Galatiatɔwo 4:1-31
4 Ke mele egblɔm be, zi ale si domenyila la nye vidzĩ la, vovototo aɖeke kura mele eya kple kluvi dome o, togbɔ be nuwo katã ƒe aƒetɔ wònye hã,
2 gake ele vidzikpɔlawo kple aƒedzikpɔlawo te, va se ɖe ŋkeke si fofoa ɖo ɖi do ŋgɔ la dzi.
3 Nenema kee míawo hã, esime míenye vidzĩwo la, gɔmedzenu siwo nye xexea tɔ la yi edzi wɔ mí kluviwoe.
4 Gake esi ɣeyiɣi la de keŋkeŋ la, Mawu dɔ Via ɖo ɖa, ame si to nyɔnu aɖe dzi va, eye wòva nɔ se te,
5 bene wòaƒle ame siwo le se la te atsɔ aɖe wo, bene woaxɔ mí abe viwo ene.
6 Ke esi mienye viwo ta la, Mawu dɔ Via ƒe gbɔgbɔ ɖe míaƒe dziwo me, eye wòdoa ɣli be: “Abba,* Fofo!”
7 Eya ta mèganye kluvi o, ke boŋ vi nènye; eye ne vi nènye la, ekema Mawu na nènye domenyila hã.
8 Ke hã, esime mienya Mawu o la, ɣemaɣie miewɔ kluvidɔ na ame siwo menye mawuwo tso dzɔdzɔme o la.
9 Gake azɔ, esi mieva nya Mawu, alo esi Mawu boŋ va nya mi azɔ la, aleke wɔ miegale tɔtrɔm ɖe gɔmedzenu gbɔdzɔ maɖinuawo ŋu, eye miele didim be yewoagazu woƒe kluviwo ake?
10 Miele ŋku lém ɖe ŋkekewo kple ɣletiwo kple azãgbewo kpakple ƒewo ŋu tsitotsito.
11 Mele vɔvɔ̃m ɖe mia nu, be ɖewohĩ le mɔ aɖe nu la, mekpe fu ɖe mia ta dzodzro.
12 Nɔviwo, mele kuku ɖem na mi: Mizu abe nye ene, elabena nye hã menɔ abe miawo ene tsã. Mieda vo aɖeke ɖe ŋunye o.
13 Gake mienyae be nye ŋutilãmedɔléle aɖe dzi ye meto gblɔ nya nyui la na mi zi gbãtɔ.
14 Eye nye ŋutilãmedɔléle sia si nye tetekpɔ na mi la, miedo vloe alo ɖe ta ɖe eŋu henyɔ ŋui o; ke boŋ miexɔm abe mawudɔla ene, abe Kristo Yesu ene.
15 Ekema afi kae dzidzɔ ma si miekpɔ tsã la le fifia? Elabena mele ɖase ɖim le mia ŋu, be ne ɖe wònya wɔ la, anye ne mieho miaƒe ŋkuwo le to me tsɔ nam.
16 Ke ɖe mezu miaƒe futɔ le esi meto nyateƒe na mi taa?
17 Wole mia yome mɔ dim vevie, menye kple susu nyui o, ke boŋ wodi be yewoasa mi ɖe aga le ŋunye, bene miadi woawo boŋ yome mɔ vevie.
18 Ke hã, enyo be woadi mia yome mɔ vevie le nu nyui wɔwɔ ta ɣeawokatãɣi, ke menye ne mele mia gbɔ ɖeɖe ko o,
19 vinyewo, ame siwo ƒe fu gale ɖuyem va se ɖe esime woamè Kristo ƒe nɔnɔme ade mia me.
20 Gake ɖe madi be manɔ mia gbɔ fifi laa, ne maƒo nu le mɔ bubu nu hafi, elabena metɔtɔ le mia ta.
21 Migblɔe nam, mi ame siwo di be yewoanɔ se te: Ðe miesea Se la oa?
22 Le kpɔɖeŋu me, woŋlɔe ɖi be vi eve va nɔ Abraham si, ɖeka tso dɔlanyɔnu la me, eye ɖeka tso ablɔɖenyɔnu la me;
23 gake wodzi ame si tso dɔlanyɔnu la me la le ŋutilã nu, ekemɛ, si tso ablɔɖenyɔnu la me la, to ŋugbedodo aɖe dzi.
24 Nu siawo nye kpɔɖeŋuwɔwɔfia aɖe; elabena nyɔnu siawo tsi tsitre ɖi na nubabla eve, ɖeka tso Sinai To la dzi, si dzia vi na kluvinyenye, eye eyae nye Hagar.
25 Ke Hagar sia tsi tsitre ɖi na Sinai, si nye to aɖe le Arabia, eye esɔ kple egbegbe Yerusalem, elabena woa kple viawo le kluvinyenye me.
26 Gake wona ablɔɖe dziƒo Yerusalem ya, eye eyae nye mía dada.
27 Elabena woŋlɔ ɖi be: “Dzi nedzɔ wò, wò nyɔnu konɔ, si medzi vi o; gli kple dzidzɔ, wò nyɔnu si fu meɖu kpɔ o; elabena nyɔnu si wogblẽ ɖi la ƒe viwo sɔ gbɔ wu esi si srɔ̃ le la tɔwo.”
28 Ke míawo la, nɔviwo, míenye ŋugbedodo la ƒe viwo abe Isak ene.
29 Gake abe ale si ko ame si wodzi le ŋutilã nu ɣemaɣi la te ame si wodzi le gbɔgbɔ la nu la yome titi ene la, nenema kee wòle fifia hã.
30 Ke hã, nya kae Ŋɔŋlɔ la gblɔ? Eyae nye be: “Nya dɔlanyɔnu la kple via, elabena dɔlanyɔnu la ƒe vi manye domenyila kpe ɖe ablɔɖenyɔnu la ƒe vi ŋu gbeɖe o.”
31 Esia ta nɔviwo, menye dɔlanyɔnu la ƒe viwoe míenye o, ke boŋ ablɔɖenyɔnu la tɔwoe míenye.
