Hebritɔwo 10:1-39
10 Elabena esi wònye nu nyui siwo ava la ƒe vɔvɔli ye li na Se la, ke menye nuawo ŋutɔŋutɔ ƒe nɔnɔme o ta la, amegbetɔwo mate ŋu ato ƒe sia ƒe vɔsa siwo wowɔna ɖaa la dzi awɔ ame siwo tena vana la bliboe gbeɖe o.
2 Ne menye nenema o la, ɖe womadzudzɔ vɔsasa, le esi ema afia be wokɔ ame siwo nɔ subɔsubɔdɔ kɔkɔe wɔm la ŋu zi ɖeka ɖe ɣeyiɣiawo katã nu, eye le esia ta woƒe dzitsinya magaɖe fu na wo be nu vɔ̃ le wo ŋu o ta oa?
3 Ke boŋ wotoa vɔsa siawo dzi ɖoa ŋku edzi na ameawo ƒe sia ƒe be nu vɔ̃ le wo ŋu,
4 elabena nyitsuwo kple gbɔ̃wo ƒe ʋu mate ŋu aɖe nu vɔ̃wo ɖa o.
5 Esia tae esime wòva xexea me la, egblɔ be: “‘Mèdi vɔsa kple nunana o, ke boŋ èdzra ŋutilã aɖe ɖo ɖi nam.
6 Mèkpɔ ŋudzedze ɖe numevɔsawo kple nu vɔ̃ vɔsa ŋu o.’
7 Eye megblɔ be, ‘Kpɔ ɖa! Meva ɖo (agbalẽ xatsaxatsa la me woŋlɔ nya ɖo le ŋunye) be mawɔ wò lɔlɔ̃nu, Oo Mawu.’”
8 Esi wògblɔ gbã be: “Mèdi vɔsawo kple nunanawo kple numevɔsawo kpakple nu vɔ̃ vɔsa o, eye mèkpɔ ŋudzedze ɖe wo ŋu hã o”—vɔsa siawoe wowɔna le Se la nu—vɔ la,
9 egblɔ ŋutɔŋutɔ be: “Kpɔ ɖa! Meva ɖo be mawɔ wò lɔlɔ̃nu.” Eɖe nu gbãtɔ la ɖa, bene wòaɖo evelia anyi.
10 To “lɔlɔ̃nu” sia me la, wokɔ mía ŋu to Yesu Kristo ƒe ŋutilã, si wotsɔ na zi ɖeka ɖe ɣeyiɣiawo katã nu la dzi.
11 Gawu la, nunɔla ɖe sia ɖe yia eƒe teƒe gbe sia gbe hena dutoƒo subɔsubɔdɔ wɔwɔ kple vɔ mawo ke sasa enuenu, elabena vɔsa siawo mate ŋu aɖe nu vɔ̃wo ɖa keŋkeŋ gbeɖe o.
12 Gake ame sia tsɔ vɔsa ɖeka na ɖe nu vɔ̃wo ta yi mavɔ me, eye wòbɔbɔ nɔ anyi ɖe Mawu ƒe nuɖusi me,
13 eye tso ɣemaɣi la, ele lalam va se ɖe esime woatsɔ eƒe futɔwo awɔ eƒe afɔɖodzinu.
14 Elabena vɔsa ɖeka dzi wòto wɔ ame siwo ŋu kɔm wole la bliboe yi mavɔ me.
15 Gawu la, gbɔgbɔ kɔkɔe la hã ɖia ɖase na mí, elabena egblɔ gbã be:
16 “‘Esiae nye nubabla si mawɔ kpli wo le ŋkeke siawo megbe,’ Yehowa ye gblɔe. ‘Matsɔ nye seawo ade woƒe dziwo me, eye maŋlɔ wo ɖe woƒe susuwo me,’”
17 eye wògblɔ emegbe be: “Eye nyemagaɖo ŋku woƒe nu vɔ̃wo kple woƒe sedzidadawo dzi azɔ o.”
18 Ke afi si nu siawo ƒe tsɔtsɔke le la, vɔsasa ɖe nu vɔ̃wo ta megali o.
19 Eya ta nɔviwo, esi dzideƒo le mía si be míakpɔ mɔ age ɖe kɔkɔeƒe la to Yesu ƒe ʋu dzi,
20 mɔ si wòɖo anyi na mí abe mɔ yeye gbagbe si to xɔmetsovɔ, si nye eƒe ŋutilã, la me ene,
21 eye esi wònye nunɔlagã si le Mawu ƒe aƒe la nu le mía si ta la,
22 mina míatsɔ dzi nyateƒetɔwo ate ava le xɔse ƒe kakaɖedzi blibo me, esi wònye wohlẽ nu ɖe míaƒe dziwo ŋu be woakɔ wo ŋu tso dzitsinya vɔ̃ɖi me, eye wotsɔ tsi nyui le na míaƒe ŋutilãwo, la ŋuti.
23 Mina míalé míaƒe mɔkpɔkpɔ me ʋuʋu le dutoƒo la me ɖe asi sesĩe maʋamaʋae, elabena nyateƒetɔe ame si do ŋugbea la nye.
24 Eye mina míanɔ mía nɔewo ŋu bum, bene míado ŋusẽ mía nɔewo hena lɔlɔ̃ kple dɔ nyuiwo wɔwɔ,
25 eye míaganɔ míaƒe ƒuƒoƒewo gblẽm ɖi, abe ale si wòzu numame na ame aɖewo ene o, ke boŋ míanɔ dzi dem ƒo na mía nɔewo, eye míawɔe geɖe wu, esi miekpɔ be ŋkeke la le ɖoɖom ta.
26 Elabena ne nyateƒe la ƒe sidzedze vavãtɔ su mía si, hafi míegaɖoa nu vɔ̃ nɔa wɔwɔm la, ekema vɔsasa ɖe nu vɔ̃wo ta aɖeke megali o,
27 ke boŋ vɔvɔ̃mɔkpɔkpɔ na ʋɔnudɔdrɔ̃ aɖe li, eye ŋuʋaʋã ƒe dzo si atsrɔ̃ tsitretsiɖeŋulawo hã li.
28 Wonaa ame sia ame si do vlo Mose ƒe sea la kuna nublanuimakpɔmakpɔe, le ame eve alo etɔ̃ ƒe ɖaseɖiɖi nu.
29 Tohehe si sesẽ wu kae miesusu be adze na ame si tu afɔ Mawu ƒe Vi la dzi, eye wòbu nubabla ƒe ʋu si wotsɔ kɔ eŋu la nu maɖinui, eye wòdo vlo amenuvevegbɔgbɔ la?
30 Elabena míenya ame si gblɔ be: “Tɔnyee nye hlɔ̃biabia; maɖo eteƒe”; eye wògagblɔ be: “Yehowa adrɔ̃ ʋɔnu eƒe dukɔ la.”
31 Ŋɔdzinue wònye be ame nadze Mawu gbagbe la ƒe asi me.
32 Ke hã, minɔ ŋku ɖom edzi be le tsã ŋkekewo me la, esi woklẽ ɖe mia me megbe la, miedo dzi le avuwɔwɔ sesẽ me le fukpekpewo me,
33 ɣeaɖewoɣi la, wotsɔ ŋukpedodowo kple xaxawo siaa wɔ mi miezu abe nukpɔkpɔwo le fefewɔƒe ene, eye ɣebubuɣiwo la, miekpɔ gome kple ame siwo nɔ nɔnɔme sia me tom la.
34 Elabena miese veve ɖe ame siwo nɔ gaxɔ me la nu, eye miedo dzi dzidzɔtɔe esime woha miaƒe nunɔamesiwo, esi mienyae be nunɔamesi si nyo wu, eye wònɔa anyi ɖaa, le mia ŋutɔwo mia si ta.
35 Eya ta migatsɔ miaƒe nuƒoƒo dzinɔameƒotɔe, si teƒeɖoɖofetu gã aɖe li na la, ƒu gbe o.
36 Elabena dzidodo hiã mi, be ne miewɔ Mawu ƒe lɔlɔ̃nu vɔ la, miaxɔ ŋugbedodo la me vava.
37 Elabena “esusɔ vie ko,” eye “ame si gbɔna la ava ɖo, eye mahe ɖe megbe o.”
38 “Gake nye ame dzɔdzɔe la anɔ agbe le xɔse ta,” eye “ne egbugbɔ ɖe megbe la, luʋɔnye makpɔ dzidzɔ ɖe eŋu o.”
39 Ke míenye ame siwo gbugbɔna ɖe megbe ɖe tsɔtsrɔ̃ me la dometɔwo o, ke boŋ ame siwo si xɔse le hena luʋɔ xɔxɔ ɖe agbe la dometɔwo míenye.
