1 Samuel 28:1-25
-
Saul yi ŋɔliyɔla aɖe gbɔ le En-Dor (1-25)
28 Le ŋkeke mawo me la, Filistitɔwo ƒe aʋakɔ la va ƒu asaɖa anyi be yewoawɔ aʋa kple Israel.+ Eya ta Akis gblɔ na David be: “Nyae be wò kple wò amewo miayi aʋa la kpli mí.”+
2 David ɖo eŋu na Akis be: “Wò ŋutɔ ènya nu si wò subɔvi awɔ.” Eya ta Akis gblɔ na David be: “Esia tae matsɔ wò aɖo ŋunyedzɔlae ɖaa.”*+
3 Ɣemaɣi la, Samuel ku, eye Israel blibo la katã fae, eye woɖii ɖe Rama le eƒe du me.+ Eye Saul ɖe ŋɔliyɔlawo kple nukalawo katã ɖa le anyigba la dzi.+
4 Filistitɔwo ƒo ƒu heva ƒu asaɖa anyi ɖe Sunem.+ Eya ta Saul hã ƒo Israel blibo la nu ƒu, eye wova ƒu asaɖa anyi ɖe Gilboa.+
5 Esi Saul kpɔ Filistitɔwo ƒe asaɖaa la, vɔvɔ̃ ɖoe, eye dzika tso eƒo ŋutɔ.+
6 Togbɔ be Saul biaa gbe Yehowa hã la,+ Yehowa meɖoa eŋu nɛ to drɔ̃e me loo, to Urim+ la dzi loo, alo to nyagblɔɖilawo dzi o.
7 Mlɔeba Saul gblɔ na eƒe dɔlawo be: “Midi nyɔnu ŋɔliyɔla+ aɖe nam, ne mayi aɖabia nu ta se le egbɔ.” Eye eƒe dɔlawo gblɔ nɛ be: “Kpɔ ɖa! Nyɔnu ŋɔliyɔla aɖe le En-Dor.”+
8 Eya ta Saul trɔ eƒe dzedzeme hedo awu bubuwo, eye eya kple ŋutsu eve woyi nyɔnu la gbɔ le zã me. Eye wògblɔ be: “Meɖe kuku, ka nu+ nàyɔ ame si mayɔ na wò la nam.”
9 Ke nyɔnua gblɔ nɛ be: “Kpɔ ɖa, ènya nu si Saul wɔ la nyuie, ale si wòɖe ŋɔliyɔlawo kple nukalawo ɖa le anyigba la dzi.+ Ekema nu ka tae nèle mɔ̃ trem nam* ne woawum?”+
10 Saul ka atam nɛ le Yehowa ƒe ŋkɔ me be: “Zi ale si Yehowa le agbe la, fɔɖiɖi aɖeke manɔ dziwò le nya sia me o!”
11 Eya ta nyɔnua biae be: “Ame kae nàdi be mayɔ avɛ na wò?” Eɖo eŋu be: “Yɔ Samuel vɛ nam.”
12 Esi nyɔnua kpɔ “Samuel”*+ la, edo ɣli sesĩe eye nyɔnua bia Saul be: “Nu ka tae nèflum? Evɔ wònye wòe nye Saul hafi!”
13 Ke fia la gblɔ nɛ be: “Mègavɔ̃ o; nu kae nèkpɔ?” Nyɔnua ɖo eŋu na Saul be: “Mekpɔ ame aɖe si le abe mawu aɖe ene wòle dodom tso anyigba me.”
14 Enumake ebiae be: “Aleke eƒe dzedzeme le?” Eɖo eŋu be: “Ame si do gbɔna la nye amegãɖeɖi, eye wòdo awu ʋlaya si ŋu abɔ mele o.”+ Enumake Saul dze sii be “Samuel” ye, eya ta ebɔbɔ tsyɔ mo anyi.
15 Eye “Samuel” bia Saul be: “Nu ka tae nèɖe fu nam, be nèna woyɔm vɛ?” Saul ɖo eŋu be: “Meɖo xaxa gã aɖe me. Filistitɔwo le aʋa wɔm kplim, evɔ Mawu hã ʋu le gbɔnye, eye megaɖoa nya ŋu nam to nyagblɔɖilawo dzi loo alo drɔ̃e me o;+ eya tae meyɔ wò be nàgblɔ nu si mawɔ la nam.”+
16 Eye “Samuel” gblɔ be: “Fifia si Yehowa gblẽ wò ɖi+ hezu wò futɔ ɖe, nu ka tae nèle nu biamem?
17 Yehowa awɔ abe ale si tututu wògblɔ to dzinye ene: Yehowa adu fiaɖuƒe la le asiwò atsɔ ana hawòviwo dometɔ ɖeka si nye David.+
18 Esi mèɖo to Yehowa ƒe gbe o, eye mèna eƒe dziku helĩhelĩ va Amalek+ dzi o tae Yehowa le nu siawo wɔm wò egbea ɖo.
19 Azɔ hã, Yehowa atsɔ Israel kple wò ŋutɔ ade asi na Filistitɔwo,+ eye etsɔ la, wò+ kple viwòŋutsuwo+ miava do ɖe gbɔnye. Yehowa atsɔ Israel ƒe aʋakɔ la gɔ̃ hã ade asi na Filistitɔwo.”+
20 Enumake Saul tsra ɖe anyigba dremu eye vɔvɔ̃ ɖoe ŋutɔ le “Samuel” ƒe nyawo ta. Eye ŋusẽ aɖeke megale eŋu o, elabena meɖu nu ŋkeke blibo la kple zã blibo la katã o.
21 Esi nyɔnua va Saul gbɔ hekpɔ be nya la ɖe fu nɛ ale gbegbe la, egblɔ nɛ be: “Wò dɔlanyɔnu ɖo to wò gbe, eye metsɔ nye agbe de afɔku me*+ hewɔ nu siwo nègblɔ nam.
22 Eya ta meɖe kuku, ɖo to wò dɔlanyɔnu ƒe gbe. Na matsɔ abolo vi aɖe aɖo akɔwòme nàɖu, ale be ŋusẽ naɖo ŋuwò nàtrɔ adzo.”
23 Ke egbe gblɔ be: “Nyemaɖu nu o.” Ke hã, eƒe dɔlawo kple nyɔnu la siaa ƒoe ɖe enu. Mlɔeba eɖo to wo, eye wòtso le anyigba hebɔbɔ nɔ aba dzi.
24 Ke nyivi dami aɖe le nyɔnu la si le aƒea me. Eya ta ewɔ kaba tsoe,* eye wòku wɔ blui hetsɔe mè amɔwɔ maʋamaʋã bolo.
25 Eye wòtsɔ wo ɖo Saul kple eƒe dɔlawo kɔme woɖu. Emegbe wotso dzo le zã ma me.+
Etenuŋɔŋlɔ
^ Egɔmeɖeɖe tẽe, “tanyekpɔlae ɖaa.”
^ Alo, “na nye luʋɔ.”
^ Woƒo nu tso nudzɔdzɔ sia ŋu abe ale si gbɔgbɔ vɔ̃ aɖe si wɔ eɖokui abe Samuel ene la ɖee fia ŋɔliyɔlaa ene.
^ Alo, “metsɔ nye luʋɔ de nye asiƒome.”
^ Alo, “tsɔe sa vɔe.”
