1. Ame kae dze agblɔ mɔ nyuitɔ si dzi míato asubɔ Mawu la na mí?

SUBƆSUBƆHA akpa gãtɔ gblɔna be yewofiaa nyateƒe si ku ɖe Mawu ŋu. Gake esia mate ŋu anye nyateƒe o, elabena nu siwo subɔsubɔhawo fiana ku ɖe ame si ƒomevi Mawu nye kple ale si wòle be míasubɔe ŋu toa vovo tso wo nɔewo tɔ gbɔ. Aleke míawɔ anya mɔ nyuitɔ si dzi míato asubɔ Mawu? Yehowa ɖeka koe dze agblɔ ale si míasubɔe la na mí.

2. Aleke nàwɔ anya mɔ nyuitɔ si dzi nàto asubɔ Mawu?

² Yehowa tsɔ Biblia na mí ale be míanya mɔ nyuitɔ si dzi míato asubɔe. Eya ta srɔ̃ Biblia la, eye Yehowa akpe ɖe ŋuwò eƒe nufiafiawo naɖe vi na wò, elabe etsɔ ɖe le eme na wò vevie.—Yesaya 48:17.

3. Nu kae Mawu di be míawɔ?

³ Ame aɖewo gblɔna be subɔsubɔhawo katã dzea Mawu ŋu, gake menye nu siae Yesu fia o. Egblɔ be: “Menye ame sia ame si le gbɔgblɔm nam be, ‘Aƒetɔ, Aƒetɔ,’ ye ayi ɖe Dziƒofiaɖuƒe la me o, negbe ame si le Fofonye si le dziƒowo ƒe lɔlɔ̃nu wɔm la koe.” Eya ta ehiã vevie be míanya nu si nye Mawu ƒe lɔlɔ̃nu eye míawɔe. Nya sia le vevie ŋutɔ, elabe Yesu tsɔ ame siwo meɖoa to Mawu o la sɔ kple nu vlo wɔlawo kple “sedzimawɔlawo.”—Mateo 7:21-23.

4. Nya kae Yesu gblɔ tso Mawu ƒe lɔlɔ̃nu wɔwɔ ŋu?

⁴ Yesu xlɔ̃ nu mí be ne míedi be míawɔ Mawu ƒe lɔlɔ̃nu  la, nɔnɔme sesẽwo ava mía dzi. Egblɔ be: “Mito agbo xaxɛ la nu yi ɖe eme, elabena agbo la keke eye mɔ si kplɔa ame yia tsɔtsrɔ̃ me la le gbadza, eye ame geɖewoe toa enu yina; ke agbo la le xaxɛe eye mɔ la hã xaxa, si kplɔa ame yia agbe me, eye ame ʋɛ aɖewo koe kpɔnɛ.” (Mateo 7:13, 14) Mɔ xaxa alo Mawu subɔsubɔ le mɔ nyuitɔ nu kplɔa ame yia agbe mavɔ me. Mɔ gbadza alo Mawu subɔsubɔ le mɔ si mesɔ o nu kplɔa ame yia ku me. Gake Yehowa medi be ame aɖeke naku o. Ena mɔnukpɔkpɔ ame sia ame be wòasrɔ̃ nu tso ye ŋu.—2 Petro 3:9.

5. Aleke nàwɔ akpɔ ame siwo le Mawu subɔm le mɔ nyuitɔ nu la adze sii?

⁵ Yesu gblɔ be míate ŋu akpɔ ame siwo le Mawu subɔm le mɔ nyuitɔ nu adze sii. Míewɔa esia to ŋkuléle ɖe woƒe dzixɔsewo kple woƒe agbenɔnɔ ŋu me. Yesu gblɔ be: “Woƒe kutsetsewoe miatsɔ adze si woe.” Eye wògblɔ kpee be: “Ati nyui sia ati nyui tsea ku nyui.” (Mateo 7:16, 17) Esia mefia be ame siwo subɔa Mawu la de blibo o. Gake Mawu subɔlawo dzea agbagba be yewoawɔ nu si sɔ ɣesiaɣi. Azɔ na míakpɔ nu siwo akpe ɖe mía ŋu míakpɔ ame siwo le Mawu subɔm le mɔ nyuitɔ nu la adze sii la ɖa.

6, 7. Nu ka tae subɔsubɔha vavã me tɔwo tua woƒe nufiafiawo ɖe Biblia dzi? Nu kae míesrɔ̃ tso kpɔɖeŋu si Yesu ɖo la me?

⁶ Ele be míatu míaƒe nufiafiawo ɖe Biblia dzi. Biblia gblɔ be: “Ŋɔŋlɔ blibo la tso Mawu ƒe gbɔgbɔ me, eye wònyo na nufiafia, na mokaka, na ɖɔɖɔɖo, na amehehe le dzɔdzɔenyenye me, ale be Mawu ƒe ame la nadze bliboe, eye wòanɔ dzadzraɖoɖi keŋkeŋ na dɔ  nyui sia dɔ nyui wɔwɔ.” (2 Timoteo 3:16, 17) Apostolo Paulo ŋlɔ ɖo ɖe Kristotɔwo be: “Esi miexɔ Mawu ƒe nya, si miese tso mía gbɔ la, miexɔe abe amegbetɔwo ƒe nya ene o, ke boŋ abe Mawu ƒe nya ene.” (1 Tesalonikatɔwo 2:13) Mawu ƒe Nya, Biblia, la dzi koe wotua subɔsubɔ vavã ƒe nufiafiawo ɖo, ke menye amegbetɔwo ƒe susuwo, kɔnyinyiwo alo nu bubu aɖeke dzi o.

⁷ Yesu tu nu siwo katã wòfia la ɖe Mawu ƒe Nyaa dzi. (Xlẽ Yohanes 17:17.) Eyɔ nya tso Ŋɔŋlɔawo me zi geɖe. (Mateo 4:4, 7, 10) Mawu subɔla vavãwo srɔ̃a Yesu ƒe kpɔɖeŋu eye wotua woƒe nufiafiawo katã ɖe Biblia dzi.

8. Nu kae Yesu fia mí tso Yehowa subɔsubɔ ŋu?

⁸ Yehowa ɖeka koe wòle be míasubɔ. Psalmo 83:18 gblɔ be: “Wò, ame si ŋkɔe nye Yehowa la, Wò ɖeɖe koe nye Dziƒoʋĩtɔ ɖe anyigba blibo la dzi.” Yesu di be amewo nanya ame si tututu Mawu vavã la nye, eye wòfia Mawu ƒe ŋkɔa wo. (Xlẽ Yohanes 17:6.) Yesu gblɔ be: “Yehowa wò Mawue nàde ta agu na, eye eya ɖeka koe nàsubɔ.” (Mateo 4:10) Eya ta mí Mawu subɔlawo míesrɔ̃a Yesu ƒe kpɔɖeŋu. Míesubɔa Yehowa ɖeka ko, míezãa eƒe ŋkɔa, míefiaa eƒe ŋkɔa amewo eye míegblɔa nu siwo Mawu ava wɔ na mí la na wo.

9, 10. Aleke míeɖenɛ fiana be míelɔ̃ mía nɔewo?

⁹ Ele be lɔlɔ̃ akuakua nanɔ mía si na amewo. Yesu fia eƒe nusrɔ̃lawo be woalɔ̃ wo nɔewo. (Xlẽ Yohanes 13:35.) Ele be lɔlɔ̃ si le mía si na mía nɔewo nana míawɔ ɖeka abe dadaviwo ene eɖanye dukɔ ka mee míetso alo aleke kee míaƒe dekɔnu ɖale o, míeɖanye gatɔwo alo ame dahewo o. (Kolosetɔwo 3:14) Eya ta míeyia aʋa ɖawua amewo o. Biblia gblɔ be: “Esia mee Mawu ƒe viwo kple Abosam ƒe viwo dze ƒãa le: Ame sia ame si  mewɔa nu dzɔdzɔe o la metso Mawu me o, nenema kee nye ame si melɔ̃a nɔvia o hã.” Egblɔ kpee be: “Míalɔ̃ mía nɔewo; menye abe Kain, ame si dzɔ tso vɔ̃ɖitɔ la me, eye wòwu nɔvia ene o.”—1 Yohanes 3:10-12; 4:20, 21.

¹⁰ Míezãa míaƒe ɣeyiɣi, ŋusẽ kple nunɔamesiwo tsɔ kpena ɖe mía nɔewo ŋu eye míedea dzi ƒo na mía nɔewo. (Hebritɔwo 10:24, 25) Míewɔa “nyui na amewo katã.”—Galatiatɔwo 6:10.

11. Nu ka tae míexɔe se be Yesu dzi ko míato akpɔ xɔxɔ?

¹¹ Ehiã be míaɖo to Yesu, elabe eya dzie míato ayi Mawu gbɔ. Biblia gblɔ be: “Xɔxɔ la megale ame bubu aɖeke me o, elabena ŋkɔ bubu aɖeke mele dziƒoa te, si wona amegbetɔwo, si dzi míato akpɔ xɔxɔ o.” (Dɔwɔwɔwo 4:12) Míesrɔ̃e le agbalẽ sia ƒe Ta 5 lia me be Yehowa dɔ Yesu ɖo ɖe anyigba dzi wòva tsɔ eƒe agbe xe tafe ɖe amegbetɔ toɖolawo ta. (Mateo 20:28) Yehowa tia Yesu be wòaɖu fia ɖe anyigba la dzi. Eya tae Biblia gblɔ na mí be ele be míaɖo to Yesu ne míedi be míanɔ agbe tegbee.—Xlẽ Yohanes 3:36.

12. Nu ka tae míedea nu dunyahehe me o?

¹² Mele be míade nu dunyahehe me o. Yesu mede nu dunyahehe me o. Esi wonɔ ʋɔnu drɔ̃mee la, egblɔ na Roma-dziɖula Pilato be: “Nye Fiaɖuƒe menye xexe sia ƒe akpa aɖeke o.” (Xlẽ Yohanes 18:36.) Abe ale si Yesu wɔe ene la, míewɔa nuteƒe na Mawu ƒe Fiaɖuƒe si le dziƒo la, eya ta afi ka kee míeɖale o, míedea nu dunyahehe me o. Ke hã, Biblia bia tso mía si be míaɖo to “ŋusẽtɔwo,” si fia dziɖuɖuwo. (Romatɔwo 13:1) Míewɔna ɖe dukɔ si me míele la ƒe sewo dzi. Gake ne dukɔa ƒe se tsi tsitre ɖe Mawu ƒe sewo ŋu la, míewɔna abe ale  si apostoloawo wɔ ene, ame siwo gblɔ be: “Ele be míaɖo to Mawu abe dziɖula ene wu amewo.”—Dɔwɔwɔwo 5:29; Marko 12:17.

13. Nu ka tae míeɖea gbeƒã tso Mawu ƒe Fiaɖuƒea ŋu?

¹³ Míexɔe se be Mawu ƒe Fiaɖuƒea koe ava kpɔ xexe sia me kuxiwo gbɔ. Yesu gblɔ be “woaɖe gbeƒã Fiaɖuƒe ŋuti nya nyui” la le xexe blibo la me. (Xlẽ Mateo 24:14.) Amegbetɔ ƒe dziɖuɖu aɖeke mate ŋu awɔ nu si Mawu ƒe Fiaɖuƒea le wɔwɔ ge na mí la o. (Psalmo 146:3) Yesu fia mí be míado gbe ɖa abia be Mawu ƒe Fiaɖuƒea nava esi wògblɔ be: “Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.” (Mateo 6:10) Biblia na míenya be Mawu ƒe Fiaɖuƒea ava ɖe amegbetɔwo ƒe dziɖuɖuwo katã ɖa eye “eya ɖeɖe anɔ anyi tegbee.”—Daniel 2:44.

14. Ame kawoe nèxɔe se be wosubɔa Mawu le mɔ nyuitɔ nu?

¹⁴ Esi nèsrɔ̃ nu siawo vɔ la, bia ɖokuiwò be: ‘Ame kawoe tua woƒe nufiafiawo ɖe Biblia dzi? Ame kawoe fiaa Mawu ƒe ŋkɔ amewo? Ame kawoe lɔ̃a wo nɔewo vevie eye woxɔe se be Mawu dɔ Yesu ɖa be wòava ɖe mí? Ame kawoe medea nu dunyahehe me o? Ame kawoe ɖea gbeƒã be Mawu ƒe Fiaɖuƒea koe ava kpɔ míaƒe kuxiwo gbɔ?’ Yehowa Ðasefowo koe.—Yesaya 43:10-12.

15. Nu kae wòle be míawɔ ne míedi be Mawu nakpɔ ŋudzedze ɖe míaƒe subɔsubɔ ŋu?

¹⁵ Exɔxɔ se be Mawu li ɖeɖe mesɔ gbɔ o. Gbɔgbɔ vɔ̃wo gɔ̃ hã xɔe se be Mawu li, gake womeɖoa toe o. (Yakobo 2:19) Ne míedi be Mawu nakpɔ ŋudzedze ɖe míaƒe subɔsubɔ ŋu la, ele be míaxɔe ase be eli, eye ele be míawɔ nu siwo wògblɔ na mí hã.

16. Nu ka tae wòle be míatsri alakpasubɔsubɔhawo?

 ¹⁶ Ne míedi be míaƒe subɔsubɔ nadze Mawu ŋu la, ele be míatsri alakpasubɔsubɔ. Nyagblɔɖila Yesaya gblɔ be: “Mido go le eme, miwɔ mia ɖokui kɔkɔe.” (Yesaya 52:11; 2 Korintotɔwo 6:17) Eya tae wòle be míatsri nu sia nu si do ka kple alakpasubɔsubɔhawo.

17, 18. Nu kae nye “Babilon Gã” la, eye nu ka tae wòhiã kpata be nàdo le eme?

¹⁷ Nu kae nye alakpasubɔsubɔ? Elɔ subɔsubɔha siwo katã fiaa nu be míasubɔ Mawu le mɔ si mewɔ ɖeka kple eƒe Nya la nu o la ɖe eme. Biblia yɔ alakpasubɔsubɔhawo katã be “Babilon Gã.” (Nyaɖeɖefia 17:5) Nu ka tae? Le Noa ƒe ŋkekea me Tsiɖɔɖɔa megbe la, wote alakpanuwo fiafia le mawusubɔsubɔ me le du si woyɔna be Babilon me. Alakpanufiafia mawo tso afi ma kaka ɖe xexea me. Le kpɔɖeŋu me, Babilontɔwo subɔa mawu-etɔ̃-ƒokpli hamehamewo. Egbea la, subɔsubɔha geɖe fiaa nu be Trinita alo Mawuɖekaetɔ̃ ye Mawu nye, evɔ Biblia ya fia nu eme kɔ ƒãa be Mawu vavã ɖeka koe li, eyae nye Yehowa, eye viae Yesu nye. (Yohanes 17:3) Babilontɔwo xɔe se hã be ne ame ku la, eƒe akpa aɖe yia edzi nɔa agbe, eye wogblɔna be wowɔa funyafunya amea ƒe akpa ma le dzo mavɔ me. Esia menye nyateƒe o.—Kpɔ Dzesidenya 14, 17 kple 18.

¹⁸ Mawu gblɔe ɖi be eteƒe madidi o yeatsrɔ̃ alakpasubɔsubɔhawo katã. (Nyaɖeɖefia 18:8) Èkpɔ nu si tae wòhiã kpata be nàdo le alakpasubɔsubɔha mea? Yehowa Mawu di be nàwɔ esia hafi wòava tsi megbe akpa.—Nyaɖeɖefia 18:4.

19. Ne ètiae be yeasubɔ Yehowa la, aleke wòalé be na wòe?

¹⁹ Ne ètso nya me be yeado le alakpasubɔsubɔhawo  me ahasubɔ Yehowa la, xɔ̃wòwo alo ƒowòmetɔ aɖewo mase egɔme na wò o, eye woate ŋu aɖe fu na wò gɔ̃ hã. Gake Yehowa magblẽ wò ɖi o. Àva zu xexea me katã ƒe ƒome si me ame miliɔn geɖewo le la me tɔ, ƒome sia me tɔwo lɔ̃a wo nɔewo vevie, eye agbe mavɔ nɔnɔ le Mawu ƒe xexe yeyea me ƒe mɔkpɔkpɔ hã asu asiwò. (Marko 10:28-30) Ðewohĩ xɔ̃wòwo alo ƒowòmetɔ siwo tsi tsitre ɖe ale si nètso nya me be yeasubɔ Yehowa ŋu la dometɔ aɖewo gɔ̃ hã ate ŋu ava tiae be yewoasrɔ̃ Biblia.

20. Nu ka tae wòle vevie be nàsubɔ Mawu le mɔ nyuitɔ nu?

²⁰ Eteƒe madidi o, Mawu aɖe vɔ̃ɖinyenyewo katã ɖa eye eƒe Fiaɖuƒea aɖu anyigba blibo la dzi. (2 Petro 3:9, 13) Esia anye ɣeyiɣi dodzidzɔname aɖe ŋutɔ! Ɣemaɣi la, ame sia ame asubɔ Yehowa abe ale si Yehowa dii ene. Eya ta ele vevie be nàɖoe fifia be yeasubɔ Yehowa le mɔ nyuitɔ nu.