4 Mose 15:1-41
15 Yehowa gagblɔ na Mose be:
2 “Gblɔ na Israel-viwo be, ‘Ne mieva ɖo anyigba si metsɔ le mia na ge be mianɔ edzi la dzi mlɔeba,+
3 eye miebe yewoatsɔ nyi alo alẽ asa dzovɔ na Yehowa, eɖanye numevɔ+ alo adzɔgbeɖeɖe tɔxɛ ƒe vɔsa alo lɔlɔ̃nu faa nunana+ loo alo miaƒe ŋkekenyuiwo+ dzie míebe yewoasa vɔ be wòanye ʋeʋẽ lilili na Yehowa+ o,
4 ekema ame si na nua la natsɔ wɔ memee+ efa me mama ɖe ewo ƒe akpa ɖeka* si wotsɔ ami hin* me mama ɖe ene ƒe akpa ɖeka dzabae la hã avɛ na Yehowa ne woatsɔ asa nuɖuvɔ.
5 Eye nàtsɔ wain hin me mama ɖe ene ƒe akpa ɖeka asa nunovɔ akpe ɖe numevɔ+ la ŋu, alo nàtsɔe akpe ɖe alẽtsui ɖe sia ɖe si nàtsɔ asa vɔe la ŋu.
6 Alo ne agboe la, ekema nàtsɔ wɔ memee efa me mama ɖe ewo ƒe akpa eve, si wotsɔ ami hin me mama ɖe etɔ̃ ƒe akpa ɖeka dzabae la, asa nuɖuvɔ akpe ɖe eŋu.
7 Eye nàtsɔ wain hin me mama ɖe etɔ̃ ƒe akpa ɖeka avɛ wòanye nunovɔsa, be wòanye ʋeʋẽ lilili* na Yehowa.
8 “‘Ke ne ètsɔ nyitsu vɛ be woatsɔ asa numevɔ+ alo adzɔgbeɖeɖe tɔxɛ+ ƒe vɔ alo ŋutifafavɔ na Yehowa+ la,
9 ekema nàtsɔ wɔ memee efa me mama ɖe ewo ƒe akpa etɔ̃, si wotsɔ ami hin afã dzabae la, asa nuɖuvɔ+ akpe ɖe nyitsu la ŋu.
10 Eye nàtsɔ wain hin afã avɛ be woatsɔ asa nunovɔ+ be wòanye dzovɔsa si aʋẽ lilili* na Yehowa.
11 Aleae woatsɔe akpe ɖe nyitsu alo agbo alo alẽtsui alo gbɔ̃ ɖe sia ɖe ŋui.
12 Lã agbɔsɔsɔme ka kee nàtsɔ ana o, aleae nàwɔ wo dometɔ ɖe sia ɖe le woƒe xexlẽme nu.
13 Aleae Israel vidzidzi ɖe sia ɖe si di be yeasa dzovɔ be wòanye ʋeʋẽ lilili* na Yehowa la, awɔ.
14 “‘Ne amedzrovi aɖe le mia dome alo ame aɖe ʋu va tsi mia gbɔ tso mia tɔgbuiwo ŋɔli, eye wòdi be yeasa dzovɔ be wòanye ʋeʋẽ lilili* na Yehowa la, ekema eya hã nawɔe abe ale si tututu miewɔnɛ ene.+
15 Se ɖekae akplɔ mi kple amedzroviwo siaa. Se mavɔ wòanye le miaƒe dzidzimewo katã me. Mia kple amedzrovi miesɔ le Yehowa ŋkume.+
16 Se ɖeka kple ʋɔnudrɔ̃ɖoɖo ɖekae anɔ eŋu na mia kple amedzrovi siwo le mia dome la siaa.’”
17 Yehowa gagblɔ na Mose be:
18 “Gblɔ na Israel-viwo be, ‘Ne mieɖo anyigba si dzi mekplɔ mi yinɛ la dzi,
19 eye anyigba la na abolo*+ mi mieɖu la, ekema miadzɔ nu na Yehowa.
20 Mitu miaƒe agblemenuku gbãtɔwo+ ƒe ɖe miatsɔ aƒo abolo kotoewo ne miava dzɔ. Miadzɔe abe ale si mietsɔa nu tso miaƒe nukuƒoƒe va dzɔnae ene.
21 Mitu miaƒe nuku gbãtɔwo ƒe ɖe miava dzɔ na Yehowa, miawɔ esia le miaƒe dzidzimewo katã me.
22 “‘Ke ne edzɔ be mieɖe ŋu ɖi eye miewɔ se siawo, siwo katã Yehowa tsɔ na Mose la dzi o,
23 ɛ̃, ne miewɔ se siwo katã Yehowa de na mi to Mose dzi tso gbe si gbe Yehowa de asi se siwo akplɔ mi le miaƒe dzidzimewo katã me la dede na mi la dzi o,
24 eye ha la ɖe ŋu ɖi da vo la, ekema ha blibo la natsɔ nyitsui ɖeka asa numevɔ be wòanye ʋeʋẽ lilili* na Yehowa, eye woatsɔ nuɖuvɔsa kple nunovɔsa akpe ɖe eŋu le ɖoɖo si nu wowɔnɛ ɖo la nu,+ eye woana gbɔ̃tsui ɖeka be woatsɔ asa nuvɔ̃vɔ.+
25 Nunɔla la nalé avu ɖe Israel ƒe ha blibo la katã ta eye woatsɔe ake wo,+ elabena ɖe woɖe ŋu ɖi, eya ta wona nu be woatsɔ asa dzovɔ na Yehowa, eye wosa nuvɔ̃vɔ le Yehowa ŋkume ɖe woƒe vodada la ta.
26 Woatsɔe ake Israel ƒe ha blibo la katã kple amedzrovi siwo le wo dome la, elabena ɖe wo katã woɖe ŋu ɖi.
27 “‘Eye ne ame* aɖe ɖe ŋu ɖi wɔ nu vɔ̃ la, ekema netsɔ gbɔ̃nɔ si xɔ ƒe ɖeka vɛ be woatsɔ asa nuvɔ̃vɔ.+
28 Nunɔla la nalé avu ɖe ame* si ɖe ŋu ɖi wɔ nu vɔ̃ le Yehowa ŋkume la ta. Nelé avu ɖe eta, eye woatsɔe akee.+
29 Se ɖekae anɔ mia si na Israel vidzidziwo kple amedzrovi siwo le mia dome, le nu vɔ̃ si woɖe ŋu ɖi wɔ la ŋuti.+
30 “‘Ke ne ame* aɖe ɖoe koŋ da vo,+ eɖanye dumevi alo amedzrovi o, edo vlo Yehowa, eya ta ele be woatsrɔ̃e ɖa le dukɔ la dome.
31 Yehowa ƒe nyae wòdo vloe, eye eƒe se dzie wòda, eya ta woaɖe ame* ma ɖa godoo.+ Eƒe fɔɖiɖi anɔ eya ŋutɔ ƒe ta dzi.’”+
32 Esi Israel-viwo le gbea dzi la, wokpɔ ŋutsu aɖe gbe ɖeka wòle nake fɔm le Sabat ŋkeke dzi.+
33 Ame siwo kpɔe wòle nakea fɔm la kplɔe va Mose kple Aron kpakple ha blibo la ŋkume.
34 Wosikae ɖi,+ elabena womegblɔ nu si tututu woawɔe la o.
35 Eye Yehowa gblɔ na Mose be: “Ele be woawu ŋutsu la;+ ha blibo la naƒu kpee le asaɖa la godo.”+
36 Eya ta ha blibo la kplɔe yi asaɖa la godo, eye woƒu kpee wòku, abe ale si tututu Yehowa de se na Mose ene.
37 Yehowa gagblɔ na Mose be:
38 “Gblɔ na Israel-viwo be, woawo ŋutɔ kple dzidzime siwo katã ava ɖe wo yome la nade gbo woƒe awuwo to eye woalɔ̃ ka blɔtɔ ato gboawo tame.+
39 ‘Gbo siawo nanɔ miaƒe awuwo ŋu, ne miakpɔe ahaɖo ŋku Yehowa ƒe sededewo katã dzi awɔ wo dzi.+ Migana miaƒe dzi kple miaƒe ŋku nakplɔ mi ade gbɔgbɔmehasiwɔwɔ me o.+
40 Esia ana miaɖo ŋku nye sededewo katã dzi awɔ wo dzi, be mianɔ kɔkɔe na mia Mawu la.+
41 Nyee nye Yehowa mia Mawu, ame si kplɔ mi tso Egipte-nyigba dzi, be manye miaƒe Mawu.+ Nyee nye Yehowa mia Mawu.’”+
Etenuŋɔŋlɔ
^ Efa me mama ɖe ewo ƒe akpa ɖeka le lita 2.2. Kpɔ Megbenyawo B14.
^ Hin ɖeka le lita 3.67. Kpɔ Megbenyawo B14.
^ Alo, “faa dzi; naa dzidzeme.”
^ Alo, “faa dzi; naa dzidzeme.”
^ Alo, “faa dzi; naa dzidzeme.”
^ Alo, “faa dzi; naa dzidzeme.”
^ Alo, “nuɖuɖu.”
^ Alo, “faa dzi; naa dzidzeme.”
^ Alo, “luʋɔ.”
^ Alo, “luʋɔ.”
^ Alo, “luʋɔ.”
^ Alo, “luʋɔ.”
