Luka 23:1-56
23 Ale ameha blibo la katã tsi tsitre, eye wokplɔe yi Pilato gbɔ.
2 Eye wode asi enutsotso me be: “Míekpɔ ame sia wòle to gblẽm na míaƒe dukɔa me tɔwo hegbe na wo be woagadzɔ nu na Kaisaro o, eye wòle gbɔgblɔm be ye ŋutɔe nye Kristo, fia la.”
3 Eye Pilato biae be: “Wòe nye Yudatɔwo ƒe fia laa?” Eɖo eŋu nɛ be: “Wò ŋutɔe le egblɔm.”
4 Azɔ Pilato gblɔ na nunɔlawo ƒe tatɔwo kple amehaawo bena: “Nyemekpɔ be ame sia da se aɖeke dzi o.”
5 Gake wote tɔ ɖe edzi, gblɔ be: “Eƒe nufiafia de zi ameawo me le Yudea godoo, eye edze egɔme tso keke Galilea va ɖo afi sia.”
6 Esi Pilato se esia la, ebia be Galileatɔe amea nye hã,
7 eye esi wònya be nuto si dzi ɖum Herodes nɔ mee wòtso la, eɖoe ɖe Herodes, ame si ŋutɔ hã nɔ Yerusalem le ŋkeke mawo me.
8 Esi Herodes kpɔ Yesu la, dzi dzɔe ŋutɔ, elabena enɔ didim xoxoxo be yeakpɔe, elabena ese eŋuti nya, eye wònɔ mɔ kpɔm be awɔ dzesi aɖewo yeakpɔ.
9 Eya ta ete nya geɖewo biabiae; gake meɖo nya aɖeke ŋu nɛ o.
10 Ke hã, nunɔlawo ƒe tatɔwo kple agbalẽfialawo kpɔtɔ nɔ tsitrenu henɔ enu tsom vevie.
11 Azɔ Herodes kple eŋudzɔsrafowo do vloe, eye wòdo awu dadzo aɖe nɛ tsɔ ɖu fewu le eŋu, eye wògbugbɔe ɖo ɖe Pilato.
12 Tso ŋkeke ma tututu dzi la, Herodes kple Pilato va zu xɔlɔ̃wo; elabena do ŋgɔ na ema la, adikã nɔ wo dome.
13 Eya ta Pilato yɔ nunɔlawo ƒe tatɔwo, dziɖulawo, kple dukɔ la ƒo ƒu,
14 eye wògblɔ na wo be: “Miekplɔ ame sia vae nam be ena amewo dze aglã, eye kpɔ ɖa! Medzro eƒe nya me le mia ŋkume, gake nyemekpɔ naneke le ame sia ŋu le nya siwo tsɔm miele ɖe eŋu la me o.
15 Herodes hã mekpɔ naneke le eŋu o, elabena egbugbɔe ɖo ɖe mí; eye kpɔ ɖa! Mewɔ naneke si dze ku o.
16 Eya ta maƒoe, eye maɖe asi le eŋu.”
17 * ——
18 Gake wo kple woƒe ameha blibo la do ɣli be: “Bu mo na ame sia, eye nàɖe asi le Baraba ŋu na mí!”
19 (Ame siae wode gaxɔ me le aglã aɖe si wodze ɖe dziɖuɖua ŋu le dua me kple amewuwu ta.)
20 Eye Pilato gaƒo nu na wo ake, elabena edi be yeaɖe asi le Yesu ŋu.
21 Eya ta wote ɣlidodo be: “Hee ɖe ati ŋu! Hee ɖe ati ŋu!”
22 Egblɔ na wo zi etɔ̃lia be: “Nu ka ta, nu vɔ̃ɖi kae ŋutsu sia wɔ? Nyemekpɔ naneke si dze ku le eŋu o; eya ta maƒoe, eye maɖe asi le eŋu.”
23 Ke hã, wonɔ edzi zim kple ɣli, nɔ biabiam be wòahee ɖe ati ŋu; eye woƒe gbe te dzidede wu etɔ.
24 Eya ta Pilato tso nya me be woawɔ woƒe biabia la dzi na wo:
25 eɖe asi le ame si wode ga me le aglãdzedze ɖe dziɖuɖu ŋu kple amewuwu ta, si biam wonɔ la ŋuti, gake etsɔ Yesu de asi na woƒe lɔlɔ̃nu.
26 Ke esi wokplɔe yina la, wolé Simon, Kirene vidzidzi aɖe, si tso agbleta gbɔna la, eye wodro fuwɔameti la nɛ, be wòatsɔe akplɔ Yesu ɖo.
27 Gake ameha gã aɖe kple nyɔnu geɖe, siwo nɔ akɔta ƒom le nuxaxa ta henɔ fafam nɛ la, kplɔe ɖo.
28 Yesu trɔ ɖe nyɔnuawo ŋu gblɔ be: “Yerusalem vinyɔnuviwo, midzudzɔ avifafa ɖe tanye. Ke boŋ mifa avi na mia ɖokuiwo kple mia viwo;
29 elabena kpɔ ɖa! Ŋkekewo li gbɔna, siwo me woagblɔ le be: ‘Dzidzɔtɔwoe nye nyɔnu konɔwo, kple dɔ siwo medzi vi o, kpakple no siwo mena notsi o la!’
30 Ekema woade asi gbɔgblɔ me na towo be: ‘Mimu dze mía dzi!’ eye na togbɛwo be: ‘Mitsyɔ mía dzi!’
31 Elabena ne wole nu siawo wɔm esime atia le mumu ɖe, nu kae adzɔ ne eƒu?”
32 Ke wokplɔ ame eve bubu, siwo nye nu vɔ̃ wɔlawo, hã yina wuwu ge kpe ɖe eŋu.
33 Eye esi woɖo teƒe si woyɔna be Ametakoliƒe la, wohe woa kple nu vɔ̃ wɔlaawo ɖe ati ŋu le afi ma, ɖeka ɖe eƒe ɖusi me, eye ɖeka ɖe eƒe mia me.
34 [[Gake Yesu nɔ gbɔgblɔm be: “Fofo, tsɔe ke wo, elabena womenya nu si wɔm wole o.”]] Gawu la, wodzidze nu ɖe eƒe awuwo dzi, be woama wo.
35 Eye amewo tsi tsitre ɖi nɔ nu kpɔm. Gake dziɖulaawo nɔ hehe ɖom ɖe eta nɔ gbɔgblɔm be: “Eɖe ame bubuwo; neɖe eɖokui, ne Mawu ƒe Kristo la, Ame Tiatia la, ye wònye.”
36 Asrafoawo kura gɔ̃ hã ɖu fewu le eŋu, eye wote ɖe eŋu hetsɔ wain tsitsi nɛ,
37 gblɔ be: “Ne wòe nye Yudatɔwo ƒe fiaa la, ekema ɖe ɖokuiwòe.”
38 Nuŋɔŋlɔ aɖe hã nɔ eƒe tagbɔ be: “Yudatɔwo ƒe fia lae nye esi!”
39 Gake nu vɔ̃ wɔla siwo wohe ɖe ati ŋu la dometɔ ɖeka dzui be: “Menye ɖe nèbe yee nye Kristo la oa? Ðe ɖokuiwò, eye nàɖe míawo hãe!”
40 Gake ame evelia ka mo nɛ gblɔ be: “Fifia si nèle fɔbubu sia ke me la, mèle Mawu vɔ̃m kura oa?
41 Míawo ya míedze nɛ pɛ, elabena míele nu siwo míedze na le nu siwo míewɔ ta la xɔm bliboe; gake ame sia ya mewɔ nu tovo aɖeke o.”
42 Eye wògagblɔ be: “Yesu, ɖo ŋku dzinye ne èɖo wò fiaɖuƒe la me.”
43 Eye wògblɔ nɛ be: “Vavã mele egblɔm na wò egbea be: Ànɔ Paradiso me kplim.”
44 Gaƒoƒo adelia* lɔƒo ɖo azɔ, ke hã, viviti do ɖe anyigba blibo la katã dzi va se ɖe gaƒoƒo asiekelia* dzi,
45 elabena ɣe ƒe keklẽ nu tsi; tete gbedoxɔa ƒe xɔmetsovɔ la dze ɖe domedome.
46 Eye Yesu do ɣli sesĩe gblɔ be: “Fofo, asiwò me metsɔ nye gbɔgbɔ la de.” Esi wògblɔ esia vɔ ko la, emia nu.
47 Esi asrafomegã la kpɔ nu si dzɔ ta la, ete Mawu dodo ɖe dzi gblɔ be: “Ame dzɔdzɔe ye ame sia nye vavã.”
48 Eye ameha siwo katã va ƒo ƒu ɖe afi ma nɔ nu sia kpɔm la, esi wokpɔ nu siwo dzɔ la, wote dzodzo, eye wonɔ woƒe akɔtawo ƒom.
49 Gawu la, eƒe ame nyanyɛwo katã nɔ tsitre le adzɔge. Nyɔnu siwo dze eyome tso Galilea hã nɔ tsitre nɔ nu siawo kpɔm.
50 Eye kpɔ ɖa! Ŋutsu aɖe si ŋkɔe nye Yosef, si nye Adaŋudeha la me tɔ, eye wònye ame nyui kple ame dzɔdzɔe la va—
51 ame sia meda asi ɖe woƒe nugbeɖoɖo kple nuwɔnaa dzi o—etso Arimatia, si nye Yudeatɔwo ƒe du aɖe me, eye wònɔ Mawu fiaɖuƒe la lalam;
52 ame sia yi Pilato gbɔ hebia be wòatsɔ Yesu ƒe kukua ana ye.
53 Eye wòɖee le atia ŋu, xatsa aklala nyui aɖe ɖe eŋu, eye wòtsɔe mlɔ yɔdo aɖe si woɖe ɖe agakpe me, si me ame aɖeke memlɔ kpɔ o, la me.
54 Ke Dzadzraɖoŋkekee, eye sabat ƒe fiẽ me kekeli nɔ gogom.
55 Ke nyɔnu siwo dze eyome tso Galilea la hã yi, eye wokpɔ ŋkuɖodziyɔdo la kple ale si wotsɔ eƒe kukua mlɔ emee;
56 eye wotrɔ dzo, be yewoaɖadzra atike ʋeʋĩwo kple ami ʋeʋĩwo ɖo. Ke hã, woɖi ɖe eme le sabat la dzi le se la nu.
