1 Korintotɔwo 13:1-13
-
Lɔlɔ̃—mɔ si de ŋgɔ wu (1-13)
13 Ne meƒoa nu le amegbetɔwo kple mawudɔlawo ƒe gbegbɔgblɔwo me, gake lɔlɔ̃ mele asinye o la, ke mele abe gakogoe alo ayawagba si le ɖiɖim sesĩe ene.
2 Ne nyagblɔɖi ƒe nunana le asinye, eye menya nya ɣaɣla kɔkɔewo katã kple sidzedzewo katã,+ eye xɔse le asinye ale gbegbe be mate ŋu aho towo, gake lɔlɔ̃ mele asinye o la, nyemenye naneke o.*+
3 Eye ne metsɔ nye nunɔamesiwo katã na be woatsɔ anyi ame bubuwo,+ eye metsɔ nye ametia na, ale be maƒo adegbe, gake lɔlɔ̃ mele asinye o la,+ meɖe vi aɖeke kura nam o.
4 Lɔlɔ̃+ gbɔa dzi blewu,+ eye wònyoa dɔme.+ Lɔlɔ̃ meʋãa ŋu o.+ Meƒoa adegbe o, medoa eɖokui ɖe dzi glodzoo o,+
5 mewɔa nu si medze o,+ media eya ŋutɔ tɔ o,+ mebia dzi o.+ Meléa vɔ̃ siwo wowɔ ɖe eŋu la ɖi o.+
6 Mekpɔa dzidzɔ ɖe nu madzɔmadzɔ ŋu o,+ ke ekpɔa dzidzɔ ɖe nyateƒe boŋ ŋu.
7 Enɔa te ɖe nuwo katã nu,+ exɔa nuwo katã dzi sena,+ ekpɔa mɔ na nuwo katã,+ edoa dzi le nuwo katã me.+
8 Lɔlɔ̃ nu metsina gbeɖe o. Ke ne nyagbɔgblɔɖi ƒe nunanawo li la, woava ɖe wo ɖa; ne gbegbɔgblɔ bubuwo gbɔgblɔ* li la, woadzudzɔ; ne sidzedze li la, woava ɖee ɖa.
9 Elabena sidzedze afãafã ye le mía si,+ eye míegblɔa nya ɖi afãafã,
10 ke ne nu si le blibo la va ɖo la, woaɖe nu afãafã la ɖa.
11 Esime menye ɖevi la, meƒoa nu abe ɖevi ene, mebua tame abe ɖevi ene, mebua nuwo ŋu abe ɖevi ene; ke azɔ esi metsi la, meɖe asi le ɖevimenuwo ŋu.
12 Elabena fifia la, míekpɔa nu flukpee to gahuhɔ̃e aɖe me, ke ɣemaɣi la, anye ŋkume kple ŋkume. Fifia la, menya nu afãafã, ke ɣemaɣi la, manya nu sia nu nyuie abe ale si wonyam nyuie ene.
13 Ke azɔ la, nu etɔ̃ siawoe kpɔtɔ li: xɔse, mɔkpɔkpɔ, lɔlɔ̃; ke esi ƒo wo tae nye lɔlɔ̃.+
