1 Fiawo 18:1-46
18 Le ɣeyiɣi aɖe megbe la, Yehowa ƒe gbe va na Eliya le ƒe etɔ̃lia me+ be: “Yi nàɖe ɖokuiwò fia Ahab, elabena mana tsi nadza ɖe anyigba la dzi.”+
2 Eya ta Eliya yi be yeaɖe ye ɖokui afia Ahab esime dɔtoto la nu sẽ+ le Samaria.
3 Eye Ahab yɔ eƒe aƒedzikpɔla Obadiya vɛ. (Obadiya vɔ̃a Yehowa ŋutɔ,
4 Esi Izebel+ nɔ Yehowa ƒe nyagblɔɖilawo wum la, Obadiya kplɔ nyagblɔɖila alafa ɖeka yi ɖaɣla ɖe agado me blaatɔ̃blaatɔ̃, eye wònaa abolo kple tsi wo.)
5 Ahab gblɔ na Obadiya be: “Yi ɖatsa le anyigba la dzi, le tsidzɔƒewo katã kple tɔʋuwo katã me. Ðewohĩ míakpɔ gbe na sɔawo kple tedzisɔawo be woatsi agbe, ne lãawo katã nagatsrɔ̃ na mí o.”
6 Eye woma anyigba si dzi woatsa le la ɖe wo nɔewo dome. Ahab lé eƒe mɔ tsɔ, eye Obadiya hã lé eƒe mɔ tsɔ.
7 Esi Obadiya le mɔa dzi la, Eliya va do goe. Enumake ekpɔe dze sii, eye wòtsyɔ mo anyi gblɔ be: “Nye aƒetɔ Eliya,+ wòe nye esia?”
8 Eɖo eŋu be: “Nyee. Yi ɖagblɔ na wò aƒetɔ be: ‘Eliya le afii.’”
9 Ke egblɔ be: “Nu vɔ̃ kae mewɔ be nàtsɔ wò dɔla ade Ahab si ne wòawu?
10 Zi ale si Yehowa wò Mawu le agbe la, dukɔ alo fiaɖuƒe aɖeke meli, si me nye aƒetɔ medɔ ame ɖo be woadi wò o. Ne wogblɔ be: ‘Mele afi sia o’ la, enana fiaɖuƒe la kple dukɔ la kaa atam be yewomekpɔ wò o.+
11 Azɔ nèle gbɔgblɔm be: ‘Yi ɖagblɔ na wò aƒetɔ be: “Eliya le afii.”’
12 Ne medzo le gbɔwò ko la, Yehowa ƒe gbɔgbɔ akɔ wò adzoe+ ayi afi si nyemanya o; eye ne meva gblɔe na Ahab, gake meke ɖe ŋuwò o la, awum godoo. Evɔ wònye wò dɔla vɔ̃a Yehowa tso eƒe ɖevime ke hafi.
13 Ðe womegblɔ nu si mewɔ esime Izebel nɔ Yehowa ƒe nyagblɔɖilawo wum, ale si meɣla Yehowa ƒe nyagblɔɖila alafa ɖeka ɖe agado me blaatɔ̃blaatɔ̃, eye menɔ abolo kple tsi nam wo la na nye aƒetɔ oa?+
14 Ke azɔ nèle gbɔgblɔm be: ‘Yi ɖagblɔ na wò aƒetɔ be: “Eliya le afii.”’ Awum godoo.”
15 Ke Eliya gblɔ be: “Zi ale si aʋakɔwo ƒe Yehowa, ame si mesubɔna* le agbe la, maɖe ɖokuinye afiae egbea.”
16 Eya ta Obadiya yi ɖakpe Ahab hegblɔe nɛ, eye Ahab yi ɖado go Eliya.
17 Esi Ahab nya kpɔ Eliya ko la, enumake Ahab biae be: “Wò, ame si he vɔ̃ va Israel dzi lae nye esia?”
18 Eɖo eŋu be: “Menye nyee he vɔ̃ va Israel dzi o, ke boŋ wò kple fofowò ƒe aƒee, le esi miegblẽ Yehowa ƒe sededewo ɖi hedze Baalwo yome ta.+
19 Azɔ dɔ ame woayi aɖayɔ Israel blibo la va ƒo ƒu ɖe gbɔnye le Karmel To+ la gbɔ hekpe ɖe Baal ƒe nyagblɔɖila alafa ene blaatɔ̃ kple Asera*+ ƒe nyagblɔɖila alafa ene, siwo ɖua nu le Izebel ƒe kplɔ̃ ŋu la ŋuti.”
20 Ale Ahab dɔ ame ɖo ɖe Israel-viwo katã, eye woƒo nyagblɔɖilawo nu ƒu ɖe Karmel To la gbɔ.
21 Eye Eliya te ɖe dukɔ blibo la ŋu gblɔ be: “Ɣekaɣi miatsi evedomesi ase ɖo?+ Ne Yehowae nye Mawu vavã la, ekema midze eyome;+ ke ne Baal ye la, ekema midze eyome!” Ke dukɔa meɖo nya aɖeke ŋu nɛ o.
22 Eye Eliya gblɔ na dukɔ la be: “Nye ɖeka koe nye Yehowa ƒe nyagblɔɖila si susɔ,+ ke Baal ƒe nyagblɔɖilawo ya le ame alafa ene blaatɔ̃.
23 Azɔ mina woatsɔ nyitsui eve vɛ na mí, eye woawo natia nyitsui ɖeka aflii aɖo nake dzi, ke womade dzo ete o. Nye hã mawu nyitsui evelia atsɔ aɖo nake dzi, ke nyemade dzo ete o.
24 Miayɔ mia mawu la ŋkɔ,+ eye nye hã mayɔ Yehowa ŋkɔ. Mawu si ana dzo nafiã vɔsalãa la, eyae nye Mawu vavã la.”+ Eye dukɔ blibo la katã ɖo eŋu be: “Nya si nègblɔ la nyo.”
25 Azɔ Eliya gblɔ na Baal ƒe nyagblɔɖilawo be: “Miawo mitia nyitsui ɖeka gbã, eye miawui, elabena miawoe sɔ gbɔ. Eye miyɔ mia mawu la ŋkɔ, gake migade dzo ete o.”
26 Ale wolé nyitsui si wotsɔ na wo hewui, eye wole Baal ŋkɔ yɔyɔ dzi tso ŋdi va se ɖe ɣeɖota, le gbɔgblɔm be: “Oo Baal, tɔ na mí!” Ke gbe aɖeke meɖi o, eye ame aɖeke metɔ o.+ Eye wole kpo tim le xlã ƒom vɔsamlekpui si woɖi la.
27 Eye le ɣeɖota lɔƒo la, Eliya de asi fewuɖuɖu me le wo ŋu hegblɔ be: “Mido ɣli sesĩe! Elabena mawu wònye!+ Ðewohĩ eyi ŋugble me ʋĩi, alo eyi nugodo.* Alo ɖewohĩ ele alɔ̃ dɔm, eye wòhiã be woanyɔe!”
28 Ale wodo ɣli nɔ eyɔm sesĩe, eye wotsɔ hɛ kple akplɔ nɔ wo ɖokuiwo sim le woƒe kɔnu la nu va se ɖe esime ʋu ɖuɖu le wo ŋu.
29 Ɣe trɔ, gake woyi edzi le nugbenugbe wɔm* va se ɖe fiẽnuɖuvɔsaɣi, ke gbe aɖeke meɖi o eye ame aɖeke metɔ o; ame aɖeke meɖo to o.+
30 Azɔ Eliya gblɔ na dukɔ blibo la be: “Mite va gbɔnye.” Eye dukɔ blibo la te va egbɔ. Eɖɔ Yehowa ƒe vɔsamlekpui si wogbã la ɖo.+
31 Eye Eliya tsɔ kpe wuieve le Yakob, ame si Yehowa ƒe gbe va na be, “Israel anye wò ŋkɔ”+ la, ƒe viŋutsuwo ƒe toawo ƒe xexlẽme nu.
32 Eye wòtsɔ kpeawo ɖi vɔsamlekpui+ le Yehowa ƒe ŋkɔ me. Eye wòɖe ʋe si keke, ale be woate ŋu aƒã lu seya* eve ɖe eme la, ƒo xlã vɔsamlekpui la godoo.
33 Emegbe eɖo nakeawo, eye wòfli nyitsui la tsɔ ɖo nakeawo dzi.+ Azɔ egblɔ be: “Midu tsi kɔ ɖe ze gã ene me woayɔ, eye mitrɔe kɔ ɖe numevɔsalã la kple nakeawo dzi.”
34 Eye wògblɔ be: “Migawɔe ake.” Eye wogawɔe. Eye wògagblɔ ake be: “Migawɔe zi etɔ̃lia.” Eye wowɔe zi etɔ̃lia.
35 Ale tsi la gbagba ɖe vɔsamlekpui la ŋu godoo, eye wokɔ tsi ɖe ʋe la hã me wòyɔ.
36 Le fiẽnuɖuvɔsaɣi lɔƒo la,+ nyagblɔɖila Eliya te va gblɔ be: “Oo Yehowa, Abraham,+ Isak+ kple Israel ƒe Mawu, na woanyae egbea be wòe nye Mawu le Israel, eye menye wò subɔla, eye be wò nya nue mewɔ nu siawo katã le.+
37 Tɔ nam, Oo Yehowa! Tɔ nam, ne dukɔ sia nanyae be wò, Yehowa, ye nye Mawu vavã la, eye be wòe le woƒe dziwo trɔm ɖe ŋuwò.”+
38 Eye Yehowa ƒe dzo ge tso dzi va fiã numevɔsalã la,+ nakeawo, kpeawo kple ke la, eye wòno tsi si le ʋea me la keŋkeŋ.+
39 Esi dukɔ blibo la kpɔe la, enumake wotsyɔ mo anyi gblɔ be: “Yehowae nye Mawu vavã la! Yehowae nye Mawu vavã la!”
40 Eye Eliya gblɔ na wo be: “Milé Baal ƒe nyagblɔɖilawo! Migana wo dometɔ ɖeka hɔ̃ hã nasi o!” Enumake wolé wo, eye Eliya kplɔ wo yi Kison-tɔʋu+ la nu, eye wòwu wo le afi ma.+
41 Azɔ Eliya gblɔ na Ahab be: “Yi nàɖu nu ano nu, elabena mele tsidzadza gã aɖe ŋkɔ sem.”+
42 Eye Ahab yi be yeaɖu nu ano nu. Ke Eliya yi Karmel To la dzi, eye wòbɔbɔ ɖe anyigba hetsɔ mo de atame.+
43 Eye wògblɔ na eƒe subɔvi be: “Meɖe kuku, lia toa, ne nàkpɔ ƒu gome ɖa.” Eye wòyi ɖakpɔe hegbɔ va gblɔ be: “Naneke meli o.” Eye wògblɔ zi gbɔ zi adre be, “Gbugbɔ yi.”
44 Esi wòyi zi adrelia la, egblɔ be: “Kpɔ ɖa! Alilikpo vi aɖe si le abe ame ƒe asiƒome ene la le hohom tso ƒua me.” Eye wògblɔ be: “Yi ɖagblɔ na Ahab be, ‘Tsi lãwo ɖe tasiaɖam ŋu! Trɔ dzo kaba ne tsi gã la nagasika wò ɖi o!’”
45 Kasia alilikpo xe dziƒo ŋkume tsiɖitsiɖi, ya nɔ ƒoƒom, eye tsi gã aɖe dza.+ Ke Ahab do tasiaɖam heyi Yezreel.+
46 Yehowa ƒe asi va Eliya dzi, eye wòbla ali dzi heƒu du dze Ahab ŋgɔ va ɖo keke Yezreel ke.
Etenuŋɔŋlɔ
^ Egɔmeɖeɖe tẽe, “ame si ŋkume mele tsitre ɖo.”
^ Kpɔ Nya Tɔxɛwo Gɔmeɖeƒea.
^ Agate ŋu afia, “ezɔ mɔ.”
^ Alo, “le nu wɔm abe nyagblɔɖilawo ene.”
^ Seya ɖeka le lita 7.33. Kpɔ Megbenyawo B14.
