4 Mose 21:1-35
21 Esi Kanaantɔ, Arad-fia+ si le Negeb* se be Israel to Atarim mɔ gbɔna la, eho ɖe Israel ŋu eye wòɖe aboyo wo dometɔ aɖewo.
2 Eye Israel ɖe adzɔgbe na Yehowa be: “Ne àtsɔ dukɔ sia ade asi nam la, ekema nye hã matsrɔ̃ woƒe duwo gbidigbidi.
3 Yehowa ɖo to Israel ƒe gbe, eye wòtsɔ Kanaantɔwo de asi na wo, ale wotsrɔ̃ wo kple woƒe duawo gbidigbidi. Eya ta wona ŋkɔ teƒe la be Horma.*+
4 Esi wole mɔa dzi tso Hor To+ la gbɔ, eye woto mɔ si ɖo ta Ƒudzĩ la gbɔ be yewoagɔdɔ̃ mɔ ato Edom-nyigbaa+ ŋu la, mɔzɔzɔ la na nu va te dukɔ la ŋu.*
5 Eye dukɔ la ƒo nu le Mawu kple Mose+ ŋu be: “Nu ka tae miekplɔ mí tso Egipte be míaku ɖe gbea dzi? Elabena abolo kple tsi mele afi sia o,+ eye nuɖuɖu nyɔŋu sia ti mí* azɔ.”+
6 Ale Yehowa dɔ da vɔ̃ɖiwo ɖe dukɔ la dome, eye woɖu dukɔ la, ale be Israel-vi geɖe ku.+
7 Eya ta dukɔ la va Mose gbɔ va gblɔ be: “Míewɔ nu vɔ̃, elabena míeƒo nu le wò kple Yehowa ŋu.+ Ðe kuku na Yehowa, ne wòaɖe daawo ɖa le mía dome.” Ale Mose ɖe kuku ɖe dukɔ la ta.+
8 Eye Yehowa gblɔ na Mose be: “Wɔ da vɔ̃ɖi la ƒe nɔnɔme nàtsɔ aku ati ŋu. Eye ne da ɖu ame aɖe la, ekema wòafɔ ta dzi akpɔe, ne wòatsi agbe.”
9 Enumake Mose tsɔ akɔbli wɔ da+ tsɔ ku ati ŋu,+ eye ne da ɖu ame aɖe, eye wòfɔ ta dzi kpɔ akɔblida la ko la, etsia agbe.+
10 Emegbe Israel-viwo ho heva ƒu asaɖa anyi ɖe Obot.+
11 Emegbe woho tso Obot va ƒu asaɖa anyi ɖe Iye-Abarim+ le gbedzi, afi si dze ŋgɔ Moab le ɣedzeƒe gome.
12 Wogaho tso afi ma heva ƒu asaɖa anyi ɖe Zered Bali la nu.+
13 Wogaho tso afi ma heva ƒu asaɖa anyi ɖe Arnon nuto+ me, le gbedzi le Amoritɔwo ƒe liƒo dzi, elabena Arnon ye nye Moab ƒe liƒo le Moabtɔwo kple Amoritɔwo dome.
14 Esia tae wogblɔ le Yehowa ƒe Aʋawɔwɔwo ƒe agbalẽ la me be: “Waheb du si le Sufa kple Arnon Baliwo
15 kpakple baliawo ƒe aga* siwo ɖo ta Ar nutowo me, eye wòdo liƒo na Moab.”
16 Emegbe woho tso afi ma va Beer. Vudo sia ŋue Yehowa gblɔ na Mose le be: “Ƒo dukɔ la nu ƒu, ne mana tsi wo.”
17 Ɣemaɣi Israel dzi ha sia be:
“Oo vudo, dzi tsi! Mixe haa!
18 Amegãwoe ɖe vudoa; dukɔ la ƒe bubumewoe ɖee,Gbeɖela ƒe atikplɔ wotsɔ ɖee, woawo ŋutɔwo ƒe atikplɔwoe wotsɔ ɖee.”
Eye woho tso gbe sia dzi yi Matana.
19 Tso Matana wova Nahaliel, eye tso Nahaliel wova Bamot.+
20 Tso Bamot wova bali si le Moab-nyigba+ dzi la me, le Pisga To+ la dzi, afi si dze ŋgɔ Yesimon.*+
21 Eye Israel dɔ ame ɖe Amori-fia Sihon gbɔ be:+
22 “Na míato wò anyigba dzi ayi. Míadze ɖe agble alo waingble aɖeke me o. Míano vudo aɖeke me tsi o. Fia Ƒe Mɔ la dzi míato, va se ɖe esime míeto wò anyigba dzi yi.”+
23 Ke Sihon meɖe mɔ na Israel be wòato yeƒe anyigba dzi ayi o, ke boŋ Sihon ƒo eƒe dukɔ la nu ƒu, eye wòho yi gbea dzi ɖakpe aʋa kple Israel le Yahaz.+
24 Gake Israel si wo kple yi+ hexɔ woƒe anyigba,+ tso Arnon+ yi Yabok+ si te ɖe Amonitɔwo ŋu, elabena Yazer+ ye nye Amonitɔwo ƒe liƒo.+
25 Ale Israel xɔ du siawo katã, eye wonɔ Amoritɔwo+ ƒe duwo katã me, Hesbon kple eŋu duwo katã.
26 Elabena Hesbon nye Amori-fia Sihon ƒe du. Eyae wɔ aʋa kple Moab-fia tsã hexɔ eƒe anyigba blibo la katã le esi va ɖo keke Arnon ke.
27 Esia tae ahamasilawo gblɔna be:
“Miva Hesbon.
Mina woatso Sihon du la ahaɖo egɔme anyi.
28 Elabena dzo bi tso Hesbon, dzoƒaɖe tso Sihon ƒe du la me.
Efiã Ar le Moab, efiã ame siwo ƒe nuxeƒewo le Arnon.
29 Moab, baba na wò! Oo Kemos+ ƒe amewo, mia nu ayi!
Ena viaŋutsuwo zu sisilawo, eye Amori-fia Sihon ɖe aboyo vianyɔnuwo.
30 Mina míada akplɔ wo.Hesbon atsrɔ̃ va se ɖe keke Dibon+ ke;Mina míatsrɔ̃e va se ɖe Nofa ke;Dzo abi ade Medeba+ ke.”
31 Eye Israel nɔ Amoritɔwo ƒe anyigba dzi.
32 Eye Mose dɔ ŋutsu aɖewo be woayi aɖatsa ŋku le Yazer.+ Woxɔ eŋu duwo hexɔ teƒea le Amoritɔ siwo le afi ma la si.
33 Emegbe wotrɔ tso afi ma heto Basan Mɔ. Eye Basan-fia Og+ kple eƒe dukɔ blibo la ho va kpe aʋa kpli wo le Edrei.+
34 Eye Yehowa gblɔ na Mose be: “Mègavɔ̃e o,+ elabena matsɔ eya kple eƒe dukɔ blibo la kpakple eƒe anyigba ade asi na wò;+ wɔe abe ale si tututu nèwɔ Amori-fia Sihon si nɔ Hesbon la ene.”+
35 Ale wowu eya kple viaŋutsuwo kpakple eƒe dukɔ blibo la, va se ɖe esime eƒe ame aɖeke mesusɔ o,+ eye woxɔ eƒe anyigba la.+
Etenuŋɔŋlɔ
^ Alo, “Anyiehe.”
^ Egɔmee nye, “Nu Si Wotsrɔ̃ Gbidigbidi.”
^ Egɔmeɖeɖe tẽe, “nu te dukɔ la ƒe luʋɔwo ŋu.”
^ Alo, “ti míaƒe luʋɔwo.”
^ Egɔmeɖeɖe tẽe, “baliawo nu.”
^ Agate ŋu afia, “gbegbe.”
