1 Tesalonikatɔwo 2:1-20
2 Nɔviwo, miawo ŋutɔwo mienya nyuie be míaƒe mia gbɔ vava la mezu dzodzro o.+
2 Togbɔ be míekpe fu, eye woɖi gbɔ mí gbã le Filipi,+ abe ale si mienya ene hã la, dzi ɖo mía ƒo to mía Mawu ƒe kpekpeɖeŋu me be míagblɔ Mawu ƒe nya nyui la na mi+ le tsitretsiɖeŋu* geɖe me.
3 Elabena nuxlɔ̃ame si míenana mi la menye alakpanya alo susu vɔ̃ alo amebeble wònye o,
4 ke boŋ ale si ko Mawu kpɔe be míedze be wòatsɔ nya nyui la ade asi na míi la, nenemae míeƒoa nui, menye be wòadze amegbetɔwo ŋu o, ke boŋ be wòadze Mawu, ame si dzroa míaƒe dziwo me kpɔ la ŋu.+
5 Le nyateƒe me la, mienyae nyuie be míezã ameflunya ŋɔnɔe aɖeke ɣeaɖekeɣi kpɔ o, alo to aye me klẽ ŋu ɖe ame aɖeke ƒe nu ŋu kpɔ o;+ Mawue nye ɖasefo!
6 Eye míele bubu hã dim tso amegbetɔwo gbɔ o, míele edim tso miawo alo ame bubuwo gbɔ o, togbɔ be míate ŋu anye agba gã aɖe na mi le Kristo ƒe apostolo siwo míenye ta hafi.+
7 Ke boŋ míewɔa nu ɖe mia ŋu tufafatɔe, abe ale si vidada léa be na eya ŋutɔ viawo nyuie ene.
8 Eya ta esi míelɔ̃a nu le mia gbɔ o ta la, edzɔ dzi na mí vevie be, menye Mawu ƒe nya nyui la ɖeɖe ko míatsɔ ana mi o, ke míawo ŋutɔ mía ɖokuiwo* hãe,+ elabena mieva zu míaƒe lɔlɔ̃tɔwo.+
9 Nyateƒee, nɔviwo, mieɖoa ŋku míaƒe agbagbadzedze kple kutrikuku dzi. Esime míele Mawu ƒe nya la gblɔm na mi la, míewɔa dɔ zã kple keli, ale be míagazu agba gã aɖeke na mia dometɔ aɖeke o.+
10 Miawoe nye ɖasefowo, eye Mawu hã nyee, be míenye nuteƒewɔlawo kple ame dzɔdzɔewo kpakple mokakamanɔŋutɔwo le mi xɔsetɔwo dome.
11 Eye mienya nyuie be míeyi edzi xlɔ̃ nu mia dometɔ ɖe sia ɖe,+ eye míefa akɔ na mi heƒo nu na mi abe ale si vifofo+ wɔna na viawo ene,
12 ale be miayi edzi azɔ ale si dze Mawu,+ ame si yɔ mi va eƒe Fiaɖuƒe+ kple ŋutikɔkɔe+ gbɔ la ŋu.
13 Ɛ̃, ema tae míawo hã míedaa akpe na Mawu madzudzɔmadzudzɔe ɖo,+ elabena esi miexɔ Mawu ƒe nya, si miese tso mía gbɔ la, miexɔe abe amegbetɔwo ƒe nya ene o, ke boŋ abe Mawu ƒe nya ene, abe ale si tututu wòle hã ene, eye wòle dɔ dzi le mi xɔsetɔwo me.
14 Nɔviwo, miezu Mawu ƒe hame siwo le Yudea siwo wɔ ɖeka kple Kristo Yesu la srɔ̃lawo, elabena miawo hã miekpe fu le miawo ŋutɔwo mia deviwo si me,+ abe ale si tututu woawo hã wokpe fu le Yudatɔwo si me la ene,
15 ame siwo wu Aƒetɔ Yesu+ gɔ̃ hã kple nyagblɔɖilawo, eye woti míawo hã yome.+ Azɔ hã, womele nu si dze Mawu ŋu la wɔm o, ke boŋ wotsi tsitre ɖe amewo katã ƒe nyonyo ŋu,
16 esi wodze agbagba be yewoaxe mɔ na mí be míagaƒo nu na dukɔwo me tɔwo ne woakpɔ ɖeɖe o.+ Ale ɣesiaɣi wona woƒe nu vɔ̃wo yɔ gba go. Ke eƒe dziku la va wo dzi mlɔeba.+
17 Ke nɔviwo, esi mía kpli mi dome klã ɣeyiɣi kpui aɖe (le ŋutilã me, menye le míaƒe dzi me ya o), eye miele mía dzrom vevie ta la, míedze agbagba ɖe sia ɖe be míagakpɔ mia ŋkume.
18 Esia tae míeɖoe be míava mia gbɔ, ɛ̃, nye Paulo, medze agbagba menye zi ɖeka o, ke boŋ zi eve sɔŋ; ke Satana tu afɔ eme.
19 Elabena nu kae nye míaƒe mɔkpɔkpɔ alo dzidzɔ alo aseyetsotso ƒe dziɖuɖukuku le mía Aƒetɔ Yesu ŋkume le eƒe anyinɔɣi la? Alo menye miawoe oa?+
20 Ɛ̃, miawoe nye míaƒe bubu kple dzidzɔ.
