2 Samuel 8:1-18
8 Le ɣeyiɣi aɖe megbe la, David si Filistitɔwo,+ eye wòbɔbɔ wo ɖe anyi,+ eye David xɔ Meteg-Ama le Filistitɔwo si.
2 Eɖu Moabtɔwo+ hã dzi, ena womlɔ anyi ɖe anyigba, eye wòdzidze wo kple ka. Edzidze ka eve be woawu, eye wòdzidze ka ɖeka be woawo ya natsi agbe.+ Ale Moabtɔwo zu David ƒe subɔviwo hexea adzɔ nɛ.+
3 David ɖu Zoba-fia+ Hadadezer, Rehob vi hã dzi, esime Hadadezer dze mɔ yina be yeagakpɔ ŋusẽ ɖe Frat-tɔsisi la ƒe nutoa dzi.+
4 David lé sɔdola akpe ɖeka alafa adre kple aʋawɔla afɔzɔla akpe blaeve le eƒe amewo dome. Eye David tso agbeka na sɔ siwo katã wotsi ɖe tasiaɖamwo ŋu la, negbe wo dometɔ alafa ɖeka koe wòsusɔ ɖi.+
5 Esi Siriatɔ siwo le Damasko+ va be yewoakpe ɖe Zoba-fia Hadadezer ŋu la, David wu ame akpe blaeve vɔ eve le Siriatɔawo dome.+
6 Emegbe David ɖe asrafohawo ɖo Siriatɔwo ƒe du Damasko me, eye Siriatɔwo zu David ƒe subɔviwo, eye woxea adzɔ nɛ. Yehowa kpena ɖe David ŋu wòɖua dzi le afi sia afi si wòyi.*+
7 Azɔ hã, David xɔ sikakpoxɔnu kotoowo le Hadadezer ƒe aʋawɔlawo si, eye wòtsɔ wo va Yerusalem.+
8 Eye Fia David lɔ akɔbli geɖe ŋutɔ tso Beta kple Berotai, siwo nye Hadadezer ƒe duwo me.
9 Hamat-fia+ Toi se be David ɖu Hadadezer ƒe aʋakɔ blibo la dzi.+
10 Eya ta Toi dɔ via Yoram ɖe Fia David gbɔ be wòabia eƒe fɔfɔme ta se, eye wòakafui le esi wòwɔ aʋa kple Hadadezer, eye wòɖu edzi ta (elabena Hadadezer wɔa aʋa kple Toi enuenu), eye wòtsɔ klosalonuwo kple sikanuwo kpakple akɔblinuwo ɖe asi vɛ.
11 Fia David kɔ esiawo hã ŋu na Yehowa hekpe ɖe dukɔ siwo katã wòbɔbɔ ɖe anyi siwo ƒe klosalo kple sika ŋu wòkɔ la ŋuti.+
12 Exɔ wo le Siriatɔwo, Moabtɔwo,+ Amonitɔwo, Filistitɔwo+ kple Amalektɔwo+ si hekpe ɖe nu siwo wòha le Hadadezer,+ Zoba-fia, Rehob vi si la ŋu.
13 Azɔ hã, David ƒe ŋkɔ nyɔ esi wògbɔ tso Edomtɔwo siƒe, ewu ame akpe wuienyi le Dzebali la me.+
14 Eye wòɖe asrafohawo ɖo Edom. Eɖo asrafohawo ɖe Edom blibo la katã, eye Edomtɔwo katã va zu David ƒe subɔviwo.+ Yehowa kpena ɖe David ŋu wòɖua dzi le afi sia afi si wòyi.+
15 David ɖu fia ɖe Israel blibo la dzi,+ eye David tsoa afia hedrɔ̃a ʋɔnu dzɔdzɔe+ na eƒe dukɔ blibo la.+
16 Yoab,+ Zeruya vi le aʋakɔ la nu, eye Yehosafat,+ Ahilud vi nye nuŋlɔla.
17 Zadok,+ Ahitub vi kple Ahimelek, Abiatar vi nye nunɔlawo, eye Seraya nye agbalẽŋlɔla.
18 Benaya,+ Yehoyada vi le Keretitɔwo kple Peletitɔwo+ nu. Ke David viwo ya nye dɔnunɔlawo.*
