1 Korintotɔwo 9:1-27
9 Menye ablɔɖemee menye oa? Menye apostoloe menye oa? Ðe nyemekpɔ Yesu, mía Aƒetɔ la oa?+ Menye miawoe nye dɔ si mewɔ le Aƒetɔ la me la me tsonuwo oa?
2 Ne nyemenye apostolo na ame bubuwo o hã la, menyee na miawo ya! Elabena miawoe nye nutrenu si le kpe ɖom edzi be Aƒetɔ la ƒe apostoloe menye.
3 Nya siwo matsɔ aɖe ɖokuinye nu na ame siwo drɔ̃a ʋɔnum lae nye esi:
4 Ðe míekpɔ mɔ aɖu nu alo ano nu oa?
5 Ðe míekpɔ mɔ aɖe nyɔnu haxɔsetɔ* akplɔ ɖe ŋuti,+ abe ale si apostolo susɔeawo kple Aƒetɔ la nɔviwo+ kpakple Kefas*+ hã wɔna ene oa?
6 Alo nye kple Barnaba+ koe mekpɔ mɔ adzudzɔ dɔwɔwɔ be míatsɔ akpɔ mía ɖokuiwo dzi oa?
7 Asrafo kae wɔa asrafodɔ evɔ eya ŋutɔe kpɔa eɖokui dzi? Ame kae dea waingble evɔ meɖua eme kutsetse o?+ Alo ame kae kplɔa lãha evɔ menoa lãha la ƒe notsi ƒe ɖe o?
8 Amegbetɔ ƒe susu nue mele nya siawo gblɔm lea? Alo ɖe Se la hã megblɔ nya siawo oa?
9 Elabena woŋlɔ ɖe Mose ƒe Se la me be: “Mègabla nu na nyitsu ne ele nuku tugum o.”+ Nyitsuwo ŋue Mawu tsi dzi ɖoa?
10 Alo míawo koŋ tae wògblɔe ɖo? Le nyateƒe me la, míawo tae woŋlɔe ɖi ɖo, elabena ele be ame si le agble ŋlɔm kple ame si le nuku tugum la nawɔe kple mɔkpɔkpɔ be yewoava kpɔ gome le eme.
11 Ne míeƒã gbɔgbɔmenuwo ɖe mia me ɖe, ekema nu gãe wònye ne míeŋe ŋutilãmenuhiahiãwo tso mia domea?+
12 Ne ame bubuwo kpɔ mɔ abia nu siawo tso mia si ɖe, ekema ɖe míawo míekpɔ mɔ geɖe wu oa? Gake míewɔ ŋusẽ sia ŋu dɔ o,+ ke boŋ míedoa dzi le nuwo katã me, ale be míagaxe mɔ na Kristo la ŋuti nya nyui la le mɔ aɖeke nu o.+
13 Ðe mienyae be ame siwo wɔa dɔ kɔkɔewo la ɖua gbedoxɔa me nuwo, eye ame siwo subɔna le vɔsamlekpuia ŋu ɣesiaɣi la, vɔsamlekpuia ƒe nuwo mee wokpɔa wo tɔ gome tsonɛ oa?+
14 Nenema kee Aƒetɔ la ɖo na ame siwo ɖea gbeƒã nya nyui la be, nya nyui la nakpɔ nu si ŋu woanɔ agbe ɖo la gbɔ na wo.+
15 Ke nyemewɔ mɔnukpɔkpɔ siawo dometɔ ɖeka teti hã ŋu dɔ o.+ Le nyateƒe me la, menye ɖe mele nu siawo ŋlɔm ale be miawɔ nenema nam o, elabena enyo nam be maku wu esi mana ame aɖe naɖe nu si metsɔ ƒoa adegbe la ɖa!+
16 Ke ne mele nya nyui la gblɔm hã la, esia menye susu si ta maƒo adegbe ɖo o, elabena agba wònye le dzinye. Ɛ̃, ne nyemegblɔ nya nyui la o la, baba nam!+
17 Ne mewɔ esia tso dzi me faa la, fetu li nam; ke ne nyemewɔe tso dzi me o hã la, wotsɔ aƒedzikpɔkpɔdɔ de asi nam.+
18 Ekema nu kae nye nye fetua? Eyae nye be, ne mele nya nyui la gblɔm la, magblɔ nya nyui la naneke maxɔmaxɔe, ale be magazã ŋusẽ si le asinye le nya nyuia me la ɖe mɔ madzemadze nu o.
19 Togbɔ be mevo tso amewo katã si me hã la, mewɔ ɖokuinye amewo katã ƒe kluvii, be asinye nasu ame geɖe ale si mate ŋui dzi.
20 Ale mezu abe Yudatɔ ene na Yudatɔwo, ale be asinye nasu Yudatɔwo dzi;+ mezu abe ame si le se te ene na ame siwo le se te, evɔ nye ŋutɔ nyemele se te hafi o, ale be asinye nasu ame siwo le se te la dzi.+
21 Mezu abe semanɔsitɔ ene na semanɔsitɔwo, evɔ le Mawu gbɔ la, nyemenye semanɔsitɔ hafi o, ke boŋ mele Kristo ƒe se te,+ ale be asinye nasu semanɔsitɔwo dzi.
22 Mezu gbɔdzɔgbɔdzɔtɔ na gbɔdzɔgbɔdzɔtɔwo, ale be asinye nasu gbɔdzɔgbɔdzɔtɔwo dzi.+ Mezu nuwo katã na ame ƒomeviwo katã, ale be mate ŋu aɖe wo dometɔ aɖewo kokoko.
23 Ke nya nyui la tae mewɔa nuwo katã ɖo, ale be nye hã mate ŋu agblɔe na amewo.+
24 Ðe mienyae be duƒula siwo le ho ʋlim la katãe ƒua dua, gake ame ɖeka koe xɔa dziɖuɖufetu la oa? Miƒu du le mɔ si ana miaxɔ fetu la nu.+
25 Azɔ hã, ame sia ame si le gome kpɔm le hoʋiʋli me la ɖua eɖokui dzi le nuwo katã me. Woawo la, wowɔnɛ be woaxɔ dziɖuɖukuku si gblẽna,+ ke míawo ya hena esi megblẽna o.+
26 Eya ta ale si mele dua ƒum la, nyemele eƒum ɖewoɖewoe o;+ ale si mele nye kɔwo dam la, menye be mada dadagbo o;
27 ke boŋ meƒoa* nye ŋutilã+ vevie hewɔnɛ kluvii, ale be esi meɖe gbeƒã na ame bubuwo vɔ la, nye ŋutɔ nyemagazu ame madzemadze le mɔ aɖeke nu o.
