1 Timoteo 3:1-16
3 Nyateƒenyae nya sia nye.
Ne ame aɖe le dzikpɔladɔ minyam la, ele dɔ nyui dim.
2 Eya ta ele be dzikpɔla nanye mokakamanɔŋutɔ, nyɔnu ɖeka srɔ̃, wòada asɔ le nuwɔna me, wòanye ame ɖɔŋuɖo, ame si wɔa nu le ɖoɖo nu, amedzrowɔla, ame si nya nufiafia,
3 menye ahamula si wɔa dzre o, menye ameƒola o, ke boŋ nugɔmesela, menye dzrehela o, menye galɔ̃la o,
4 ame si kpɔa ye ŋutɔ ƒe aƒe dzi nyuie, ame si ƒe viwo bɔbɔa wo ɖokui le moveviɖoɖo katã me;
5 (le nyateƒe me la, ne ame aɖe menya ale si wòakpɔ ye ŋutɔ ƒe aƒe dzi o ɖe, aleke wòawɔ akpɔ Mawu ƒe hame la dzi?)
6 menye ame si ƒe dzimetɔtrɔ teƒe medidi o, bene wòagado eɖokui ɖe dzi glodzoo, eye wòadze ʋɔnu si wodrɔ̃ Abosam la me o.
7 Gawu la, ele be wòakpɔ ɖaseɖiɖi nyui tso ame siwo le egodo la hã gbɔ, bene wòagadze vlodoame kple Abosam ƒe mɔ me o.
8 Nenema kee wòle be subɔsubɔdɔwɔlawo hã nawɔ nu kple moveviɖoɖo, woaganye aɖeveetɔwo o, woaganye wain geɖe nolawo o, woaganye ame siwo viɖe ƒoɖi klẽa ŋu na o,
9 woatsɔ dzitsinya dzadzɛ alé xɔse ƒe nya ɣaɣla kɔkɔe la me ɖe asi.
10 Azɔ hã, woado ame siawo kpɔ gbã be wodze hã, eye ne nutsotso aɖeke mele wo ŋu o la, ekema mina woasubɔ.
11 Nenema kee nyɔnuwo hã nawɔ nu kple moveviɖoɖo, woaganye ameŋugblẽlawo o, woada asɔ le nuwɔna me, woanye nyateƒetɔwo le nu sia nu me.
12 Subɔsubɔdɔwɔlawo nanye nyɔnu ɖeka srɔ̃, ame siwo kpɔa wo viwo kple woawo ŋutɔwo ƒe aƒewo dzi nyuie.
13 Elabena ŋutsu siwo subɔna nyuie la le ŋkɔ nyui wɔm na wo ɖokuiwo, eye woate ŋu aƒo nu dzinɔameƒotɔe le xɔse si ku ɖe Kristo Yesu ŋu la me.
14 Mele nya siawo ŋlɔm na wò, togbɔ be mele mɔ kpɔm be mava gbɔwò kpuie hã,
15 gake ne metsi megbe la, ne nànya ale si wòle be nàzɔ le Mawu ƒe aƒe, si nye Mawu gbagbe la ƒe hame, si nye nyateƒe la ƒe sɔti kple gɔmeɖoanyi si lée ɖe te, la me.
16 Vavãe, ɖokuitsɔtsɔ na Mawu ƒe nya ɣaɣla kɔkɔe sia lolo nyateƒe: ‘Woɖee fia le ŋutilã me, wobui ame dzɔdzɔe le gbɔgbɔ me, eɖe eɖokui fia mawudɔlawo, woɖe gbeƒã tso eŋu le dukɔwo dome, woxɔ edzi se le xexea me, woxɔe yi dzi le ŋutikɔkɔe me.’
