe?

 ¹⁹ Ke amesiwo katã mesubɔ Yehowa alo ɖo toe o le esi mɔnukpɔkpɔ mesu wo si wodze si eyama o ya ɖe? Womaŋlɔ ‘ame madzɔmadzɔ’ biliɔn geɖe mawo hã be o. Woafɔ woawo hã ɖe tsitre eye ɣeyiɣi asu wo si be woatsɔ asrɔ̃ nu tso Mawu vavã la ŋu ahasubɔe. Le ɣeyiɣi ƒe didime si nye ƒe akpe ɖeka me la, woafɔ ame kukuwo ɖe tsitre ahana mɔnukpɔkpɔ wo be woawɔ ɖeka kple nuteƒewɔla siwo le anyigba dzi le Yehowa subɔsubɔ me. Ɣeyiɣi dodzidzɔname ŋutɔ aɖee wòanye. Ɣeyiɣi siae Biblia yɔ be Ʋɔnudrɔ̃gbe la. *

20. Nukae nye dzomavɔʋe alo Gehenna, eye amekawoe yia afima?

²⁰ Ðe esia le fiafiam be woafɔ amesiame si nɔ agbe le anyigba sia dzi kpɔ la ɖe tsitrea? Ao. Biblia la gblɔ be amesiwo ku la dometɔ aɖewo le “dzomavɔʋe me,” alo “Gehenna, NW.” (Luka 12:5) Aɖukpo aɖe si nɔ blema Yerusalem-dua ƒe gliwo godo ƒe ŋkɔ me ye woɖe ŋkɔ Gehenna tsoe. Afimae dzo nɔa bibim le ɣesiaɣi wotsɔa nu kukuwo kple gbeɖuɖɔwo ƒua gbe ɖo. Amesiwo ku siwo Yudatɔwo bu be womedze be woaɖi wo o eye womedze be woagafɔ wo ɖe tsitre o lae wotsɔna ƒua gbe ɖe afima. Eyata wotsɔ dzomavɔʋe alo Gehenna wɔ tsɔtsrɔ̃ ɖikaa ƒe kpɔɖeŋu si sɔ. Togbɔ be Yesu awɔ akpa aɖe le ʋɔnudɔdrɔ̃ me hã la, Yehowae nye Ʋɔnudrɔ̃lagã na agbagbeawo kple kukuawo. (Dɔwɔwɔwo 10:42) Mafɔ amesiwo wòdrɔ̃ ʋɔnui be wonye ame vɔ̃ɖi siwo gbe tɔtrɔ wɔwɔ la ɖe tsitre gbeɖe o.

21, 22. (a) Tsitretsitsi bubu kae gali? (b) Amekae nye ame gbãtɔ si wofɔ ɖe tsitre le gbɔgbɔ me kpɔ?

²¹ Biblia gaƒo nu tso tsitretsitsi bubu aɖe hã ŋu, si me woagbɔ agbe amewo woazu gbɔgbɔmenuwɔwɔwo ayi dziƒo. Tsitretsitsi sia ƒe kpɔɖeŋu ɖeka koe le Biblia me, si nye Yesu Kristo ƒe tsitretsitsi.

 ²² Esi Yesu va anyigba dzi eye wowui la, Yehowa meɖe mɔ Via wɔnuteƒe la tsi yɔdo me o. (Psalmo 16:10; Dɔwɔwɔwo 13:34, 35) Mawu fɔ Yesu ɖe tsitre, gake mefɔe wònye amegbetɔ o. Apostolo Petro ɖe eme be ‘wowu Kristo le ŋutilã gome, ke wogbɔ agbee le gbɔgbɔ gome.’ (Petro I, 3:18) Nukunu gã aɖee wònye vavã. Wogbɔ agbe Yesu wòganye gbɔgbɔmeme sẽŋu aɖe! (Korintotɔwo I, 15:3-6) Yesue nye ame gbãtɔ si kpɔ ŋutikɔkɔe ƒe tsitretsitsi sia tɔgbe. (Yohanes 3:13) Gake mase ɖe eya ɖeka ko dzi o.

23, 24. Amekawoe le Yesu ƒe “ha sue” la me, eye ame nenie wonye?

²³ Esi Yesu nya be yeagatrɔ ayi dziƒo kpuie ta la, egblɔ na eyomedzela wɔnuteƒeawo be yeayi ‘ava dzra teƒe ɖo ɖi na wo.’ (Yohanes 14:2) Yesu yɔ amesiwo ayi dziƒo be wonye “ha sue.” (Luka 12:32) Ame nenie anɔ Kristotɔ wɔnuteƒewo ƒe ƒuƒoƒo sue sia me? Apostolo Yohanes gblɔ le Nyaɖeɖefia 14:1 be: “Mekpɔ, eye kpɔ ɖa, alẽvi la [Yesu Kristo] le tsitre ɖe Zion-to la dzi, eye ame akpe alafa ɖeka blane vɔ ene, siwo ƒe ŋgonu woŋlɔ eƒe ŋkɔ kple Fofoa ƒe ŋkɔ ɖo la, le eŋu.”

²⁴ Kristotɔ siwo ƒe xexlẽmee nye 144,000, siwo dome Yesu ƒe apostolo wɔnuteƒeawo le, lae nye amesiwo woafɔ ɖe tsitre ayi dziƒo. Ɣekaɣie woƒe tsitretsitsia dze egɔme? Apostolo Paulo ŋlɔ be esia adzɔ le Kristo ƒe anyinɔɣi. (Korintotɔwo I, 15:23) Àva srɔ̃e le Ta 9 lia me ahakpɔe be ɣeyiɣi ma mee míele fifia. Eyata woafɔ ame 144,000 la dometɔ ʋɛ siwo susɔ, siwo aku le míaƒe ŋkeke sia me la, ɖe tsitre enumake woayi dziƒo. (Korintotɔwo I, 15:51-55) Gake ameƒomea me tɔ akpa gãtɔ ƒe mɔkpɔkpɔ enye be woafɔ wo ɖe tsitre woava nɔ Paradiso me le anyigba dzi.

25. Nuka mee míadzro le ta si kplɔ esia ɖo me?

²⁵ Ẽ, Yehowa aɖu futɔ si nye ku dzi ŋutɔŋutɔ, eye wòaɖee ɖa kura tegbee! (Yesaya 25:8) Gake ɖewohĩ àbia be, ‘Nukae amesiwo woafɔ ɖe tsitre ayi dziƒo la ava wɔ le afima?’ Woava nye dziɖulawo le Fiaɖuƒe wɔnuku aɖe me le dziƒo. Míasrɔ̃ nu geɖe tso dziɖuɖu ma ŋu le ta si kplɔ esia ɖo me.