2 Kronika 13:1-22
13 Le Fia Yeroboam ƒe ƒe wuienyilia me la, Abiya zu fia le Yuda.+
2 Eɖu fia le Yerusalem ƒe etɔ̃. Dadaa ŋkɔe nye Mikaya,+ eye wònye Uriel si tso Gibea+ ƒe vinyɔnu. Eye aʋa dzɔ ɖe Abiya kple Yeroboam+ dome.
3 Abiya tsɔ aʋakɔ si me aʋawɔla bibi* akpe alafa ene le la wɔ aʋa la.+ Eye Yeroboam hã tsɔ aʋawɔla bibi* akpe alafa enyi kpe aʋa kplii.
4 Eye Abiya tɔ ɖe Zemarayim To, si le Efrayim tonutoa me la dzi, eye wògblɔ be: “Oo Yeroboam kple Israel blibo la, miɖo tom.
5 Ðe mienyae be Yehowa, Israel ƒe Mawu la, ŋutɔe to dzenubabla*+ dzi tsɔ fiaɖuƒe na David kple viawo+ ɖe Israel dzi tegbee+ oa?
6 Ke Yeroboam,+ Nebat vi, si nye David vi Salomo ƒe dɔla, tso hedze aglã ɖe eƒe aƒetɔ ŋu.+
7 Eye yakamewo kple ame ɖigbɔwo va wɔ ɖeka kplii. Wodze aglã ɖe Salomo vi Rehabeam ŋu esime Rehabeam nye ɖekakpui, eye dzi menɔ eƒo o, ale be mete ŋu nɔ te ɖe wo nu o.
8 “Azɔ la, miele susum be yewoate ŋu anɔ te ɖe Yehowa ƒe fiaɖuƒe si le David viwo si me la nu, le esi mienye ameha gã aɖe, eye sikanyivi siwo Yeroboam wɔ wonye mawuwo na mi la le mia gbɔ ta.+
9 Alo menye miawoe nya Yehowa ƒe nunɔlawo,+ Aron ƒe dzidzimeviwo, kple Lewi viwo, eye mieɖo nunɔlawo na mia ɖokuiwo abe anyigbadzidukɔ bubuwo ene oa?+ Ame sia ame si tsɔ nyitsui ɖeka kple agbo adre vɛ la, tea ŋu zua nu siwo menye mawuwo o la ƒe nunɔla.
10 Ke míawo ya la, Yehowae nye mía Mawu,+ eye míegblẽe ɖi o; ke boŋ nunɔla siwo nye Aron ƒe dzidzimeviwoe wɔa subɔsubɔdɔ na Yehowa, eye Lewi viwo kpena ɖe wo ŋu.
11 Wotsɔa numevɔsawo kple atike ʋeʋĩ+ doa dzudzɔ na Yehowa ŋdi sia ŋdi kple fiẽ sia fiẽ,+ eye woɖoa aboloawo ɖe wo nɔewo dzi*+ le kplɔ̃ si wotsɔ sika nyuitɔ wɔ la dzi, eye wosia sikakaɖiti+ la ƒe akaɖigbɛawo fiẽ sia fiẽ,+ elabena míewɔa dɔ si Yehowa mía Mawu la ɖo na mí; gake miawo ya miegblẽe ɖi.
12 Eye kpɔ ɖa! Mawu vavã la li kpli mí, eye wònye mía kplɔla, eƒe nunɔla siwo si aʋakpẽwo le be woaku ɖe mia ŋu hã le mía gbɔ. Oo Israel-viwo, migawɔ aʋa kple Yehowa, mia tɔgbuiwo ƒe Mawu la o, elabena madze edzi na mi o.”+
13 Ke Yeroboam dɔ amewo ɖa, ne woayi aɖade xa ɖe wo megbe, ale be eƒe aʋakɔ la dze ŋgɔ Yuda, eye xadelawo nɔ wo megbe.
14 Esi Yuda ŋutsuwo trɔ la, wokpɔ be wodze aʋa ɖe yewo ŋu le ŋgɔ kple megbe. Eye wote ɣlidodo na Yehowa,+ esime nunɔlawo le kpẽawo kum sesĩe.
15 Eye Yuda ŋutsuwo do aʋaɣli. Esi Yuda ŋutsuwo do aʋaɣlia la, Mawu vavã la si Yeroboam kple Israel blibo la le Abiya kple Yuda ŋgɔ.
16 Israel-viwo si le Yuda nu, eye Mawu tsɔ wo de asi na Yuda.
17 Ale Abiya kple eƒe aʋakɔ la wu wo dometɔ gbogbo aɖewo, eye Israel ƒe aʋawɔla bibi* akpe alafa atɔ̃ tsi aʋa.
18 Ale wobɔbɔ Israel-viwo ɖe anyi ɣemaɣi, Yuda-viwo kpe wo dzi, elabena woɖo ŋu ɖe* Yehowa, wo tɔgbuiwo ƒe Mawu la ŋu.+
19 Abiya ti Yeroboam yome, eye wòxɔ duwo le esi. Exɔ Betel+ kple eŋu duwo, Yesana kple eŋu duwo, kpakple Efrayin+ kple eŋu duwo.
20 Ŋusẽ megaɖo Yeroboam ŋu le Abiya ŋɔli o; eye Yehowa ƒoe ƒu anyi wòku.+
21 Ke ŋusẽ ɖo Abiya ŋu eye wòli ke. Eɖe srɔ̃ wuiene,+ eye wòdzi ŋutsuvi blaeve vɔ eve kple nyɔnuvi wuiade.
22 Abiya ŋutinya susɔeawo kple nu siwo wòwɔ kpakple eƒe nyawo la, woŋlɔ wo ɖe nyagblɔɖila Ido+ ƒe nuŋlɔɖiwo* me.
Etenuŋɔŋlɔ
^ Egɔmeɖeɖe tẽe, “tiatia.”
^ Egɔmeɖeɖe tẽe, “tiatia.”
^ Efia, nubabla si nɔa anyi ɖaa si metrɔna o.
^ Efia, ŋkumeɖobolo.
^ Egɔmeɖeɖe tẽe, “tiatia.”
^ Egɔmeɖeɖe tẽe, “woziɔ ɖe.”
^ Alo, “numekɔkɔwo; numeɖeɖewo.”
