2 Korintotɔwo 13:1-14
13 Esiae nye zi etɔ̃lia si megbɔna mia gbɔ. “Le ɖasefo eve alo etɔ̃ ƒe nya nu la, ele be woaɖo kpe nya sia nya dzi.”
2 Megblɔe do ŋgɔ xoxo, eye megale egblɔm ake na ame siwo wɔ nu vɔ̃ tsã, eye na ame susɔewo katã do ŋgɔ, abe ɖe mele mia gbɔ zi evelia ene, evɔ nyemeli fifia o be, ne megava la, nyemakpɔ nublanui o,
3 esi wònye miele kpeɖodzi dim si afia be Kristo ye le nu ƒom to dzinye ta, Kristo si megbɔdzɔ le mia ŋu o, ke boŋ wòsẽa ŋu le mia dome.
4 Ɛ̃, nyateƒee wònye be wohee ɖe ati ŋu le gbɔdzɔgbɔdzɔ ta, gake ele agbe to Mawu ƒe ŋusẽ me. Nyateƒee, míawo hã míegbɔdzɔ kplii, gake míanɔ agbe kplii le Mawu ƒe ŋusẽ si wòɖe fia mi la ta.
5 Miyi edzi mianɔ mia ɖokui dom kpɔ be miele xɔse la me hã, miyi edzi mianɔ ame siwo mia ŋutɔwo mienye la dom kpɔ. Alo ɖe miede dzesii be Yesu Kristo le ƒomedodo me kpli mi oa? Negbe ɖe womekpɔ ŋudzedze ɖe mia ŋu o ko.
6 Mele mɔ kpɔm vavã be, miava kpɔe adze sii be, menye ame siwo ŋu womekpɔ ŋudzedze ɖo o lae míenye o.
7 Ke míedoa gbe ɖa na Mawu be miagawɔ nu gbegblẽ aɖeke o, menye bene mía ŋutɔwo míadze abe ame siwo ŋu wokpɔ ŋudzedze ɖo ene o, ke boŋ be mianɔ nu si nyo la wɔm, togbɔ be mía ŋutɔwo míadze abe ame siwo ŋu womekpɔ ŋudzedze ɖo o ene hã.
8 Elabena míate ŋu awɔ naneke atsi tsitre ɖe nyateƒe la ŋu o, negbe nu si ade nyateƒe la dzi ko.
9 Vavãe, míekpɔa dzidzɔ ɣesiaɣi si míegbɔdzɔ, gake miawo ya miesẽ ŋu; eye míele gbe dom ɖa be woaɖɔ mi ɖo.
10 Esia tae mele nya siawo ŋlɔm togbɔ be nyemele mia gbɔ o hã, bene ne mele mia gbɔ la, nye asi nagasẽ ɖe mia dzi le ŋusẽ si Aƒetɔ la tsɔ nam be matu ame ɖo, ke menye be matsɔ agblẽ nu le ame ŋu o, la me o.
11 Mlɔeba la, nɔviwo, miyi edzi mianɔ dzidzɔ kpɔm, miana woanɔ mia ɖɔm ɖo, woanɔ akɔ fam na mi, miaƒe tamesusu nanɔ ɖeka, mianɔ anyi le ŋutifafa me; eye lɔlɔ̃ kple ŋutifafa ƒe Mawu la anɔ anyi kpli mi.
12 Mitsɔ nugbugbɔ kɔkɔe do gbe na mia nɔewo.
13 Ame kɔkɔewo katã do gbe na mi.
14 Mía Aƒetɔ Yesu Kristo ƒe amenuveve kple Mawu ƒe lɔlɔ̃ kpakple gbɔgbɔ kɔkɔe si ƒe gomekpɔlawo mí katã míenye la, nanɔ anyi kpli mi katã.
