2 Mose 2:1-25
2 Ɣemaɣi la, ŋutsu aɖe si tso Lewi-toa me ɖe Lewi nyɔnu aɖe.+
2 Eye nyɔnu la fɔ fu dzi ŋutsuvi. Esi wòkpɔ be edze ɖeka ŋutɔ la, eɣlae dzinu etɔ̃ sɔŋ.+
3 Esi megate ŋu le eɣlam o la,+ etsɔ kusi* si wolɔ̃ kple aƒla, eye wòtsɔ aŋɔ kple aŋe tree keŋ, eye wòtsɔ ɖevi la de eme hetsɔe yi ɖada ɖe aɖawo dome le Nil-tɔsisia to.
4 Ke nɔvianyɔnu+ tɔ ɖe adzɔge be yeakpɔ nu si ava dzɔ ɖe edzi.
5 Ke Farao vinyɔnu va tsi le ge le Nil-tɔsisia me, eye eƒe subɔvinyɔnuwo le tsa ɖim le Nil-tɔsisia to. Kasia Farao vinyɔnua kpɔ kusi la le aɖawo dome. Enumake edɔ eƒe kosi ɖa be wòayi aɖatsɔe vɛ.+
6 Esi wòʋui la, ekpɔ ɖevi la le eme, eye ɖevia le avi fam. Eƒe nu wɔ nublanui nɛ, gake egblɔ be, “Hebritɔwo ƒe viwo dometɔ ɖekae nye esia.”
7 Eye ɖevia nɔvinyɔnu bia Farao vinyɔnu la be: “Mayi aɖayɔ vinɔ aɖe tso Hebri nyɔnuwo dome ne wòana no ɖevia ahakpɔ edzi na wòa?”
8 Farao vinyɔnu la gblɔ nɛ be: “Heyi!” Enumake nyɔnuvi la yi ɖayɔ ɖevia dada vɛ.+
9 Eye Farao vinyɔnu la gblɔ nɛ be: “Xɔ ɖevi sia nàna noe ahakpɔ edzi nam, eye maxe fe na wò.” Ale nyɔnu la kɔ ɖevia, eye wòna noe hekpɔ edzi.
10 Esi ɖevia tsi la, ekplɔe yi na Farao vinyɔnu la, eye wòzu via.+ Ena ŋkɔe be Mose* elabena egblɔ be: “Tsi mee meɖee tsoe.”+
11 Le ŋkeke mawo me esi Mose tsi la,* edo go yi nɔviawo gbɔ be yeakpɔ dɔ sesẽ siwo wɔm wole la ɖa,+ eye wòkpɔ Egiptetɔ aɖe wòle nɔvia Hebritɔ aɖe ƒom.
12 Esi wòtsa ŋku mlamlamla, eye mekpɔ ame aɖeke o la, ewu Egiptetɔ la eye wòɖii ɖe ke me.+
13 Le ŋufɔke la, egado go eye wòkpɔ Hebritɔ eve wole avu wɔm. Eya ta ebia ame si tɔ medzɔ o la be: “Nu ka tae nèle nɔviwò ƒom?”+
14 Ke eya ɖo eŋu be: “Ame kae ɖo wò amegã kple ʋɔnudrɔ̃la ɖe mía nu? Ðe nèdi be yeawu nye hã abe ale si nèwu Egiptetɔ la enea?”+ Ale vɔvɔ̃ ɖo Mose wògblɔ na eɖokui be: “Ei, nya la ɖi wose!”
15 Azɔ Farao se nya la, eye wòdi be yeawu Mose; ke Mose si le Farao nu yi ɖanɔ Midian-nyigba dzi,+ eye wòva bɔbɔ nɔ vudo aɖe to.
16 Ke nyɔnuvi adre le Midian nunɔla si,+ eye wova be yewoadu tsi akɔ ɖe lãwo ƒe tsinonuwo me na wo fofo ƒe alẽwo.
17 Eye alẽkplɔlawo va nya wo ɖa, abe ale si wowɔnɛ ɣesiaɣi ene. Ale Mose tso va kpe ɖe nyɔnuawo ŋu,* eye wòna tsi woƒe alẽawo.
18 Esi wogbɔ va wo fofo Reuel* gbɔ la,+ edo ɣli be: “Aleke wɔ miegbɔ egbea kaba ale?”
19 Woɖo eŋu be: “Egiptetɔ+ aɖee ɖe mí tso alẽkplɔlaawo si me, eye wòdu tsi gɔ̃ hã na mí eye wòna tsi míaƒe alẽawo wono.”
20 Ale wòbia vianyɔnuawo be: “Afi kae ŋutsu la le? Nu ka tae miegblẽe ɖe afi ma? Miyi ɖayɔe vɛ ne wòaɖu nu kpli mí.”
21 Eye Mose lɔ̃ be yeanɔ ŋutsu la gbɔ, eye wòtsɔ via Zipora+ na Mose wòɖe.
22 Emegbe edzi ŋutsuvi, eye wòtsɔ ŋkɔ nɛ be Gersom,*+ elabena egblɔ be: “Amedzroe menye le dzronyigba dzi.”+
23 Le ƒe geɖe megbe* la, Egipte-fia la ku,+ gake Israel-viwo gakpɔtɔ le hũ ɖem le kluvinyenye la ta, wole konyi fam, eye woƒe ɣlidodo be woaxɔ na yewo le kluvinyenyea ta la nɔ Mawu vavã la gbɔ ɖom.+
24 Le ɣeyiɣi aɖe megbe la, Mawu se woƒe hũɖeɖe la,+ eye Mawu ɖo ŋku nu, si wòbla kple Abraham, Isak kple Yakob la dzi.+
25 Ale Mawu kpɔ Israel-viwo ɖa, eye wòtrɔ susu ɖe woƒe nɔnɔmea ŋu.
Etenuŋɔŋlɔ
^ Alo, “aɖaka.”
^ Egɔmee nye, “Woɖee Tso Eme,” efia be, woɖee tso tsi me.
^ Alo, “esi ŋusẽ ɖo Mose ŋu.”
^ Alo, “va xɔ na nyɔnuawo.”
^ Efia, Yetro.
^ Egɔmee nye, “Amedzro Le Afi Ma.”
^ Egɔmeɖeɖe tẽe, “Le ŋkeke geɖe megbe.”
