Luka 22:1-71
22 Ke abolo maʋãmaʋã ƒe ŋkekenyui, si woyɔna be Ŋutitoto, la nɔ gogom.
2 Eye nunɔlawo ƒe tatɔwo kple agbalẽfialawo hã nɔ mɔ nyuitɔ si dzi woato aɖee ɖa la dim, elabena wonɔ vɔvɔ̃m na dukɔ la.
3 Ke Satana ge ɖe Yuda, si woyɔna be Iskariot, si nye ame wuieveawo dometɔ ɖeka la me;
4 eye wòdzo heyi ɖaƒo nu kple nunɔlawo ƒe tatɔwo kple gbedoxɔa dzi kpɔlawo ƒe amegãwo le mɔ nyuitɔ si dzi wòato adee asi na wo la ŋu.
5 Eya ta dzi dzɔ wo, eye wolɔ̃ be yewoana klosalogae.
6 Eya ta elɔ̃ ɖe edzi na wo, eye wòte mɔ nyui si dzi wòato adee asi na wo, esi ameha aɖeke manɔ eŋu o, la didi.
7 Abolo maʋãmaʋã ƒe ŋkekea ɖo azɔ, si dzi wòle be woatsɔ ŋutitotolã la asa vɔe le;
8 eye wòdɔ Petro kple Yohanes gblɔ be: “Miheyi ɖadzra ŋutitoto la ɖo na mí, be míaɖu.”
9 Wogblɔ nɛ be: “Afi kae nèdi be míadzrae ɖo le?”
10 Egblɔ na wo be: “Kpɔ ɖa! Ne miege ɖe dua me la, ŋutsu aɖe si tsɔ tsize aɖe si wotsɔ anyi wɔe la ado go mi. Mikplɔe ɖo yi aƒe si me wòage ɖo la me.
11 Eye migblɔ na aƒea tɔ be: ‘Nufiala be míabia wò be: “Afi kae amedzroxɔ si me maɖu ŋutitotoa le kple nye nusrɔ̃lawo la le?”’
12 Eye ŋutsu ma afia xɔ gã aɖe si le dziƒoxɔ dzi, si me woɖo nuwo ɖo xoxo la mi. Midzrae ɖo le afi ma.”
13 Eya ta woyi, eye wokpɔe abe ale si tututu wògblɔe na wo ene, eye wodzra ŋutitoto la ɖo.
14 Eye esi gaƒoƒo la de mlɔeba la, ebɔbɔ nɔ kplɔ̃ ŋu, eye apostoloawo nɔ eŋu.
15 Eye wògblɔ na wo be: “Medi vevie be maɖu ŋutitoto sia kpli mi hafi makpe fu;
16 elabena mele egblɔm na mi be: Nyemagaɖui ake o va se ɖe esime wòva eme le Mawu fiaɖuƒe la me.”
17 Eye esi wòxɔ kplu ɖeka la, eda akpe hegblɔ be: “Mixɔ esia, eye ame sia ame natsɔe na nɔvia le mia nɔewo dome;
18 elabena mele egblɔm na mi be: Tso fifia dzi la, nyemegale waintsetse me tsi no ge akpɔ o va se ɖe esime Mawu fiaɖuƒe la va ɖo.”
19 Etsɔ abolo hã, da akpe, ŋe eme, eye wòtsɔe na wo gblɔ be: “Esia tsi tsitre ɖi na nye ŋutilã si woatsɔ ana ɖe mia ta. Minɔ esia wɔm hena ŋkuɖoɖo dzinye.”
20 Eye nenema kee wòwɔ le kplu la hã gome le fiẽnuɖuɖu la megbe hegblɔ be: “Kplu sia tsi tsitre ɖi na nubabla yeye si wowɔ to nye ʋu, si woakɔ ɖe anyi ɖe mia ta dzi la.
21 “Gake kpɔ ɖa! Yonyememɔfiala la ƒe asi le kplɔ̃a dzi kplim.
22 Elabena Amegbetɔvi la dzo yina abe ale si woɖo ɖi nɛ ene; gake baba na ame ma, si dzi woto dee asi!”
23 Ke wode asi wo nɔewo biabia me be yewo dometɔ ka gɔ̃e le nu sia wɔ ge hã.
24 Ke nyaʋiʋli sesẽ aɖe hã ɖo wo dome le wo dometɔ si dze abe eyae nye gãtɔ ene la ŋuti.
25 Ke egblɔ na wo be: “Dukɔwo ƒe fiawo ɖua aƒetɔ ɖe wo dzi, eye woyɔa ame siwo kpɔa ŋusẽ ɖe wo dzi la be Dɔmenyowɔlawo.
26 Gake mele be miawo ya mianɔ nenema o. Ke boŋ ame si nye gãtɔ le mia dome la nanɔ abe ɖevitɔ ene, eye ame si nye amegã la nanɔ abe ame si le subɔsubɔm la ene.
27 Elabena ame kae nye gã wu, ame si bɔbɔ nɔ kplɔ̃ ŋuti loo alo ame si le subɔsubɔm yea? Menye ame si bɔbɔ nɔ kplɔ̃ ŋuti ye oa? Ke nye la mele mia dome abe ame si le subɔsubɔm la ene.
28 “Gake miawoe nye ame siwo nɔ ŋunye le nye tetekpɔwo me;
29 eye mele nu blam kpli mi, abe ale si Fofonye hã bla nu kplim ene, hena fiaɖuƒe aɖe,
30 bene miaɖu nu ano nu le nye kplɔ̃ ŋu le nye fiaɖuƒe la me, eye mianɔ fiazikpuiwo dzi adrɔ̃ ʋɔnu Israel to wuieveawo.
31 “Simon, Simon, kpɔ ɖa! Satana bia be woaɖe mɔ le mia ŋu, ne yeagbɔ mi, abe lu ene.
32 Gake meɖe kuku ɖe tawò, bene wò xɔse nu nagatsi o; eye wò la, ne ètrɔ gbɔ ko la, do ŋusẽ nɔviwòwo.”
33 Ke egblɔ nɛ be: “Aƒetɔ, mele klalo be mía kpli wò míayi gaxɔ me kple ku me siaa.”
34 Gake egblɔ be: “Petro, mele egblɔm na wò be: Koklo mele atɔ ku ge egbea, hafi nàgbe zi etɔ̃ be yemenyam o.”
35 Egblɔ na wo hã be: “Esi medɔ mi, eye gakotoku kple nuɖuɖukotoku kpakple afɔkpa menɔ mia si o la, naneke mehiã mi o ɖe, menye nenemae oa?” Woɖo eŋu be: “Ao!”
36 Azɔ egblɔ na wo be: “Ame si si gakotoku le la, netsɔe azɔ, nenema ke nuɖuɖukotoku hã; eye ame si si yi mele o la nedzra eƒe awudziwui, ne wòaƒle ɖeka.
37 Elabena mele egblɔm na mi be, ele be nu sia si woŋlɔ ɖi la nava eme ɖe dzinye be: ‘Eye wobui ɖe sedzimawɔlawo dome.’ Elabena nu si woŋlɔ ɖi le ŋunye la le eme vam.”
38 Eye wogblɔ be: “Aƒetɔ, kpɔ ɖa! Yi evee nye esi.” Egblɔ na wo be: “Enyo.”
39 Esi wòdo go la, eyi Amito la dzi abe ale si wòlɔ̃a wɔwɔ ene; eye nusrɔ̃lawo kplɔe ɖo.
40 Esi wòɖo teƒea la, egblɔ na wo be: “Minɔ gbedodoɖa dzi, bene miagage ɖe tetekpɔ me o.”
41 Eye eya ŋutɔ dzo le wo gbɔ, woa kpli wo dome anɔ abe afi si ne woda kpe wòadze ene, eye wòdze klo hete gbedodoɖa
42 be: “Fofo, ne èlɔ̃ la, ɖe kplu sia ɖa le gbɔnye. Ke hã, menye nye lɔlɔ̃nu o, ke boŋ tɔwò nava eme.”
43 Tete mawudɔla aɖe tso dziƒo ɖe eɖokui fiae hedo ŋusẽe.
44 Gake esi wònɔ nu xam vevie ta la, egado gbe ɖa vevie wu; eye eƒe fifia zu abe ʋu ene nɔ dzadzam ɖe anyigba.
45 Eye wòdo gbe ɖa vɔ hetso, eye wòyi nusrɔ̃lawo gbɔ hekpɔ be wonɔ alɔ̃ dɔm le nuxaxa ta;
46 eye wògblɔ na wo be: “Nu ka tae miele alɔ̃ dɔm? Mitsi tsitre, eye mianɔ gbedodoɖa dzi, bene miagage ɖe tetekpɔ me o.”
47 Esi wòganɔ nuƒoƒo dzi la, kpɔ ɖa! Ameha aɖe, si ame wuieveawo dometɔ ɖeka si woyɔna be Yuda nɔ ŋgɔ na, ye nye esi; eye wòte ɖe Yesu ŋu be yeagbugbɔ nu nɛ.
48 Ke Yesu gblɔ nɛ be: “Yuda, nugbugbɔe nètsɔ le Amegbetɔvi la dem asia?”
49 Esi ame siwo nɔ eŋu la kpɔ nu si gbɔna dzɔdzɔ ge la, wogblɔ be: “Aƒetɔ, mída yia?”
50 Wo dometɔ ɖeka kura gɔ̃ hã da yi nunɔlagã ƒe kluvi, eye wòkpa eƒe ɖusimeto.
51 Gake Yesu ɖo eŋu be: “Nese ɖe afi ma.” Eye wòka asi toa ŋu heda gbe le amea ŋu.
52 Azɔ Yesu gblɔ na nunɔlawo ƒe tatɔwo kple gbedoxɔ la dzi kpɔlawo ƒe amegãwo kpakple amegã, siwo va elé ge, la be: “Yiwo kple kpowoe mietsɔ do go abe adzodala aɖe ŋue mietso ɖo enea?
53 Esi menɔ mia gbɔ le gbedoxɔa me tso ŋkeke yi ŋkeke la, miedo miaƒe asiwo ɖe gbɔnye kpɔ o. Gake esiae nye miaƒe gaƒoƒo kple viviti ƒe ŋusẽ la.”
54 Eye wolée, eye wokplɔe yi nunɔlagã la ƒe aƒe me; gake Petro nɔ adzɔge ɖaa le eyome.
55 Esi wodo dzo ɖe aƒea titina, eye wo katã wonɔ anyi ɖe egbɔ la, Petro nɔ anyi ɖe wo dome.
56 Gake dɔlanyɔnuvi aɖe kpɔe wònɔ anyi ɖe dzo si nɔ lelém nyuie la gbɔ, eye wòkpɔe dũu hegblɔ be: “Ame sia hã nɔ eŋu.”
57 Gake egbe gblɔ be: “Nyɔnu, nyemenyae o.”
58 Eye le ɣeyiɣi kpui aɖe megbe esi ame bubu kpɔe la, egblɔ be: “Wò hã wo dometɔ ɖekae nènye.” Gake Petro gblɔ be: “Ŋutsu, nyemele wo dome o.”
59 Eye anɔ abe gaƒoƒo ɖeka ene megbe la, ame bubu aɖe te gbɔgblɔ kakaɖedzitɔe be: “Nyateƒee, ame sia hã nɔ eŋu; elabena Galileatɔ hãe wònye!”
60 Gake Petro gblɔ be: “Ame, nyemenya nya si gblɔm nèle o.” Eye enumake esi wòganɔ nuƒoƒo dzi la, koklo ku atɔ.
61 Eye Aƒetɔ la trɔ kpɔ Petro, eye Petro ɖo ŋku Aƒetɔ la ƒe nya dzi, esime wògblɔ nɛ be: “Hafi koklo naku atɔ egbea la, àgbe nu le gbɔnye zi etɔ̃.”
62 Eye wòdo go yi xexe hefa avi vevie.
63 Ke ame siwo si me wònɔ la de asi fewuɖuɖu me le eŋu, henɔ eƒom;
64 eye ne wotsyɔ nu mo nɛ vɔ la, wobianɛ be: “Gblɔe na mí. Ame kae ƒo wò?”
65 Eye woyi edzi gblɔ busunya bubu geɖewo ɖe eŋu.
66 Esi ŋu ke mlɔeba la, dukɔ la ƒe amegãwo ƒe ha, nunɔlawo ƒe tatɔwo kple agbalẽfialawo siaa, va ƒo ƒu, eye wokplɔe yi woƒe Sanhedrin takpexɔ la me gblɔ be:
67 “Ne wòe nye Kristoa la, ekema gblɔe na mí.” Gake egblɔ na wo be: “Ne megblɔe na mi hã, miele edzi xɔ ge ase akpɔ o.
68 Eye ne mebia nya mi la, miele eŋu ɖo ge akpɔ o.
69 Ke hã, tso fifia dzi la, Amegbetɔvi la anɔ anyi ɖe Mawu ƒe ŋusẽ ƒe ɖusi me.”
70 Tete wo katã wogblɔ be: “Ekema wòe nye Mawu ƒe Vi laa?” Eɖo eŋu na wo be: “Mia ŋutɔwoe le egblɔm be nyee.”
71 Wogblɔ be: “Ðaseɖiɖi bubu kae gahiã mí? Elabena mía ŋutɔwo míesee tso ye ŋutɔ ƒe nu me.”
