1, 2. (a) Nukae ana nàbu nunana aɖe be asixɔxɔ gã le eŋu? (b) Nukata míate ŋu agblɔ be tafeae nye nunana si ŋu asixɔxɔ gãtɔ kekeake le si nàte ŋu axɔ?

NUKAE nye nunana vevitɔ kekeake si nèxɔ kpɔ? Mehiã be woagblẽ ga geɖe ɖe nunana aɖe ŋu hafi wòanye nunana vevi o. Ne míagblɔe la, menye ga home si wotsɔ ƒle nunana aɖe koŋue fiaa eƒe vevienyenye ŋutɔŋutɔ kokoko o. Ke boŋ nenye be nunanaa he dzidzɔ vɛ na wò alo kpɔ agbemenuhiahiã vevi aɖe gbɔ na wò la, ke enye nusi ŋu nàde asixɔxɔ gã aɖee.

² Le nunana geɖe siwo nàdi be yeaxɔ dome la, ɖeka aɖe li si ƒe asixɔxɔ ƒo bubu ɖesiaɖe ta. Mawu gbɔe nunana ma tso na ameƒomea. Yehowa tsɔ nu geɖe na mí, gake eƒe nunana gãtɔ kekeake enye Via, Yesu Kristo, ƒe tafevɔsa la. (Mateo 20:28) Míava kpɔe le ta sia me be tafe lae nye nunana si ŋu asixɔxɔ gãtɔ kekeake le si nàte ŋu axɔ, elabena ate ŋu ahe dzidzɔ manyagblɔ vɛ na wò eye wòana nàkpɔ wò hiahiã vevitɔwo gbɔ. Nyateƒee, tafeae nye Yehowa ƒe lɔlɔ̃ gãtɔ kekeake si wòɖe fia wò.

3. Nukae nye tafe la, eye nuka gɔmee wòle be míase hafi ate ŋu ase nusita wònye nunana gãtɔ kekeake ɖo la gɔme?

³ Míagblɔe kpuie ko be tafeae nye ɖoɖo si Yehowa wɔ be yeaɖe mí alo yeaxɔ amegbetɔƒomea tso nuvɔ̃ kple ku me. (Efesotɔwo 1:7) Be míase Biblia ƒe nufiafia sia gɔme la, ehiã be míatrɔ susu ɖe nusi dzɔ le Eden-bɔa me ŋu. Ne míese nusi gbegbe Adam bu esi wòwɔ nuvɔ̃ gɔme ko hafi míate ŋu ase nusita tafeae nye nunana gãtɔ kekeake ɖo la gɔme.

4. Nukae agbe deblibo si Adam nɔ la fia?

⁴ Esi Yehowa wɔ Adam la, nu xɔasi ŋutɔ aɖee wòtsɔ nɛ—si nye amegbetɔ ƒe agbe deblibo. Bu alesi ema nɔ na Adam ŋu kpɔ. Esi wowɔe wòde blibo le ŋutilã kple susu me ta la, madze dɔ, atsi aku amegã, alo aku akpɔ gbeɖe o. Enye ame deblibo si le ƒomedodo tɔxɛ aɖe me kple Yehowa. Biblia gblɔ be Adam nye ‘Mawu ƒe vi.’ (Luka 3:38) Eyata ƒomedodo kplikplikpli aɖee le Adam kple Yehowa Mawu dome, abe ƒomedodo si nɔa vi kple fofoa si lɔ̃nɛ vevie dome ene. Yehowa ƒoa nu kple via Adam le anyigba dzi, eye wòde dɔ siwo me dzidzeme le la asi nɛ be wòawɔ, hena wònya nusi wòdi tso esi.—Mose I, 1:28-30; 2:16, 17.

5. Nukae Biblia fia esi wògblɔ be “Mawu ƒe nɔnɔme” nue wòwɔ Adam ɖo?

⁵ “Mawu ƒe nɔnɔme” nue wòwɔ Adam ɖo. (Mose I, 1:27) Ema mefia be Adam ƒe dzedzeme ɖi Mawu tɔ o. Míesrɔ̃e le agbalẽ sia ƒe Ta Gbãtɔ me be Yehowa nye gbɔgbɔ eye womate ŋu akpɔe kple ŋku o. (Yohanes 4:24) Eyata ŋutilã si me ʋu le abe mía tɔ ene mele Yehowa si o. Mawu ƒe nɔnɔme si nu wòwɔ Adam ɖo la fia be Mawu wɔe hetsɔ eƒe nɔnɔme siwo dometɔ aɖewoe nye lɔlɔ̃, nunya, dzɔdzɔenyenye, kple ŋusẽ nɛ. Adam ɖi Fofoa le mɔ vevi bubu aɖe hã nu, si nye be tiatiawɔblɔɖe nɔ esi. Eyata Adam menɔ abe  mɔ̃ aɖe si wowɔ be wòawɔ nusi ƒe ɖoɖo wowɔ de eme la dzaa ko ene o. Ke boŋ ate ŋu awɔ eya ŋutɔ ƒe nyametsotsowo, atiae be yeawɔ nyui alo vɔ̃. Ne ɖe wòtiae be yeaɖo to Mawu la, anye ne enɔ agbe tegbee le Paradiso me le anyigba dzi hafi.

6. Nukae Adam bu esi wògbe toɖoɖo Mawu, eye aleke wògblẽ nu le eƒe dzidzimeviwo ŋui?

⁶ Eyata edze ƒã be nu xɔasi ŋutɔ aɖee Adam bu esi wògbe toɖoɖo Mawu eye wotso kufia nɛ. Nuvɔ̃ si wòwɔ la na wòbu agbe deblibo si wonae kple eƒe viɖe bubuawo katã. (Mose I, 3:17-19) Nublanuitɔe la, menye Adam ɖeka koe agbe xɔasi sia bu na o ke ebui na vi siwo katã wòava dzi la hã. Mawu ƒe Nya la gblɔ be: “To ame ɖeka [si nye Adam] dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo katã dzi yi, esi wo katã wɔ nuvɔ̃ ŋuti la.” (Romatɔwo 5:12) Ẽ, mí katã míenyi nuvɔ̃ dome tso Adam gbɔ. Esia tae Biblia gblɔ be ‘edzra’ eɖokui kple eƒe dzidzimeviwo katã na nuvɔ̃ kple ku ƒe kluvinyenye. (Romatɔwo 7:14) Mɔkpɔkpɔ aɖeke meganɔ anyi na Adam kple Xawa o elabena ɖe woɖoe koŋ tiae be yewoagbe toɖoɖo Mawu. Ke mí amesiwo katã nye viawo ya ɖe?

7, 8. Gɔmesese eve kawo koŋue le nya tafe ŋu?

⁷ Yehowa to tafea dzi va xɔ na ameƒomea. Nukae nye tafe? Gɔmesese eve koŋue le nya tafe ŋu. Gbã, tafe enye fe si woxe be woaɖe asi le ame alo nane ŋu alo be woagbugbɔe aƒle. Woate ŋu atsɔe asɔ kple fe si woxe be woaɖe asi le amesi wolé le aʋawɔwɔ me ŋu. Evelia, tafe enye nusi wona tsɔ xe fe ɖe nane ta alo tsɔ tsyɔ nane dzi. Esɔ kple nugblẽfe si woxe na ame aɖe ɖe afɔku aɖe ta. Le kpɔɖeŋu me, ne ame aɖe na afɔku aɖe dzɔ la, woate ŋu abia tso esi be wòaxe fe si sɔ pɛpɛpɛ kple nusi wòbu alo nusi dome wògblẽ la.

⁸ Aleke wòanya wɔe be woaɖo nu gã si dome Adam gblẽ  na mí katã la teƒe ahaɖe mí tso nuvɔ̃ kple ku ƒe kluvinyenye me? Na míadzro tafe si ƒe ɖoɖo Yehowa wɔ kple vi si wòate ŋu aɖe na wò la me akpɔ.

9. Tafe ka tɔgbee hiã?

⁹ Esi wònye amegbetɔ ƒe agbe debliboe bu ta la, ame madeblibo aɖeke mate ŋu agbugbɔ ema aƒle alo axe fe ɖe eta akpɔ gbeɖe o. (Psalmo 49:8, 9) Nusi hiãe nye tafe si ƒe asixɔxɔ sɔ pɛpɛpɛ kple nusi bu la. Esia wɔ ɖeka kple dzɔdzɔenyenye deblibo ƒe gɔmeɖose si le Mawu ƒe Nya la me, si gblɔ be: “Agbe ɖe agbe teƒe.” (Mose V, 19:21) Ekema nukae ate ŋu axe fe ɖe ame deblibo ƒe agbe si Adam bu la ƒe asixɔxɔ nu? Ehiã be woazã ame deblibo bubu aɖe ƒe agbe wòanye ‘fexexeɖeta si sɔ ɖe enu.’—Timoteo I, 2:6.

10. Aleke Yehowa wɔ tafe ƒe ɖoɖoae?

¹⁰ Aleke Yehowa wɔ tafe ƒe ɖoɖoae? Edɔ eƒe gbɔgbɔmevi debliboawo dometɔ ɖeka ɖo ɖe anyigba dzi. Gake menye gbɔgbɔmeviawo dometɔ ɖesiaɖe ko si dzi Yehowa ƒe asi dze ye wòdɔ o. Esi gbɔ melɔ̃a nu le kura o, si nye eƒe Tenuvi la, ye wòdɔ. (Yohanes I, 4:9, 10) Vi sia lɔ̃ faa gblẽ eƒe nɔƒe ɖi le dziƒo va afisia. (Filipitɔwo 2:7) Abe alesi míesrɔ̃e le agbalẽ sia ƒe ta si do ŋgɔ me ene la, nukunue wònye Yehowa wɔ esi wòtrɔ Vi sia ƒe agbe va de Maria ƒe vidzidɔ me. To Mawu ƒe gbɔgbɔ kɔkɔea ƒe kpekpeɖeŋu me la, wodzi Yesu wònye ame deblibo si menyi nuvɔ̃ dome o.—Luka 1:35.

11. Aleke ame ɖeka ate ŋu axe tafe ɖe ame miliɔn geɖewo tae?

¹¹ Aleke wòanya wɔ be ame ɖeka nate ŋu axe tafe ɖe ame miliɔn geɖeawo ta? Enyo, aleke wòdzɔe be ame miliɔn geɖeawo katã va zu nuvɔ̃mewo? Ðo ŋku edzi be Adam bu nu xɔasi si nye agbe deblibo esi wòwɔ nuvɔ̃. Eyata mate ŋu ana viawo nanyi blibodede ƒe dome o. Nuvɔ̃ kple ku boŋue  wògblẽ ɖi na wo. Yesu, amesi Biblia yɔ be “Adam mamlɛtɔ,” nye ame deblibo si mewɔ nuvɔ̃ aɖeke kpɔ o. (Korintotɔwo I, 15:45) Le mɔ aɖe nu la, Yesu va xɔ ɖe Adam teƒe bene wòate ŋu aɖe mí. Yesu xe fe ɖe Adam ƒe nuvɔ̃ ta esi wòtsɔ eɖokui sa vɔe, alo tsɔ eƒe agbe deblibo na eye wòɖo to Mawu bliboe. Yesu to esia wɔwɔ me na mɔkpɔkpɔ va su Adam ƒe dzidzimeviwo si.—Romatɔwo 5:19; Korintotɔwo I, 15:21, 22.

12. Nuka dzie fukpekpe siwo me Yesu to la ɖo kpee?

¹² Biblia ƒo nu tso fu siwo Yesu kpe vaseɖe ku me ŋu tsitotsito. Woƒoe vevie kple atam, woklãe ɖe ati ŋu ŋutasesẽtɔe, eye wòto vevesese heliheli me ku le fuwɔameti ŋu. (Yohanes 19:1, 16-18, 30; Megbenyawo, axa 204-6) Nukatae wòle be Yesu nakpe fu nenema gbegbe? Le agbalẽ sia ƒe ta aɖe si le ŋgɔ me la, míava kpɔe be Satana tɔ gbe Yehowa be esubɔla siwo nye amegbetɔwo dometɔ aɖeke mate ŋu ayi edzi alé nuteƒewɔwɔ me ɖe asi le nɔnɔme sesẽwo me o. Yesu na wokpɔ ŋuɖoɖo nyuitɔ kekeake na Satana ƒe gbetɔamea esi wòdo dzi nuteƒewɔwɔtɔe togbɔ be eto fukpekpe geɖe me hã. Yesu ɖo kpe edzi be ame deblibo si si tiatiawɔblɔɖe le la ate ŋu alé nuteƒewɔwɔ me ɖe asi na Mawu bliboe eɖanye nuka kee Abosam atu kplii o. Aleke gbegbe dzi anya dzɔ Yehowae nye si be ye Vi lɔlɔ̃a wɔ nuteƒe na ye!—Lododowo 27:11.

13. Aleke woxe tafe lae?

¹³ Aleke woxe tafe lae? Le Yudatɔwo ƒe ɣleti si nye Nisan ƒe ŋkeke 14 lia dzi le ƒe 33 M.Ŋ. me la, Mawu ɖe mɔ wowu Via si nye ame deblibo si ŋu nuvɔ̃ mele o. Yesu to esia me tsɔ eƒe agbe deblibo sa vɔe “zi ɖeka ɖe ɣeyiɣiawo katã nu.” (Hebritɔwo 10:10) Le Yesu ƒe ku ƒe ŋkeke etɔ̃agbe la, Yehowa fɔe ɖe tsitre wòzu gbɔgbɔmeme. Eyome Yesu tsɔ amegbetɔ ƒe agbe deblibo si wòtsɔ sa vɔe hetsɔ xe tafee ɖe Adam ƒe dzidzimeviwo ta la ƒe asixɔxɔ  yi na Mawu le dziƒo. (Hebritɔwo 9:24) Yehowa xɔ Yesu ƒe vɔsa la ƒe asixɔxɔ wònye fexexeɖeta si hiã bene woatsɔ aɖe ameƒomea tso nuvɔ̃ kple ku ƒe kluvinyenye me.—Romatɔwo 3:23, 24.

14, 15. Nukae wòle be míawɔ be ‘woatsɔ míaƒe nuvɔ̃wo ake mí’?

¹⁴ Togbɔ be míenye nuvɔ̃mewo hã la, tafea ʋu mɔ na mí be míate ŋu axɔ yayra gbagowo. Na míadzro viɖe siwo Mawu ƒe nunana gãtɔ kekeake sia ana míakpɔ fifia kple le etsɔme la dometɔ aɖewo me.

¹⁵ Míate ŋu akpɔ nuvɔ̃tsɔtsɔke. Blibomademade si ƒe dome míenyi na wòva hiãna be míaʋli vevie ŋutɔ hafi awɔ nu nyui. Mí katã míedaa vo le nuƒoƒo alo nuwɔna me. Gake to Yesu ƒe tafevɔsaa dzi la, ‘woate ŋu atsɔ míaƒe nuvɔ̃wo ake mí.’ (Kolosetɔwo 1:13, 14) Gake hafi míakpɔ tsɔtsɔke la, ehiã be míatrɔ dzime anukwaretɔe. Ehiã hã be míabɔbɔ mía ɖokui aɖe kuku na Yehowa be wòato Via ƒe tafevɔsa si dzi míexɔ se la dzi atsɔ míaƒe nuvɔ̃wo ake mí.—Yohanes I, 1:8, 9.

16. Nukae naa míete ŋu tsɔa dzitsinya nyui subɔa Mawui, eye vi kae dzitsinya nyui ƒe amesinɔnɔ ɖena?

¹⁶ Mawu abu mí be dzitsinya nyui le mía si. Dzitsinya ƒe fɔbuame ate ŋu ana wòanɔ bɔbɔe be mɔkpɔkpɔ nabu ɖe mí eye míasee le mía ɖokui me be viɖe aɖeke mele mía ŋu o. Gake to nuvɔ̃tsɔtsɔke si ƒe ɖoɖo Yehowa wɔ to tafea dzi me la, eʋu mɔ na mí lɔlɔ̃tɔe be míatsɔ dzitsinya nyui asubɔ ye togbɔ be míede blibo o hã. (Hebritɔwo 9:13, 14) Esia na wòva le bɔbɔe na mí be míaƒo nu na Yehowa faa. Eyata míate ŋu ado gbe ɖa nɛ dziɖeɖitɔe. (Hebritɔwo 4:14-16) Dzitsinya nyui si míana wòanɔ mía si la ana míakpɔ tomefafa, ana bubu nanɔ mía ŋu, eye wòana míakpɔ dzidzɔ.

17. Yayra kawo ƒe mɔnue ʋu ɖi na mí esi Yesu va ku ɖe mía ta?

 ¹⁷ Agbe mavɔ nɔnɔ le paradisonyigba dzi ƒe mɔkpɔkpɔ le mía si. Romatɔwo 6:23 gblɔ be: “Nuvɔ̃ la ƒe fetue nye ku.” Kpukpui ma ke gblɔ yi edzi be: “Ke Mawu ƒe amenuvevenunana la enye agbe mavɔ le Kristo Yesu, mía Aƒetɔ me.” Míedzro yayra siwo míakpɔ le anyigba dzi Paradiso si gbɔna me la me le agbalẽ sia ƒe Ta 3 lia me. (Nyaɖeɖefia 21:3, 4) Yayra gbogbo mawo siwo le ŋgɔ na mí, tsɔ kpe ɖe agbe mavɔ nɔnɔ le lãmesẽ deblibo me ŋu, la katã ava eme elabena Yesu ku ɖe mía ta. Gake hafi yayra mawo nasu mía si la, ehiã be míaɖee afia be míekpɔ ŋudzedze ɖe tafe ƒe nunanaa ŋu.

18. Nukata wòle be míada akpe na Yehowa ɖe tafe ƒe nunanaa ta?

¹⁸ Nukatae wòle be míada akpe geɖe na Yehowa ɖe tafea ta? Míenya be ne ame aɖe tsɔ eƒe ɣeyiɣi, ŋusẽ, alo ga geɖe sa vɔe tsɔ na nunana aɖe mí la, edzea mía ŋu vevie. Eléa dzi na mí ŋutɔ ne míekpɔe be lɔlɔ̃ vavã si le amea si na mí ye ʋãe wòtsɔ nunanaa na mí. Tafeae nye nunana si ŋu asixɔxɔ gãtɔ kekeake le, elabena nu gãtɔ kekeakee Mawu tsɔ sa vɔe  hafi nunana ma te ŋu su mía si. Yohanes 3:16 gblɔ be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena.” Tafeae nye alesi gbegbe Yehowa lɔ̃ míi la ƒe kpeɖodzi gãtɔ kekeake. Egaɖo kpe alesi gbegbe Yesu hã lɔ̃ míi dzi na mí, elabena elɔ̃ faa tsɔ eƒe agbe na ɖe mía ta. (Yohanes 15:13) Eyata ele be tafe ƒe nunanaa nana míaka ɖe edzi bliboe be Yehowa kple Via siaa lɔ̃ mía dometɔ ɖesiaɖe vevie.—Galatiatɔwo 2:20.

19, 20. Mɔ kawo dzie nàto aɖee afia be yekpɔ ŋudzedze ɖe Mawu ƒe nunana si nye tafea ŋu?

¹⁹ Ke aleke nàwɔ aɖee afia be èkpɔa ŋudzedze ɖe Mawu ƒe nunana si nye tafea ŋu? Gbã la, ele be nàsrɔ̃ nu geɖe wu tso Yehowa, amesi nye Nunala Gãtɔ ŋu. (Yohanes 17:3) Biblia-nusɔsrɔ̃ si nàwɔ to agbalẽ sia dzi la ana nàsrɔ̃ nu geɖe tso eyama ŋu. Ne wò sidzedze Yehowa le dzidzim ɖe edzi la, ekema lɔlɔ̃ si le asiwò na eyama hã ade to ɖe edzi wu. Azɔ lɔlɔ̃ ma aʋã wò nàdi be yeawɔ nusi dzea eŋu.—Yohanes I, 5:3.

²⁰ Ðe Yesu ƒe tafevɔsaa dzixɔxɔse fia. Wogblɔ le Yesu ŋu be: “Amesi xɔa Via dzi sena la, agbe mavɔ le esi.” (Yohanes 3:36) Aleke míawɔ aɖee afia be míexɔ Yesu dzi se? Menye egbɔgblɔ kple nu be míexɔ edzi se koe nye nyaa o. Yakobo 2:26 gblɔ be: “Xɔse dɔwɔwɔ manɔŋui . . . nye nu kuku.” Nyateƒee, “dɔwɔwɔ,” si nye míaƒe nuwɔnawo, dzie míato aɖo kpe edzi vavã be xɔse le mía si. Mɔ siwo dzi míato aɖee afia be míexɔ Yesu dzi se dometɔ ɖekae nye be míawɔ nusianu si míate ŋui asrɔ̃ eyama, menye le nuƒoƒo me ko o ke le míaƒe nuwɔnawo hã me.—Yohanes 13:15.

21, 22. (a) Nukata wòle be míade Aƒetɔ ƒe Fiẽnuɖuɖu ƒe azã la ɖuƒe ƒe sia ƒe? (b) Nuka mee woaɖe le Ta 6 lia kple 7 lia me?

²¹ De Aƒetɔ ƒe Fiẽnuɖuɖu ƒe azã si woɖuna ƒe sia ƒe la. Le Nisan 14, ƒe 33 M.Ŋ. ƒe fiẽ me la, Yesu ɖo azã tɔxɛ aɖe anyi si Biblia yɔ be ‘Aƒetɔ ƒe Fiẽnuɖuɖu la.’ (Korintotɔwo I, 11: 20; Mateo 26:26-28) Wogayɔa azã sia be Kristo ƒe ku ƒe Ŋkuɖodzizã. Yesu ɖo azã sia anyi be wòakpe ɖe eƒe apostolowo kple Kristotɔ vavã siwo katã ava ɖe wo yome ŋu be woaɖo ŋku edzi be to yeƒe ku abe ame deblibo ene dzi la, yetsɔ yeƒe luʋɔ, alo agbe, na tafee ɖe wo ta. Yesu de se ku ɖe azã sia ŋu be: “Minɔ esia wɔwɔ dzi hena ŋkuɖoɖo dzinye.” (Luka 22:19, NW) Ŋkuɖodzizã la ɖuɖu ɖoa ŋku lɔlɔ̃ gã si Yehowa kple Yesu ɖe fia le tafea tsɔtsɔna me dzi na mí. Míate ŋu aɖee afia be míekpɔa ŋudzedze ɖe tafea ŋu ne míedea Yesu ƒe ku ƒe Ŋkuɖodzia ƒe sia ƒe. *

²² Nyateƒee wònye be tafe si Yehowa tsɔ na mí la nye nunana si xɔ asi ale gbegbe. (Korintotɔwo II, 9:14, 15) Nunana vevi sia ate ŋu aɖe vi na amesiwo ku la kura gɔ̃ hã. Ta 6 lia kple 7 lia aɖe alesi wòaɖe vi na woe me.