1 Kronika 29:1-30
29 Eyome Fia David gblɔ na ha blibo la be: “Vinye Salomo, ame si Mawu tia la,+ nye ɖekakpui dzaa ko, eye nuteƒekpɔkpɔ boo mesu esi o,+ evɔ dɔ la lolo, elabena menye amegbetɔe wole gbedoxɔ* sia tu ge na o, ke boŋ Yehowa Mawue.+
2 Mewɔ nu sia nu si mate ŋui tsɔ dzra ɖo ɖe nye Mawu ƒe aƒe la ŋu: sika ɖe sikadɔwo ŋu, klosalo ɖe klosalodɔwo ŋu, akɔbli ɖe akɔblidɔwo ŋu, gayibɔ ɖe gayibɔdɔwo+ ŋu, ati+ ɖe atidɔwo ŋu, oniks-kpewo, kpe siwo woaɖo, kpe ŋɔŋɔewo, kpe xɔasiwo katã ƒomevi, kple alabastrokpewo kpaŋkpaŋ.
3 Gawu la, esi mekpɔ dzidzɔ ɖe nye Mawu ƒe xɔ+ la ŋu ta la, nye ŋutɔ hã metsɔ nye kesinɔnu+ siwo nye sika kple klosalo na ɖe nye Mawu ƒe xɔ la ŋu hekpe ɖe nu siwo katã medzra ɖo ɖe xɔ kɔkɔea ŋuti la ŋu,
4 Ofir+ sika talento* akpe etɔ̃ kple klosalo si ŋu wodza talento akpe adre, ne woatsɔ afa ɖe xɔawo ƒe gliawo ŋu,
5 sika ɖe sikadɔwo ŋu, klosalo ɖe klosalodɔwo kple dɔ siwo katã aɖaŋudɔwɔlawo ƒe asi awɔ la ŋu. Azɔ ame kae lɔ̃ faa le eɖokui si egbea be yeana nu Yehowa?”+
6 Eye tatɔ siwo le wo fofowo ƒe aƒekɔwo nu kple Israel-toawo ƒe tatɔwo kpakple ame akpe kple ame alafa ƒe tatɔwo+ kple fia ƒe dɔ dzi kpɔlawo+ lɔ̃ faa.
7 Ale wona sika si ƒe home ade talento akpe atɔ̃ kple dariko* akpe ewo, klosalo si ƒe home ade talento akpe ewo, akɔbli si ƒe home ade talento akpe wuienyi kple gayibɔ si ƒe home ade talento akpe alafa ɖeka, ɖe Mawu vavã la ƒe aƒe la ŋuti dɔa ŋu.
8 Eye ame siwo katã si kpe xɔasiwo le la tsɔ wo na be woatsɔ wo ade Yehowa ƒe aƒe la me kesinɔnudzraɖoƒe le Yehiel,+ Gerson+ vi, ƒe dzikpɔkpɔ te.
9 Eye dukɔ la kpɔ dzidzɔ le esi wolɔ̃ faa na nu ta, elabena wona nu Yehowa tso dzi blibo me,+ eye Fia David ŋutɔ hã kpɔ dzidzɔ eteƒe mekɔ o.
10 Ale David kafu Yehowa le ha blibo la ŋkume gblɔ bena: “Oo Yehowa, mía fofo Israel ƒe Mawu, woakafu wò tso mavɔ me yi mavɔ me.
11 Oo Yehowa, tɔwòe nye gãnyenye,+ ŋusẽ,+ atsyɔ̃, nyonyo kple bubu;+ elabena nu sia nu si le dziƒowo kple anyigba dzi la, tɔwòe.+ Oo Yehowa, tɔwòe nye fiaɖuƒe,+ wòe ɖo kpo ɖe nuwo katã dzi.
12 Kesinɔnu kple ŋutikɔkɔe tso gbɔwò,+ eye nèɖu nuwo katã dzi,+ asiwò me ŋusẽ+ kple ŋutete+ le, eye gbɔwò wòtsona be ame nazu gã,+ eye wòe naa ŋusẽ amewo katã.+
13 Eya ta Oo mía Mawu, míele akpe dam na wò, eye míele wò ŋkɔ dzeani la kafum.
14 “Gake ame kae menye, eye ame kae nye dukɔ la nye, be míete ŋu na nu faa alea? Elabena gbɔwòe nuwo katã tso, eye wò ŋutɔ asiwò me míexɔ wo le hetsɔ na wò.
15 Elabena amedzrowoe míenye le ŋkuwòme, eye ɖe míeva tsi afi sia abe mía tɔgbuiwo katã ene.+ Míaƒe ŋkekewo le abe vɔvɔli+ ene le anyigba dzi, eye mɔkpɔkpɔ aɖeke mele wo ŋu o.
16 Oo Yehowa mía Mawu, nu gbogbo siawo, siwo míedzra ɖo be míatsɔ atu xɔ na wò ŋkɔ kɔkɔea la, asiwò mee wotso, eye tɔwòe wo katã wonye.
17 Oo nye Mawu, menyae nyuie be wòe dzroa dziwo me kpɔna,+ eye be nuteƒewɔwɔ*+ nyoa ŋuwò. Nye la, mena nu siawo katã faa kple dzimekɔkɔ, eye azɔ edzɔ dzi nam ŋutɔ be mekpɔ wò dukɔ si le afi sia wòlɔ̃ na nu wò faa.
18 Oo Yehowa, mía tɔgbui Abraham, Isak kple Israel ƒe Mawu, na esia nanye wò dukɔ ƒe dzimesusuwo kple tameɖoɖo ɖaa eye nàtrɔ woƒe dziwo ɖe ɖokuiwò ŋu.+
19 Eye na dzi blibo+ vinye Salomo, ne wòalé wò sededewo,+ wò ŋkuɖodzinyawo kple wò ɖoɖowo me ɖe asi, eye wòawɔ nu siawo katã ahatu gbedoxɔ* si ŋu medzra nuwo ɖo ɖo la.”+
20 Eye David gblɔ na ha blibo la be: “Azɔ mikafu Yehowa mia Mawu la.” Eye ha blibo la katã kafu Yehowa wo tɔgbuiwo ƒe Mawu la, eye wobɔbɔ de ta agu ɖe Yehowa kple fia la ŋkume.
21 Le ŋufɔke la, wosa vɔ na Yehowa, eye wosa numevɔwo+ na Yehowa: nyitsui akpe ɖeka, agbo akpe ɖeka, alẽtsui akpe ɖeka kple wo ŋuti nunovɔsawo;+ wosa vɔ gbogbo aɖe ɖe Israel blibo la katã ta.+
22 Eye woɖu nu no nu le Yehowa ŋkume gbe ma gbe kple dzidzɔ gã aɖe,+ eye wogaɖo David vi Salomo fiae zi evelia, wosi ami nɛ na Yehowa wòzu kplɔla,+ eye wosi ami na Zadok hã wòzu nunɔla.+
23 Eye Salomo bɔbɔ nɔ Yehowa ƒe fiazikpui dzi+ hezu fia ɖe fofoa David teƒe, nu dze edzi nɛ, eye Israel-viwo katã ɖo toe.
24 Amegãwo+ katã kple aʋakalẽtɔwo+ kpakple Fia David+ viwo katã bɔbɔ wo ɖokuiwo ɖe Fia Salomo te.
25 Yehowa do gã Salomo ale gbegbe le Israel blibo la katã ŋkume, eye wòna fianyenye ƒe bubu nɔ eŋu wu fia siwo ɖu Israel dzi do ŋgɔ nɛ la katã.+
26 Ale David, Isai vi, ɖu fia ɖe Israel blibo la katã dzi,
27 eɖu fia ɖe Israel dzi ƒe blaene. Eɖu fia le Hebron ƒe adre,+ eye wòɖu fia le Yerusalem ƒe blaetɔ̃ vɔ etɔ̃.+
28 Enɔ agbe tsi nyuie, eye agbenɔnɔ, kesinɔnu kple bubu ɖi kɔ nɛ hafi wòku;+ eye via Salomo zu fia ɖe eteƒe.+
29 Fia David ŋutinyawo, tso gɔmedzedze va se ɖe nuwuwu la, woŋlɔ wo ɖe nukpɔla Samuel ƒe ŋutinyawo, nyagblɔɖila Natan+ ƒe ŋutinyawo kple ŋutegakpɔla Gad+ ƒe ŋutinyawo me,
30 hekpe ɖe eƒe dziɖuɖu blibo la, eƒe kalẽwɔwɔ kple nu siwo dzɔ ɖe eya ŋutɔ dzi kple nu siwo dzɔ ɖe Israel kpakple fiaɖuƒe siwo katã le anyigba mawo dzi la ŋuti.
Etenuŋɔŋlɔ
^ Alo, “mɔ́; fiasã.”
^ Talento ɖeka le kilogram 34.2. Kpɔ Nya Tɔxɛwo Gɔmeɖeƒea.
^ Persiatɔwo ƒe sikagaku. Kpɔ Megbenyawo B14.
^ Alo, “dzimekɔkɔ; nu dzɔdzɔe wɔwɔ.”
^ Alo, “mɔ́; fiasã.”
