1 Korintotɔwo 14:1-40
14 Miti lɔlɔ̃ yome, ke minɔ gbɔgbɔmenunanawo dim vevie, gake vevietɔ la, be miagblɔ nya ɖi.+
2 Elabena ame si tsɔa gbegbɔgblɔ bubu ƒoa nu la, menye amewoe wòƒoa nu na o, ke boŋ Mawue, elabena ame aɖeke mesenɛ o,+ ke boŋ egblɔa nya ɣaɣla kɔkɔewo+ to gbɔgbɔ la dzi.
3 Ke ame si gblɔa nya ɖi la tua ame ɖo, eye wòdea dzi ƒo na ame hefaa akɔ na amewo to eƒe nuƒoƒo dzi.
4 Ame si tsɔa gbegbɔgblɔ bubu ƒoa nu la tua eya ŋutɔ ɖokui ɖo, ke ame si gblɔa nya ɖi la tua hame la ɖo.
5 Ðe madi be mi katã miado gbegbɔgblɔ bubuwo hafi,+ ke medi be miagblɔ nya ɖi boŋ.+ Le nyateƒe me la, ame si gblɔa nya ɖi la de ŋgɔ wu ame si tsɔa gbegbɔgblɔ bubuwo ƒoa nui, negbe ɖe wòɖe egɔme, ale be wòatu hamea ɖo.
6 Ke azɔ nɔviwo, ne ɖe meva hetsɔ gbegbɔgblɔ bubuwo le nu ƒom na mi ɖe, vi kae wòaɖe na mi? Ke ne metsɔ nyaɖeɖefia+ alo sidzedze+ alo nyagbɔgblɔɖi alo nufiafia boŋ ƒo nu na mi la, ɖe maɖe vi wu oa?
7 Nenemae wòle le nu siwo me agbe mele o la ƒe ɖiɖime gome, eɖanye dze alo saŋku o. Ne woƒe ɖiɖi meto vovo o ɖe, aleke woawɔ anya nu si kum dze la le alo nu si ƒom saŋku la le?
8 Elabena ne kpẽ ƒe ɖiɖime mekɔ nyuie o ɖe, ame kae adzra ɖo ɖe aʋa ŋu?
9 Nenema kee miawo hã, ne mietsɔa aɖe gblɔa nya siwo gɔme anya se bɔbɔe o ɖe, aleke ame awɔ anya nya si gblɔm miele? Le nyateƒe me la, anye nuƒoƒo ɖe yame.
10 Anye be gbegbɔgblɔ vovovowo le xexea me, gake wo dometɔ aɖeke meli, si ŋu gɔmesese mele o.
11 Elabena ne nyemese nya si wogblɔ la gɔme o la, ekema mezu dutagbedola na ame si le nu ƒom, eye ame si le nu ƒom hã zu dutagbedola nam.
12 Eya ta miawo hã, esi miele gbɔgbɔ la ƒe nunanawo dim vevie ta la, midze agbagba miagba go le nunana siwo atu hamea ɖo la me.+
13 Eya ta ame si tsɔa gbegbɔgblɔ bubu ƒoa nu la nedo gbe ɖa be yeate ŋu aɖe egɔme.+
14 Elabena ne metsɔa gbegbɔgblɔ bubu doa gbe ɖae la, gbɔgbɔ ƒe nunana si le asinye lae le gbea dom ɖa, ke nye susu ya meɖe vi aɖeke o.
15 Ekema nu kae mawɔ? Matsɔ gbɔgbɔ ƒe nunana la ado gbe ɖa, eye magatsɔ nye susu hã ado gbe ɖa. Matsɔ gbɔgbɔ ƒe nunana la adzi kafukafuha, eye magatsɔ nye susu hã adzi kafukafuha.
16 Ne menye nenema o la, ne ètsɔa gbɔgbɔ ƒe nunana la gblɔa kafukafunyawo ɖe, aleke ame tsɛ si le mia dome la ate ŋu agblɔ “Amen” ɖe wò akpedada dzi, esi menya nya si gblɔm nèle o?
17 Nyateƒee, èdaa akpe le mɔ nyui nu, gake metua ame kemɛa ɖo o.
18 Medaa akpe na Mawu be metsɔa gbegbɔgblɔ bubuwo ƒoa nui wu mi katã.
19 Gake madi be matsɔ nye susu agblɔ nya atɔ̃ le hamea me, ale be mafia nu ame bubuwo hã, wu be magblɔ nya akpe ewo le gbegbɔgblɔ bubu me.+
20 Nɔviwo, miganye ɖevi suewo le nugɔmesese me o,+ ke boŋ minye ɖevi suewo le nu vɔ̃ɖi wɔwɔ me;+ ke mizu ame siwo tsi bliboe le nugɔmesese me.+
21 Woŋlɔ ɖe Se la me be: “‘Dutagbedolawo ƒe aɖe kple du bubu me tɔwo ƒe nuyiwo matsɔ aƒo nu na dukɔ sia, ke hã, woagbe toɖoɖom,’ Yehowa* ye gblɔe.”+
22 Eya ta gbegbɔgblɔ bubuwo dodo menye dzesi na xɔsetɔwo o,+ ke boŋ na dzimaxɔsetɔwo, eye nyagbɔgblɔɖi meli na dzimaxɔsetɔwo o, ke boŋ na xɔsetɔwo.
23 Eya ta ne hame blibo la katã va kpe ta ɖe afi ɖeka, eye wo katã wotsɔ gbegbɔgblɔ bubuwo le nu ƒom, eye ame tsɛwo alo dzimaxɔsetɔwo va la, ɖe womagblɔ be miaƒe tagbɔe le gbegblẽm oa?
24 Ke ne mi katã miele nya gblɔm ɖi, eye dzimaxɔsetɔ aɖe alo ame tsɛ aɖe va la, ekema miaƒe nyawo katã azu mokaka nɛ, eye wòatsɔ wo adzro eɖokui me.
25 Eƒe dzimenya ɣaɣlawo adze ƒãa, ale be wòatsyɔ mo anyi ade ta agu na Mawu agblɔ be: “Mawu le mia dome vavã.”+
26 Ekema nɔviwo, nu kae miawɔ? Ne mieva kpe ta la, psalmo aɖe nɔa nɔvi aɖe si, nufiafia aɖe nɔa ame bubu si, nyaɖeɖefia aɖe nɔa ame bubu si, gbegbɔgblɔ bubu dodo ƒe ŋutete nɔa ame bubu si, eye nyawo gɔme ɖeɖe ƒe ŋutete nɔa ame bubu si.+ Miwɔ nuwo katã hena tutuɖo.
27 Eye ne ame aɖe tsɔa gbegbɔgblɔ bubu ƒoa nu la, ke woanye ame eve alo ne ede ƒãa la, ame etɔ̃, eye woaƒo nu ɖekaɖeka, eye ame aɖe naɖe egɔme.+
28 Ke ne gbegɔmeɖela aɖeke meli o la, nezi ɖoɖoe le hame la me, eye wòaƒo nu na eɖokui kple Mawu.
29 Nyagblɔɖila+ eve alo etɔ̃ ko naƒo nu, eye ame bubuwo nadi egɔmesese.
30 Ke ne woɖe nane fia ame bubu aɖe si nɔ anyi ɖe afi ma la, ke ame gbãtɔ si le nu ƒom la nazi ɖoɖoe.
31 Elabena mi katã miate ŋu agblɔ nya ɖi ɖekaɖeka, ale be ame sia ame nasrɔ̃ nane, eye wòade dzi ƒo nɛ.+
32 Eye nyagblɔɖilawo nakpɔ egbɔ be wozã gbɔgbɔ ƒe nunana la le ɖoɖo nu.
33 Elabena Mawu menye nyamanyamawɔwɔ ƒe Mawu o, ke ŋutifafa ƒe Mawu boŋ.+
Abe ale si wòle le ame kɔkɔewo ƒe hamewo katã me ene la,
34 nyɔnuwo nazi ɖoɖoe le hameawo me, elabena womeɖe mɔ na wo be woaƒo nu o.+ Ke boŋ woabɔbɔ wo ɖokuiwo,+ abe ale si Se la hã gblɔe ene.
35 Ke ne wodi be yewoasrɔ̃ nane la, woabia wo srɔ̃wo le aƒe me, elabena enye ŋukpe be nyɔnu naƒo nu le hamea me.
36 Mia gbɔe Mawu ƒe nya la dzɔ tsoa, alo miawo ɖeɖe gbɔ koe wòɖoa?
37 Ne ame aɖe susu be yenye nyagblɔɖila alo be wona gbɔgbɔ ƒe nunana ye la, ekema nelɔ̃ ɖe edzi be nya siwo ŋlɔm mele na mi la nye Aƒetɔ la ƒe sedede.
38 Ke ne ame aɖe metsɔ ɖe le eme o la, ekema womatsɔ ɖe le eya hã me o.*
39 Eya ta nɔvinyewo, miyi edzi mianɔ nyagbɔgblɔɖi+ ƒe nunana la dim vevie, gake migade se ɖe gbegbɔgblɔ bubuwo dodo+ nu o.
40 Ke mina nuwo katã nayi edzi nyuie ɖe ɖoɖo nu.+
Etenuŋɔŋlɔ
^ Kpɔ Megbenyawo A5.
^ Agate ŋu afia, “ne ame aɖe gbe nya sia gɔme sese la, ekema madze si nu o.”
