1 Petro 3:1-22
3 Nenema kee mi srɔ̃nyɔnuwo hã, mibɔbɔ mia ɖokui na mia ŋutɔwo mia srɔ̃wo, ale be ne wo dometɔ aɖewo meɖoa to nya la o la, wo srɔ̃wo ƒe agbenɔnɔ nya aɖeke magblɔmagblɔe naɖe wo,
2 esi wokpɔa miaƒe agbenɔnɔ dzadzɛ kple bubu deto la ta.
3 Eye migana miaƒe atsyɔ̃ɖoɖo nanye gotagome tɔ, to ɖaƒoƒo kple sikanuwo alo awudziwuiwo dodo me o,
4 ke boŋ mina wòanye dzi me ƒe ame ɣaɣla le gbɔgbɔ fatu si nɔa anyi kpoo le atsyɔ̃ɖoɖo si megblẽna o me, si ŋu asixɔxɔ gã le le Mawu ŋkume.
5 Elabena nenema kee nyɔnu kɔkɔe siwo nɔ anyi le blema, siwo nɔ mɔ kpɔm na Mawu la, ɖoa atsyɔ̃e, eye wobɔbɔa wo ɖokuiwo na woawo ŋutɔwo srɔ̃wo,
6 abe ale si Sara ɖoa to Abraham ene, heyɔnɛ be “aƒetɔ.” Eye ne mieyia edzi wɔa nu nyui, eye mievɔ̃a ŋɔdzidodo aɖeke o la, ekema miezu viawo.
7 Nenema kee mi srɔ̃ŋutsuwo hã, miyi edzi mianɔ anyi kple nyɔnuwo le sidzedze me, eye mide asixɔxɔ wo ŋu abe nugoe si ate ŋu agbã bɔbɔe wu ene, elabena miawo hã mienye domenyilawo kpli wo le agbe ƒe amenuveve la me, bene naneke nagaxe mɔ na miaƒe gbedodoɖawo o.
8 Mlɔeba la, mina mi katã miaƒe susu nanɔ ɖeka, mise veve ɖe ame nu, milɔ̃ mia nɔewo abe nɔviwo ene, miaƒe dɔme natrɔ ɖe ame ŋu, mibɔbɔ mia ɖokui le dzi me,
9 migaɖo vɔ̃ vɔ̃ teƒe alo dzudzu dzudzu teƒe o; miyra boŋ, elabena agbenɔnɔmɔ sia tae woyɔ mi ɖo, bene mianyi yayra dome.
10 Elabena “ame si di be yealɔ̃ agbe, eye yeakpɔ ŋkeke nyuiwo la, nekpɔ eƒe aɖe dzi ɖe vɔ̃ ŋu, kple eƒe nuyiwo dzi ɖe amebeble ŋu,
11 nete ɖa le vɔ̃ ŋu, eye wòawɔ nu nyui; nedi ŋutifafa, eye wòati eyome.
12 Elabena Yehowa ƒe ŋkuwo le ame dzɔdzɔewo ŋu, eye eƒe towo le woƒe kokoƒoƒo ŋu; gake Yehowa trɔa megbe dea ame siwo wɔa nu vɔ̃ɖiwo ya.”
13 Le nyateƒe me la, ame kae awɔ nuvevi mi, ne miedoa vevie nu le nu nyui wɔwɔ me?
14 Gake ne ehiã be miakpe fu le dzɔdzɔenyenye ta hã la, dzi dzɔa mi. Ke hã, migavɔ̃ nu si vɔ̃m wole la o, eye dzika negatso mia ƒo hã o.
15 Ke boŋ mikɔ Kristo la ŋu abe Aƒetɔ ene, le miaƒe dziwo me, eye minɔ dzadzraɖoɖi ɣesiaɣi be miaʋli mɔkpɔkpɔ si le mia si la ta le ame sia ame si abia nya mi tso eŋu la ŋkume, gake mitsɔ tufafa kple bubu deto wɔ esiae.
16 Mina dzitsinya nyui nanɔ mia si, bene le nu si tututu me wole nu ƒom tsi tsitre ɖe mia ŋu le la, ŋu nakpe ame siwo le nya vlowo gblɔm tso miaƒe agbenɔnɔ nyui si le Kristo me ŋu la.
17 Elabena enyo be miakpe fu le nu nyui wɔwɔ ta, ne emae nye Mawu ƒe lɔlɔ̃nu, tsɔ wu be miakpe fu le vɔ̃ wɔwɔ ta.
18 Nya lae nye be, Kristo ŋutɔ gɔ̃ hã ku zi ɖeka ɖe ɣeyiɣiawo katã nu ɖe nu vɔ̃wo ta, ame dzɔdzɔe ɖe ame madzɔmadzɔwo teƒe, bene wòakplɔ mi ayi Mawu gbɔ, eya ame si wowu le ŋutilã me, gake wogbɔ agbee le gbɔgbɔ me.
19 Esi wònɔ nɔnɔme sia me la, eyi ɖaɖe gbeƒã na gbɔgbɔwo le gaxɔ me,
20 gbɔgbɔ siwo sẽ to, esime Mawu ƒe dzigbɔgbɔ blewu la nɔ lalam le Noa ƒe ŋkekeawo me, esime wonɔ aɖakaʋu si me woɖe ame ʋɛ, siwo nye luʋɔ enyi, to tsi me le la kpam.
21 Nu si sɔ kple esia la le miawo hã mia ɖem fifia; nu siae nye nyɔnyrɔxɔxɔ (si menye ŋutilã ƒe ɖiƒoƒo ɖeɖe ɖa o, ke boŋ kukuɖeɖe na Mawu be wòana dzitsinya nyui nanɔ ame si,) to Yesu Kristo ƒe tsitretsitsi dzi.
22 Eyi dziƒo, eye wòva le Mawu ƒe nuɖusi me; eye wotsɔ mawudɔlawo kple dziɖulawo kpakple ŋusẽtɔwo de ete.
