1 Samuel 1:1-28
1 Ŋutsu aɖe tso Ramatayim-Zofim*+ le Efrayim+ tonuto la me, eŋkɔe nye Elkana,+ enye Yeroham vi, Elihu vi, Tohu vi, Zuf vi, eye wònye Efrayimtɔ.
2 Srɔ̃ eve nɔ esi; ɖeka ŋkɔe nye Hana, eye evelia ŋkɔe nye Penina. Penina dzi vi, ke Hana ya medzi vi aɖeke o.
3 Ŋutsu sia tsoa wo de ƒe sia ƒe yina ɖadea ta agu hesaa vɔ na aʋakɔwo ƒe Yehowa, le Silo.+ Afi mae Eli vi eveawo, Hofni kple Finehas,+ nye nunɔlawo na Yehowa le.+
4 Gbe ɖeka esi Elkana sa vɔ la, ena vɔsalã la ƒe akpa aɖewo srɔ̃a Penina kple viaŋutsuwo kpakple vianyɔnuwo katã,+
5 ke ena akpa tɔxɛ aɖe Hana ya, elabena Hana ye wòlɔ̃ wu; gake Yehowa mena wòdzi vi o.*
6 Gawu la, atsusia ɖea alɔme le eŋu atraɖii tsɔ nɔa dziku dom nɛ, le esi Yehowa mena wòdzi vi o ta.
7 Aleae wòwɔna ƒe sia ƒe, ne Hana yi Yehowa+ ƒe aƒea me la, atsusia ɖea alɔme le eŋu ale gbegbe be Hana nɔa avi dzi hegbea nuɖuɖu.
8 Ke srɔ̃a Elkana bianɛ be: “Hana, nu ka ta nèle avi fam, nu ka ŋuti nègbe nuɖuɖu, eye nu ka ŋuti nèle nu xam vevie alea?* Ðe nyemenyo na wò wu viŋutsu ewo oa?”
9 Esi woɖu nu eye wono nu vɔ le Silo la, Hana tso; ɣemaɣi la nunɔla Eli nɔ anyi ɖe zikpui dzi le Yehowa ƒe gbedoxɔ*+ la ƒe ʋɔtru nu.
10 Eye Hana nɔ nu xam* vevie, eye wòde asi gbedodoɖa me na Yehowa+ hele avi fam hehehe.
11 Eye wòɖe adzɔgbe sia be: “Oo aʋakɔwo ƒe Yehowa, ne èkpɔ wò dɔlanyɔnu la ƒe fukpekpe ɖa, eye nèɖo ŋku dzinye, mèŋlɔ wò dɔlanyɔnu be o, eye nèna ŋutsuvi+ wò dɔlanyɔnu la, ekema matsɔe ana Yehowa le eƒe agbemeŋkekewo katã me, eye talũhɛ aɖeke made ta ŋu nɛ o.”+
12 Esi wòle gbe dom ɖa eteƒe didi le Yehowa ŋkume la, Eli nɔ ŋku lém ɖe eƒe nu ŋu.
13 Hana le nu ƒom le dzi me, eƒe nuyiwo koe nɔ ʋaʋãm butubutu, ke eƒe gbe mele ɖiɖim o. Eya ta Eli ya bu be ahae wòmu.
14 Eli biae be: “Ɣekaɣie nàmu aha ase ɖo? Dzudzɔ ahanono dzro.”
15 Eye Hana ɖo eŋu nɛ be: “Gbeɖe, nye aƒetɔ! Nyɔnu si dzi nu te ɖo* vevie menye; nyemeno wain alo aha muame aɖeke o, ke boŋ nye luʋɔe* metrɔ ƒo ɖe Yehowa ŋkume.+
16 Mègabu wò dɔlanyɔnu yakamee o, elabena nye dzimaɖitsitsi kple nye vevesese gbogboawo ŋue mele nu ƒom le va se ɖe fifia.”
17 Eli gblɔ nɛ be: “Heyi le ŋutifafa me, eye Israel ƒe Mawu la nawɔ nu si nèbiae la na wò.”+
18 Eɖo eŋu be: “Ne ève wò dɔlanyɔnu la nu ko.” Eye nyɔnua lé eƒe mɔ heyi ɖaɖu nu, eye megaɖo nublanuimo azɔ o.
19 Emegbe wofɔ ŋdi kanya yi ɖade ta agu le Yehowa ŋkume, eye wotrɔ yi aƒe le Rama.+ Eye Elkana dɔ kple srɔ̃a Hana, eye Yehowa trɔ susu ɖe eŋu.*+
20 Ale le ƒea me* la, Hana fɔ fu dzi ŋutsuvi, eye wòna ŋkɔe+ be Samuel,* elabena egblɔ be, “Yehowa si mee mebiae le.”
21 Le ɣeyiɣi aɖe megbe la, Elkana kple eƒe aƒe blibo la yi be wòasa ƒe sia ƒe vɔ na Yehowa+ ahana eƒe adzɔgbeɖenunana.
22 Ke Hana ya meyi o,+ elabena egblɔ na srɔ̃a be: “Ne menya tso no na ɖevia ko la, makplɔe ayii; ne wòado ɖe Yehowa ŋkume, eye wòanɔ afi ma koŋ.”+
23 Eye srɔ̃a Elkana gblɔ nɛ be: “Wɔ nu si nèkpɔ be enyo la. Tsi anyi va se ɖe esime nètso no nɛ. Yehowa newɔ nya si nègblɔ la dzi.” Ale nyɔnu la tsi aƒe, eye wòna no via, va se ɖe esime wòtso no nɛ.
24 Esi wòtso no nɛ ko la, ekplɔe yi Silo. Etsɔ nyitsu si xɔ ƒe etɔ̃ kple wɔ efa ɖeka* kpakple wain ze gã ɖeka kpe ɖe eŋuti yi+ Yehowa ƒe me le Silo.+ Eye ɖevi la le eŋu.
25 Wowu nyitsu la, eye wokplɔ ɖevi la yi na Eli.
26 Hana gblɔ nɛ be: “Nye aƒetɔ, meɖe kuku! Zi ale si nèle agbe* la, nyee nye nyɔnu si nɔ tsitre ɖe gbɔwò afi sia nɔ gbe dom ɖa na Yehowa.+
27 Ðevi sia tae medo gbe ɖa le, eye Yehowa wɔ nu si mebiae la nam.+
28 Nye hã mele etsɔm na* Yehowa. Ŋkeke ale si wòle agbe la, anye ame si wotsɔ na Yehowa.”
Eye wòde ta agu* na Yehowa le afi ma.
Etenuŋɔŋlɔ
^ Alo, “tso Rama, enye Zuftɔ.”
^ Egɔmeɖeɖe tẽe, “xe eƒe vidzidɔ.”
^ Alo, “nu ka ŋuti wò dzi le nu xam?”
^ Efia, avɔgbadɔ.
^ Alo, “Hana ƒe luʋɔ nɔ nu xam.”
^ Kpɔ Nya Tɔxɛwo Gɔmeɖeƒea.
^ Alo, “nyɔnu si ƒe gbɔgbɔ dzi nu te ɖo.”
^ Egɔmeɖeɖe tẽe, “ɖo ŋku edzi.”
^ Agate ŋu afia “Le ɣeyiɣi si sɔ dzi.”
^ Egɔmee nye, “Mawu Ƒe Ŋkɔ.”
^ Anɔ Lita 22. Kpɔ Megbenyawo B14.
^ Alo, “Zi ale si wò luʋɔ le agbe.”
^ Le Hebrigbe me la, efia “mele edom na.”
^ Edze ƒãa be Elkana ye wowɔnɛ.
