3 Mose 6:1-30
6 Yehowa gagblɔ na Mose be:
2 “Ne ame* aɖe wɔ nu vɔ̃, ale be mewɔ nuteƒe na Yehowa o,+ eye wòble ehavi le nane si woda ɖe egbɔ,+ alo wobe nedzrae ɖo la me, alo wòfi ehavi alo tafae,
3 alo wòfɔ nane si bú eye wòsẽ nu, eye wòka aʋatso heta nu le nu vɔ̃ siawo dometɔ aɖe si wòwɔ me la,+ nu si wòawɔe nye esi:
4 Ne ewɔ nu vɔ̃ heɖi fɔ la, ekema wòatrɔ nu si wòfi alo nu si wòba ame xɔ alo nu si wòtafa ame xɔ, eɖanye nu ka kee woda ɖe egbɔ o, alo nu búbu, si wòfɔ,
5 alo nu sia nu si me wòda alakpa heta nu le la ayii, eye wòaɖo eteƒe bliboe+ ahatsɔ nua ƒe home me mama ɖe teƒe atɔ̃ ƒe ɖeka akpe ɖe eŋuti. Wòatsɔe ana ame si tɔ wònye le gbe si gbe woɖo kpe edzi be eɖi fɔ.
6 Eye wòatsɔ fɔɖivɔsalã, si anye agbo si sɔ blibo, si asɔ ɖe home si woɖo la nu, ava nunɔla la gbɔ be woatsɔ asa fɔɖivɔ na Yehowa.+
7 Eye nunɔla la nalé avu ɖe eta le Yehowa ŋkume, eye woatsɔ nu sia nu si wòwɔ heɖi fɔ la akee.”+
8 Yehowa gagblɔ na Mose be:
9 “De se na Aron kple viaŋutsuwo be: ‘Esiae nye numevɔsa la ŋuti se:+ Numevɔsa la nanɔ dzo si le vɔsamlekpuia me la dzi zã bliboa katã va se ɖe ŋdi, eye dzo nanɔ bibim ɖaa le vɔsamlekpuia me.
10 Nunɔla la nado eƒe nunɔlaklalawu,+ eye wòado aklalatakpui.*+ Azɔ wòalɔ numevɔsa siwo dzo la bi le vɔsamlekpuia dzi la ƒe dzofiwo*+ akɔ ɖe vɔsamlekpuia xa.
11 Emegbe wòaɖe eƒe awuwo+ ahado awu bubuwo, eye wòalɔ dzofiawo ayi teƒe dzadzɛ aɖe le asaɖa la godo.+
12 Dzo nanɔ bibim le vɔsamlekpuia me ɖaa. Dzo megatsi le eme o. Nunɔla la nanɔ nake dem eme+ ŋdi sia ŋdi, eye wòaɖo numevɔsalã la ɖe edzi ahatsɔ ŋutifafavɔsalãa ƒe amiwo ado dzudzɔ ɖe edzi.+
13 Dzo nanɔ bibim le vɔsamlekpuia me ɖaa. Dzo megatsi le eme o.
14 “‘Ke esiae nye nuɖuvɔsa ŋuti se:+ Mi Aron viŋutsuwo mitsɔe va Yehowa ŋkume le vɔsamlekpuia ŋgɔ.
15 Wo dometɔ ɖeka naku nuɖuvɔsa ƒe wɔ memee la kple eƒe ami la kpakple lifi si le nuɖuvɔsaa dzi la katã ƒe asiʋlo ɖeka atsɔ ado dzudzɔ ɖe vɔsamlekpuia dzi wòanye ʋeʋẽ lilili,* si anye kpɔɖeŋuvɔsa* na Yehowa.+
16 Aron kple viaŋutsuwo naɖu susɔea.+ Amɔwɔ maʋamaʋã bolo wòanye woaɖu le teƒe kɔkɔe la. Woaɖui le takpegbadɔa ƒe xɔxɔnu.+
17 Womade nuʋãnu aɖeke eme hafi amèe o.+ Nye dzovɔsawo me meɖee le na wo be wòanye wo tɔ.+ Nu kɔkɔewo ƒe nu kɔkɔe wònye+ abe nuvɔ̃vɔsa kple fɔɖivɔsa ke ene.
18 Aron ƒe dzidzimevi ŋutsuwo katã kpɔ mɔ aɖui.+ Anye woƒe gome ɖaa tso Yehowa ƒe dzovɔsawo me le miaƒe dzidzimewo katã me.+ Nu sia nu si aka wo* ŋu la azu nu kɔkɔe.’”
19 Yehowa gagblɔ na Mose be:
20 “Esiae nye vɔ si Aron kple viaŋutsuwo asa na Yehowa le gbe si gbe woasi ami na wo dometɔ aɖe:+ woana wɔ memee efa me mama ewo ƒe akpa ɖeka*+ be woatsɔ asa nuɖuvɔe,+ woatsɔ afã asa vɔe le ŋdi eye afã le fiẽ.
21 Woatsɔ ami ablui ahamèe le agba me.+ Nàblui kple ami nyuie amèe wòanye nuɖuvɔsanu eye nàflii hafi atsɔ asa vɔe be wòanye ʋeʋẽ lilili* na Yehowa.
22 Eye nunɔla viŋutsu si wosi ami na be wòazu nunɔla ɖe eteƒe+ la nawɔe. Ðoɖo wònye ɖaa: Woatsɔ vɔsa bliboa ado dzudzɔ na Yehowa.
23 Woatɔ dzo nunɔla ƒe nuɖuvɔsa ɖe sia ɖe keŋkeŋ. Womaɖui o.”
24 Eye Yehowa gagblɔ na Mose be:
25 “Gblɔ na Aron kple viaŋutsuwo be, ‘Esiae nye nuvɔ̃vɔsa la ŋuti se:+ Teƒe si wowua numevɔsalãa le la,+ teƒe ma kee woawu nuvɔ̃vɔsalãa hã ɖo le Yehowa ŋkume. Nu kɔkɔewo ƒe nu kɔkɔe wònye.
26 Nunɔla si sa nuvɔ̃vɔ lae aɖui.+ Teƒe kɔkɔe woaɖui le, le takpegbadɔa ƒe xɔxɔnu.+
27 “‘Nu sia nu si aka nuvɔ̃vɔsalãa ŋu la azu nu kɔkɔe, eye ne ame aɖe le ʋua hlẽm eye wòhlẽ ɖe eƒe awu ŋu la, ekema mianya nu si ŋu ʋua hlẽ ɖo la le teƒe kɔkɔe.
28 Woagbã ze* si me woɖae le la. Ke ne akɔblize mee woɖae le la, ekema woaklɔ akɔblize la atsɔ tsi akpalae.
29 “‘Ŋutsu sia ŋutsu si nye nunɔla la kpɔ mɔ aɖui.+ Nu kɔkɔewo ƒe nu kɔkɔe wònye.+
30 Ke womaɖu nuvɔ̃vɔsalã la, nenye be wotsɔ eƒe ʋu ƒe ɖe yi takpegbadɔ la me be woalé avu le kɔkɔeƒea o.+ Woatɔ dzoe.
Etenuŋɔŋlɔ
^ Alo, “luʋɔ.”
^ Efia, dzofi siwo ƒo vɔsalãwo ƒe ami.
^ Alo, “agbotɛ si wodona ɖe awu te.”
^ Alo, “faa dzi; naa dzidzeme.”
^ Alo, “eƒe akpa si nye ŋkuɖodzinu (le wɔ blibo la teƒe).”
^ Alo, “vɔsanuawo.”
^ Efa me mama ewo ƒe akpa ɖeka le lita 2.2. Kpɔ Megbenyawo B14.
^ Alo, “faa dzi; naa dzidzeme.”
^ Alo, “anyize.”
