Yohanes 10:1-42
10 “Vavã, vavã mele egblɔm na mi be: Ame si metoa alẽkpo la ƒe agbo nu hafi gena ɖe eme o, ke boŋ wòliaa teƒe bubu aɖe la, fiafitɔ kple adzodalae ame ma nye.
2 Gake ame si toa agbo la nu gena ɖe eme la, eyae nye alẽawo ƒe kplɔla.
3 Agbonudzɔla la ʋunɛ nɛ, eye alẽawo sea eƒe gbe, eye wòtsɔa ye ŋutɔ ƒe alẽwo ƒe ŋkɔ yɔa wo, eye wòkplɔa wo doa goe.
4 Ne ekplɔ ye ŋutɔ tɔwo katã do goe la, edzea wo ŋgɔ, eye alẽawo kplɔnɛ ɖo, elabena wodze si eƒe gbe.
5 Womadze ame tutɔ yome gbeɖe o, ke boŋ woasi le egbɔ, elabena womedzea si ame tutɔwo ƒe gbe o.”
6 Yesu gblɔ kpɔɖeŋu sia na wo; gake womese nya siwo gblɔm wònɔ na wo la gɔme o.
7 Eya ta Yesu gagblɔ be: “Vavã, vavã mele egblɔm na mi be: Nyee nye agbo na alẽawo.
8 Ame siwo katã be yewova ɖe tenyeƒe la, fiafitɔwo kple adzodalawo wonye; gake alẽawo meɖo to wo o.
9 Nyee nye agbo la; ame sia ame si toa menye yina ɖe eme la akpɔ ɖeɖe, eye wòayi ɖe eme agado go, eye wòakpɔ gbeɖuƒe.
10 Fiafitɔ la mevana ne menye le fififi kple amewuwu kpakple nugbegblẽ ta o. Nye la, meva be woakpɔ agbe, eye be woakpɔe wòasɔ gbɔ.
11 Nyee nye alẽkplɔla nyui la; alẽkplɔla nyui la tsɔa eƒe luʋɔ ɖoa anyi ɖe alẽawo ta.
12 Ne ame si woxea fe na be wòakpɔ alẽawo dzi, si menye alẽkplɔla o, eye alẽawo menye ye ŋutɔ tɔ o, kpɔ amegãxi wògbɔna la, egblẽa alẽawo ɖi hesina—eye amegãxi la léa wo hekaa wo hlẽna—
13 elabena ɖe woxɔe xea fe nɛ, eye alẽawo ƒe dedienɔnɔ mele vevie nɛ o.
14 Nyee nye alẽkplɔla nyui la, eye menya nye alẽawo, eye nye alẽawo nyam,
15 abe ale si ko Fofo la nyam, eye menya Fofo la ene; eye metsɔ nye luʋɔ ɖo anyi ɖe alẽawo ta.
16 “Eye alẽ bubuwo le asinye, siwo metso kpo sia me o; ele nam be makplɔ woawo hã avae, eye woase nye gbe, eye woazu alẽha ɖeka, alẽkplɔla ɖeka.
17 Esia tae Fofo la lɔ̃am ɖo, elabena metsɔ nye luʋɔ ɖo anyi, be magaxɔe ake.
18 Menye ame aɖekee xɔe le asinye o, ke boŋ nye ŋutɔe tsɔe ɖo anyi le ɖokuinye si. Ŋusẽ le asinye be matsɔe aɖo anyi, eye ŋusẽ le asinye be magaxɔe ake. Fofonye gbɔe mexɔ se si ku ɖe esia ŋu la tsoe.”
19 Mama gaɖo Yudatɔwo dome le nya siawo ta.
20 Wo dometɔ geɖewo nɔ gbɔgblɔm be: “Gbɔgbɔ vɔ̃ le eme, eye wòdze aɖaʋa. Nu ka tae miele to ɖomee?”
21 Bubuwo be: “Menye ame si me gbɔgbɔ vɔ̃ le ƒe nyawoe nye esiawo o. Gbɔgbɔ vɔ̃ mate ŋu aʋu ŋku na ŋkuagbãtɔwo o ɖe?”
22 Ɣemaɣi la, xɔŋukɔkɔŋkekenyui la ɖo edzi le Yerusalem. Vuvɔŋɔlie,
23 eye Yesu nɔ tsa ɖim le gbedoxɔa me le Salomo ƒe akpata la me.
24 Eya ta Yudatɔwo va ƒo xlãe, eye wote gbɔgblɔ nɛ be: “Va se ɖe ɣekaɣi nàna míaƒe luʋɔwo natsi dzi ase ɖo? Ne wòe nye Kristo la la, gblɔe na mi faa.”
25 Yesu ɖo eŋu na wo be: “Megblɔe na mi, gake miexɔe se o. Dɔ siwo wɔm mele le Fofonye ƒe ŋkɔ me la, woawoe le ɖase ɖim tso ŋunye.
26 Gake miawo ya miexɔe se o, elabena miele nye alẽawo dome o.
27 Nye alẽwo sea nye gbe, eye menya wo, eye wodzea yonyeme.
28 Eye menaa agbe mavɔ wo, eye womatsrɔ̃ akpɔ gbeɖe o, eye ame aɖeke mate ŋu axɔ wo le asinye sesẽe o.
29 Nu siwo Fofonye tsɔ nam la lolo wu nu bubuwo katã, eye ame aɖeke mate ŋu axɔ wo le Fofo la si sesẽe o.
30 Mía kple Fofo la míele ɖeka.”
31 Yudatɔwo gafɔ kpe be yewoaƒui.
32 Yesu ɖo eŋu na wo be: “Dɔ nyui geɖe siwo tso Fofo la gbɔe mewɔ fia mi. Dɔ siawo dometɔ ka tae miele kpe ƒu gem ɖo?”
33 Yudatɔwo ɖo eŋu nɛ be: “Menye dɔ nyui wɔwɔ tae míele kpe ƒu ge wò ɖo o, ke boŋ le busunyagbɔgblɔ ta, ɛ̃, elabena togbɔ be amee nènye hã la, èwɔ ɖokuiwò mawui.”
34 Yesu ɖo eŋu na wo be: “Ðe womeŋlɔ ɖe miaƒe Se la me be: ‘Mebe: “Mawuwo mienye” oa’?
35 Ne eyɔ ame siwo ŋu Mawu ƒe nya la va tsi tsitre ɖo be ‘mawuwo,’ evɔ asixɔxɔ gakpɔtɔ le Ŋɔŋlɔa ŋu la,
36 ɖe miele gbɔgblɔm na nye, ame si ŋu Fofo la kɔ hedɔ ɖe xexea me la be: ‘Ègblɔ busunya,’ le esi megblɔ be Mawu ƒe Vie menye la taa?
37 Ne nyemele Fofonye ƒe dɔwo wɔm o la, ekema migaxɔ dzinye se o.
38 Ke ne mele wo wɔm la, togbɔ be miexɔa dzinye sena o hã la, mixɔ dɔwɔwɔawo ya dzi se, bene miava nya, eye miayi edzi anya, be Fofo la wɔa ɖeka kplim, eye nye hã mewɔa ɖeka kple Fofo la.”
39 Eya ta wogadi be yewoalée; gake edzo le afi ma, si na womete ŋu lée o.
40 Eya ta egadzo yi Yordan godo, le afi si Yohanes nɔ amewo nyrɔm le le gɔmedzedzea me, eye wònɔ afi ma.
41 Eye ame geɖewo va egbɔ, eye wode asi gbɔgblɔ me be: “Le nyateƒe me la, Yohanes mewɔ dzesi ɖeka teti hã o, gake nya siwo katã Yohanes gblɔ tso ame sia ŋu la nye nyateƒe.”
42 Eye ame geɖewo xɔ edzi se le afi ma.
