1 Petro 2:1-25
2 Eya ta miɖe vɔ̃ɖinyenye katã, kple beble ɖe sia ɖe, kple alakpanuwɔwɔ, kple ŋubiabiã kpakple ameŋugbegblẽ ɖe sia ɖe ƒomevi ɖa,
2 eye abe vidzĩwo ene la, mina nya la ƒe notsi si wometsɔ naneke tsakae o la nadzro mi vevie, bene miato edzi atsi hena xɔxɔ,
3 ne mieɖɔe kpɔ hekpɔ be Aƒetɔ la ƒe dɔme nyo.
4 Esi mieva egbɔ abe ale si miava kpe gbagbe gbɔ ene, kpe si amewo gbe, gake wòhenye kpe tiatia xɔasi le Mawu ya gbɔ la,
5 mia ŋutɔwo hã, abe kpe gbagbewo ene la, wotsɔ mi le gbɔgbɔmexɔ aɖe tum hena nunɔlanyenye kɔkɔe, be miato Yesu Kristo dzi asa gbɔgbɔmevɔ siwo dzea Mawu ŋu.
6 Elabena ele Ŋɔŋlɔ la me be: “Kpɔ ɖa! Mele kpe aɖe ɖom anyi le Zion, kpe tiatia si nye dzogoedzikpe, si xɔ asi; eye ame si ɖenɛ fiana be yexɔ eyama dzi se la maɖu ŋukpe gbeɖe o.”
7 Eya ta miawoe wònye ame vevi na, elabena mienye xɔsetɔwo; gake le ame siwo mexɔna sena o gome la, “kpe ma tututu si xɔtulawo gbe la va zu dzogoedzikpe vevitɔ,”
8 kpakple “kpe si ana woakli nu kple agakpe si ana woadze anyi.” Ame siawo klia nu, elabena womeɖoa to nya la o. Nuwuwu sia tututue woɖo ɖi na wo.
9 Gake miawo ya mienye “dzidzime tiatia, nunɔla siwo nye fiawo, dukɔ kɔkɔe, ame siwo nye Mawu tɔ koŋ, bene miaɖe gbeƒã” ame si yɔ mi tso viviti me va eƒe kekeli wɔnukua me la “ƒe nɔnɔme nyuiwo.”
10 Elabena mienye dukɔ tsã o, gake azɔ la, mienye Mawu ƒe dukɔ; mienye ame siwo womekpɔ nublanui na tsã o, gake azɔ la, miezu ame siwo wokpɔ nublanui na.
11 Lɔlɔ̃tɔwo, mele nu xlɔ̃m mi abe amedzrowo kple ame siwo li hena ɣeyiɣi kpui aɖe la ene, be miayi edzi atsri ŋutilã ƒe nudzodzrowo; nu siawo tututue le avu wɔm kple luʋɔ la.
12 Mina miaƒe agbenɔnɔ nanyo le dukɔwo dome, bene le nu si me wole nu ƒom tsi tsitre ɖe mia ŋu abe vɔ̃ wɔlawo ene le me la, le miaƒe dɔ nyui siwo teƒe wokpɔ ŋuti la, woado Mawu ɖe dzi le kpɔkpɔɖaŋkeke la dzi.
13 Mibɔbɔ mia ɖokui ɖe nu sia nu si amegbetɔwo ɖo anyi la te le Aƒetɔ la ta: eɖanye fia si le ɖoƒe kɔkɔ,
14 alo nutomefia siwo wòdɔna be woahe to na nu vɔ̃ wɔlawo gake woakafu nu nyui wɔlawo, la o.
15 Elabena nenemae nye Mawu ƒe lɔlɔ̃nu, be miatsɔ nu nyui wɔwɔ atsi ame mabutamewo ƒe nuƒoƒo numanyamanyatɔe la nu abe ɖe miebla nu na wo ene.
16 Minɔ abe ablɔɖemewo ene, ke hã menye be miatsɔ miaƒe ablɔɖe la atsyɔ nu vɔ̃ɖi wɔwɔ dzi o, ke boŋ abe Mawu ƒe kluviwo ene.
17 Mibu ame ɖe sia ɖe ƒomevi, milɔ̃ nɔviwo ƒe habɔbɔ blibo la katã, mivɔ̃ Mawu, mibu fia la.
18 Aƒemesubɔviwo nabɔbɔ wo ɖokuiwo na woƒe aƒetɔwo le vɔvɔ̃ si wodze na la katã me, menye na wo dometɔ siwo nye ame nyuiwo kple nugɔmeselawo ko o, ke na esiwo ŋu nu medzena o hã.
19 Elabena ne, le dzitsinya nyui ƒe ame si nɔnɔ le Mawu gbɔ ta, ame aɖe doa dzi le xaxawo me, eye wòkpea fu madzemadzee la, esia dzea Mawu ŋu.
20 Elabena ne miewɔa nu vɔ̃, si ta woƒoa mi ɖo, eye miedoa dzi tsɔnɛ ɖe, kafukafu kae wònye na mi? Gake ne miekpea fu le nu nyui wɔwɔ ta, eye miedoa dzi tsɔnɛ la, Mawu kpɔa dzidzɔ ɖe esia ŋu.
21 Le nyateƒe me la, agbenɔnɔmɔ sia tae woyɔ mi ɖo, elabena Kristo ŋutɔ kura gɔ̃ hã kpe fu le mia ta, eye wògblẽ kpɔɖeŋu ɖi na mi, be miadze yeƒe afɔɖoƒewo yome pɛpɛpɛ.
22 Mewɔ nu vɔ̃ aɖeke o, eye womekpɔ beble le eƒe nu me hã o.
23 Esi wonɔ edzum la, medzu ame ɖe eteƒe o. Esi wònɔ fu kpem la, medo ŋɔdzi na ame o, ke boŋ eyi edzi tsɔ eɖokui de asi na ame si drɔ̃a ʋɔnu dzɔdzɔe la.
24 Eya ŋutɔ tsɔ míaƒe nu vɔ̃wo ɖo eƒe ŋutilã dzi le ati la ŋu, bene míadzudzɔ nu vɔ̃ wɔwɔ, eye míanɔ agbe le dzɔdzɔenyenye me. Eye “wotsɔ eƒe abiwo yɔ dɔ mi.”
25 Elabena mienɔ abe alẽwo ene, nɔ mɔ tram; gake azɔ la, mietrɔ va miaƒe luʋɔwo ƒe kplɔla kple dzikpɔla la gbɔ.
