Ɣekaɣie wòle be Kristotɔ nyɔnu natsyɔ nu ta le tadedeaguwɔnawo me, eye nu ka tae? Mina míadzro nu si gbɔgbɔ ʋã apostolo Paulo wògblɔ tso nya sia ŋu me. Ena mɔfiame siwo míehiã bene míawɔ nyametsotso nyui siwo ade bubu Mawu ŋu la mí. (1 Korintotɔwo 11:3-16) Nu etɔ̃ dze le Paulo ƒe nyawo me, siwo ŋu wòle be míade ŋugble le: (1) wɔna siwo me wòahiã le be nyɔnu nabla ta, (2) nɔnɔme siwo abia be wòabla ta, kple (3) susu siwo ta wòle be wòawɔ ɖe mɔfiame sia dzi.

Wɔnaawo. Paulo yɔ wɔna eve: gbedodoɖa kple nyagbɔgblɔɖi. (Kpukpui 4, 5) Míenya nyuie be gbedodoɖa nye nuƒoƒo na Yehowa bubutɔe. Egbea la, míate ŋu atsɔ nyagbɔgblɔɖi asɔ kple nufiafia ɖe sia ɖe si Kristotɔ subɔla aɖe tu ɖe Biblia dzi. Ke ɖe Paulo nɔ gbɔgblɔm be ɣesiaɣi si nyɔnu le gbe dom ɖa alo le Biblia me nyateƒea fiam ko la, wòatsyɔ nu ta? Ao. Nɔnɔme si me nyɔnu aɖe le gbe dom ɖa le alo le nu fiam le dzie wòanɔ te ɖo.

Nɔnɔmeawo. Paulo ƒe nyawo ku ɖe ale si woawɔ nu le ƒomea kple hamea me ŋu. Egblɔ be: “Nyɔnu . . . ƒe tae nye ŋutsu; . . . nyɔnu sia nyɔnu, si metsyɔa nu ta hafi doa gbe ɖa alo gblɔa nya ɖi o la, doa ŋukpe eƒe ta.” (Kpukpui 3, 5) Le ƒome ƒe ɖoɖoa nu la, srɔ̃ŋutsue Yehowa tia be wòanye nyɔnua ƒe ta. Ne nyɔnu le  dɔdeasi siwo Yehowa tsɔ na srɔ̃ŋutsua wɔm eye meɖe ɖokuibɔbɔ ɖe ŋutsua ƒe tanyenye te fia o la, ke edo ŋukpe srɔ̃aŋutsua. Le kpɔɖeŋu me, ne ehiã be wòawɔ Biblia nusɔsrɔ̃ kple ame aɖe esime srɔ̃aŋutsu le teƒea la, abla ta atsɔ aɖe ɖokuibɔbɔ ɖe ŋutsua ƒe tanyenye te afia. Awɔ esia ne ŋutsua xɔ nyɔnyrɔ alo mexɔ nyɔnyrɔ o, elabena eyae nye ƒomea ƒe ta. * Azɔ hã, ne ele gbe dom ɖa alo le nu fiam esime viaŋutsuvi si xɔ nyɔnyrɔ le teƒea la, abla ta, eye esia mefia be ŋutsuvia ye nye ƒomea ƒe ta o, ke boŋ le ɖoƒe si wona ŋutsu xɔnyɔnyrɔwo le Kristo hamea me ta.

Paulo ƒo nu tso nɔnɔme si ku ɖe hamea ŋu la ŋu esi wògblɔ be: “Ne ame aɖe le nya hem be ɖoɖo bubu aɖe li le nya sia ŋu la, bubu aɖeke mele mía si o, eye ɖeke mele Mawu ƒe hameawo hã si o.” (Kpukpui 16) Le Kristo hamea me la, ŋutsu xɔnyɔnyrɔwo sie tanyenye ƒe ɖoƒea le. (1 Timoteo 2:11-14; Hebritɔwo 13:17) Ŋutsuwo koe wotiana be woanye hamemetsitsiwo kple subɔsubɔdɔwɔlawo, eye woawoe Mawu de dɔ asi na be woalé be na yeƒe alẽha la. (Dɔwɔwɔwo 20:28) Gake ɣeaɖewoɣi la, nɔnɔme aɖewo doa mo ɖa, si ta wòahiã be Kristotɔ nyɔnu xɔnyɔnyrɔ nawɔ dɔ si wòle be nɔviŋutsu xɔnyɔnyrɔ si dze nawɔ hafi. Le kpɔɖeŋu me, ate ŋu ahiã be wòakpɔ kpekpe hena gbeadziyiyi dzi le esi nɔviŋutsu xɔnyɔnyrɔ si dze aɖeke meli o alo ɖeke meva kpekpea o ta. Alo ate ŋu akpɔ aƒe me Biblia nusɔsrɔ̃ si wòwɔna edziedzi la dzi esime nɔviŋutsu xɔnyɔnyrɔ aɖe le eteƒe. * Esi dɔ siawo nye Kristo hamea ƒe dɔwo ƒe kekeɖenu ta la, nɔvinyɔnua abla ta atsɔ afia be dɔ si wòle be ŋutsu nawɔ hafi wɔm yele.

Gake subɔsubɔdɔa ƒe akpa bubu geɖewo li siwo mahiã be nɔvinyɔnu natsyɔ nu ta hafi awɔe o. Le kpɔɖeŋu me, mehiã be wòabla ta le nɔnɔme siwo gbɔna me o: Ne ele nya ŋu ɖom le Kristotɔwo ƒe kpekpewo me, ne woa kple srɔ̃a alo nɔviŋutsu  xɔnyɔnyrɔ bubu aɖe le gbeƒã ɖem tso aƒe me yi aƒe me, alo ne ele nu srɔ̃m alo le gbe dom ɖa kple via maxɔnyɔnyrɔ esime srɔ̃a mele teƒea o. Gake biabia bubuwo agate ŋu afɔ ɖe te, eye ne nɔvinyɔnu aɖe menya nu si wòawɔ o la, ate ŋu awɔ numekuku bubuwo. * Le ema megbe ne meka ɖe nu si wòawɔ dzi o, eye eƒe dzitsinya ʋãe be wòabla ta la, naneke megblẽ le eŋu o, ate ŋu awɔe abe ale si wòdze le foto si le afi sia me ene.

Susuawo. Míekpɔ susu eve siwo ta Kristotɔ nyɔnu adi be yeawɔ ɖe nudidi sia dzi la le kpukpui 10 lia me: “[Ele] be ŋusẽ ƒe dzesi nanɔ ta na nyɔnu, le mawudɔlawo ta.” Gbã la, de dzesi nya si nye “ŋusẽ ƒe dzesi.” Nu tsyɔtsyɔ ta nye mɔ si dzi nyɔnu tona ɖenɛ fiana be yelɔ̃ ɖe ŋusẽ si Yehowa na ŋutsu xɔnyɔnyrɔ siwo le hamea me la dzi. Eya ta etoa esia dzi ɖea eƒe lɔlɔ̃ kple nuteƒewɔwɔ na Yehowa Mawu fiana. Susu evelia dze le nya si nye “le mawudɔlawo ta” me. Dɔ kae nyɔnu ƒe nu tsyɔtsyɔ ta wɔna ɖe Mawu ƒe gbɔgbɔmevi sẽŋu mawo dzi?

Mawudɔlawo dina vevie be yewoakpɔe be Yehowa subɔlawo katã bɔbɔ wo ɖokui ɖe eƒe ŋusẽ te le eƒe habɔbɔa me, le dziƒo kple anyigba dzi siaa. Ðokuibɔbɔ ƒe kpɔɖeŋu si amegbetɔ madeblibowo ɖona hã ɖea vi na wo. Nu si tae nye be, ele be woawo hã nabɔbɔ wo ɖokui ɖe Yehowa ƒe ɖoɖowo te—eye esia nye dodokpɔ aɖe si me mawudɔla geɖe do kpo nu le le blema. (Yuda 6) Ete ŋu dzɔna egbea be nuteƒekpɔkpɔ geɖe su Kristotɔ nyɔnu aɖe si, enya nu, eye eƒe tagbɔ ɖa wu nɔviŋutsu xɔnyɔnyrɔ aɖe si le hamea me, gake nɔvinyɔnua lɔ̃na faa bɔbɔa eɖokui ɖe nɔviŋutsu ma ƒe ŋusẽ te—eye mawudɔlawo kpɔa esia teƒe. Le go aɖewo me la, nɔvinyɔnua te ŋu nyea Kristotɔ amesiamina, ame si ava zu Kristo ƒe hadomenyilawo dometɔ  ɖeka. Mɔnukpɔkpɔ ava su nɔvinyɔnu ma si be wòasubɔ le ɖoƒe si kɔ wu mawudɔlawo tɔ gɔ̃ hã, eye wòaɖu fia kple Kristo le dziƒo. Ðokuibɔbɔ ƒe kpɔɖeŋu nyui kae nye esi nɔvinyɔnu ma nye na mawudɔla siwo le ekpɔm egbea! Mɔnukpɔkpɔ gã ka gbegbee nye esi su nɔvinyɔnuwo katã si be woaɖee afia be yewonye toɖolawo to woƒe agbenɔnɔ si me ɖokuibɔbɔ kple nuteƒewɔwɔ dzena le le mawudɔla miliɔn geɖewo ŋkume!