Yakobo 5:1-20
5 Azɔ misee, mi kesinɔtɔwo, mifa avi, miƒu asi nu le nuxaxa siwo gbɔna mia dzi la ta.
2 Miaƒe kesinɔnuwo nyunyɔ, eye agbagblaʋuiwo ɖu miaƒe awudziwuiwo.
3 Miaƒe sika kple klosalo lé ɣebia, eye woƒe ɣebialéle anɔ abe ɖaseɖiɖi ene le mia ŋu, eye wòaɖu miaƒe ŋutilã. Nane si le abe dzo ene ye miedzra ɖo ɖi le ŋkeke mamlɛawo me.
4 Kpɔ ɖa! Dɔwɔla, siwo ŋe miaƒe agblemenuwo la ƒe fetu, siwo miegbe tsɔtsɔ na wo la, le ɣlidodo dzi, eye nuŋelawo ƒe ɣlidodo be woaxɔ na yewo la va ɖo Yehowa, aʋakɔwo ƒe Mawu la,* ƒe towo me.
5 Mieɖu agbe le anyigba dzi, eye miedze ŋutilã ƒe vivisese yome. Miena miaƒe dziwo da ami va se ɖe wuwugbe.
6 Miebu fɔ, eye miewu ame dzɔdzɔe la. Ðe mele tsitre tsim ɖe mia ŋu oa?
7 Eya ta migbɔ dzi ɖi, nɔviwo, va se ɖe Aƒetɔ la ƒe anyinɔɣi la. Kpɔ ɖa! Agbledela nɔa anyigba ƒe nuku xɔasi la lalam henɔa dzi gbɔm ɖi nɛ va se ɖe esime adatsi kple keletsi dza.
8 Miawo hã migbɔ dzi ɖi; mido ŋusẽ miaƒe dziwo, elabena Aƒetɔ la ƒe anyinɔɣi gogo.
9 Miganɔ tse ɖum ɖe mia nɔewo ŋu o, nɔviwo, bene woagadrɔ̃ ʋɔnu mi o. Kpɔ ɖa! Ʋɔnudrɔ̃la la le tsitre ɖe ʋɔtruawo nu.
10 Nɔviwo, le fukpekpe le vɔ̃ me kple dzigbɔɖiɖeɖefia me la, mitsɔ nyagblɔɖilawo, ame siwo ƒo nu le Yehowa ƒe ŋkɔ me la, abe kpɔɖeŋu ene.
11 Kpɔ ɖa! Míeyɔa ame siwo doa dzi la be dzidzɔtɔwo. Miese Hiob ƒe dzidodo ŋu nya, eye miekpɔ ale si Yehowa na nuwo va wu enu nɛ, be Yehowa ƒe dɔmetɔtrɔ sɔ gbɔ ŋutɔ, eye wòkpɔa nublanui na ame.
12 Ke hã, vevietɔ la, nɔvinyewo, midzudzɔ nutata, ɛ̃, eɖanye dziƒo alo anyigba alo nu bubu aɖe o. Ke boŋ mina miaƒe Ɛ̃ nanye Ɛ̃, eye miaƒe Ao nanye Ao, bene miagadze ʋɔnudɔdrɔ̃ me o.
13 Ðe mia dometɔ aɖe le fu kpem le vɔ̃ mea? Neyi edzi wòanɔ gbe dom ɖa. Ðe dzi le ame aɖe dzɔma? Nedzi kafukafuhawo.
14 Ðe mia dometɔ aɖe le dɔ léma? Neyɔ hamemetsitsiwo woava egbɔ, eye woado gbe ɖa ɖe eta ahasi ami nɛ le Yehowa ƒe ŋkɔ me.
15 Eye xɔse ƒe gbedodoɖa ana dɔnɔ la ƒe lãme nasẽ, eye Yehowa afɔe ɖe te. Eye ne ewɔ nu vɔ̃ aɖewo la, woatsɔe akee.
16 Eya ta miʋu miaƒe nu vɔ̃wo me kɔtɛ na mia nɔewo, eye mido gbe ɖa ɖe mia nɔewo ta, be miate ŋu ahaya. Ŋusẽ nɔa ame dzɔdzɔe ƒe kokoƒoƒo, si le dɔ dzi, la ŋu.
17 Eliya nye amegbetɔ si ƒe seselelãmewo sɔ kple mía tɔwo, ke hã le gbedodoɖa aɖe me la, edo gbe ɖa be tsi negadza o; eye tsi medza ɖe anyigba dzi o ƒe etɔ̃ kple ɣleti ade.
18 Eye wògado gbe ɖa ake, eye tsi dza tso dziƒo, eye anyigba na eƒe nuku do.
19 Nɔvinyewo, ne mia dometɔ aɖe tra mɔ tso nyateƒe la gbɔ, eye ame bubu trɔe gbɔe la,
20 minyae be ame si trɔ nu vɔ̃ wɔla tso eƒe vodada ƒe mɔ la dzi la axɔ amea ƒe luʋɔ tso ku me, eye wòatsyɔ nu nu vɔ̃ geɖe dzi.
