Dɔwɔwɔwo 20:1-38
20 Esi hoowɔwɔa nu tso la, Paulo na woyɔ nusrɔ̃lawo vɛ, eye esi wòde dzi ƒo na wo heklã wo vɔ la, edze mɔ ɖo ta Makedonia.
2 Esi wòto nuto mawo me hede dzi ƒo na ame siwo le afi ma kple nya geɖewo vɔ la, eva ɖo Hela nutowo me.
3 Enɔ afi ma ɣleti etɔ̃, gake esi Yudatɔwo ɖo nugbe ɖe eŋu+ esime wònɔ dzadzram ɖo be yeaɖo tɔdziʋu ayi Siria ta la, eɖoe be yeatrɔ ato Makedonia adzo.
4 Ame siwo nɔ eŋue nye Sopatro si nye Beroiatɔ Piro viŋutsu, Aristarko+ kple Sekundo siwo tso Tesalonika, kple Gayo si tso Derbe, kpakple Timoteo,+ Tikiko+ kple Trofimo+ siwo tso Asia nuto me.
5 Ame siawo do ŋgɔ heva le mía lalam le Troa;
6 ke míeɖo tɔdziʋu tso Filipi le Amɔwɔ Maʋamaʋã Bolo Ŋkekenyui+ ƒe azã la megbe, eye le ŋkeke atɔ̃ me la, míeva tu wo le Troa, eye míenɔ afi ma ŋkeke adre.
7 Le kwasiɖaa ƒe ŋkeke gbãtɔ dzi, esi míeƒo ƒu be míaɖu nu la, Paulo ƒo nu na wo, elabena eɖoe be ne ŋu ke la, yeadzo; eye wòyi eƒe nuƒoa dzi va se ɖe zãtiƒe ke.
8 Eya ta wosi akaɖi geɖe ɖe dziƒoxɔ si me míeƒo ƒu ɖo la me.
9 Ðekakpui aɖe si ŋkɔe nye Eutiko nɔ anyi ɖe fesre nu, eye wòdɔ alɔ̃ yi eme ʋĩi esime Paulo le eƒe nuƒoa dzi. Esi alɔ̃ mui la, ege tso dzisasrã etɔ̃lia dzi, eye esi woyi ɖakɔe la, wokpɔ be eku.
10 Ke Paulo ɖi yi anyigba, tsyɔ akɔ ɖe edzi hekpla asi ɖee+ gblɔ be: “Midzudzɔ hoowɔwɔ, elabena ele agbe.”*+
11 Azɔ egalia yi dziƒoxɔa dzi, eye wòɖu nu. Eyi dzeɖoɖoa dzi kpli wo va se ɖe esime ŋu ke, eye wòdzo.
12 Ale wokplɔ ŋutsuvi la dzoe agbagbee, eye akɔfafa si wokpɔ la wu gbɔgblɔ.
13 Azɔ míedo ŋgɔ ɖo tɔdziʋua yi Aso, afi si míeɖo be míava kɔ Paulo le, elabena egblɔ na mí be yeato afɔ ava tso mí le afi ma.
14 Ale esi wòva tu mí le Aso la, eɖo ʋua kpli mí, eye míeyi Mitilene.
15 Le ŋufɔke esi míeho tso afi ma la, míeva ɖo Kio kasa; ke le ŋkeke si kplɔe ɖo dzi la, míeva tɔ ɖe Samo vie, eye esi ŋu gake la, míeva ɖo Mileto.
16 Paulo ɖoe be yeato Efeso+ ŋu ayi le esi medi be yeagblẽ ɣeyiɣi aɖeke le Asia nutoa me o ta, elabena ele kplakplakpla dzi, be ne yeate ŋui la, yeaɖo Yerusalem+ le Pentekoste Ŋkekenyui la dzi.
17 Ke edɔ ame tso Mileto ɖo ɖe Efeso be woaɖayɔ hamemetsitsiwo vɛ.
18 Esi wova egbɔ la, egblɔ na wo be: “Miawo ŋutɔwo mienya ale si menɔ kpli mi tso gbe si gbe meɖo afɔ Asia nutoa me+ la nyuie,
19 ale si gbegbe mebɔbɔ ɖokuinye ɖe anyi+ wɔ dɔ na Aƒetɔ la abe kluvi ene kple aɖatsiwo kpakple tetekpɔ siwo me meto le Yudatɔwo ƒe nugbeɖoɖowo ta,
20 ke nyemegbe nu siwo ŋu viɖe le* la dometɔ aɖeke gbɔgblɔ na mi o, eye nyemegbe nufiafia mi le dutoƒo+ kple tso aƒe me yi aƒe me+ hã o.
21 Ke boŋ meɖi ɖase na Yudatɔwo kple Helatɔwo siaa tsitotsito be woatrɔ dzi me+ ava Mawu gbɔ eye woaxɔ mía Aƒetɔ Yesu dzi ase.+
22 Azɔ, kpɔ ɖa, gbɔgbɔ la zi dzinye be mayi Yerusalem, togbɔ be nyemenya nu si adzɔ ɖe dzinye le afi ma o hã;
23 nu si menya koe nye be le du sia du me la, gbɔgbɔ kɔkɔe la ɖia ɖase nam enuenu be woadem gaxɔ me eye mato xaxawo me.+
24 Ke hã, nye agbe* mele vevie nam akpa o; nu si le vevie nam la koe nye be mawu nye duɖimekeke+ kple subɔsubɔdɔ si mexɔ tso Aƒetɔ Yesu gbɔ la nu, be maɖi ɖase le Mawu ƒe amenuveve nya nyui la ŋu tsitotsito.
25 “Azɔ kpɔ ɖa, menyae be mi ame siwo katã dome menɔ ɖe gbeƒã Fiaɖuƒea la dometɔ aɖeke magakpɔ nye ŋkume azɔ o.
26 Eya tae meyɔ mi be mianye ɖasefowo nam egbe sia, be ŋutinye kɔ tso amewo katã ƒe ʋu me,+
27 elabena nyemegbe Mawu ƒe lɔlɔ̃nu* blibo la katã gbɔgblɔ na mi o.+
28 Mikpɔ mia ɖokui+ kple alẽha blibo la dzi nyuie, alẽha si dome gbɔgbɔ kɔkɔe la ɖo mi dzikpɔlawoe+ le, be miakplɔ Mawu ƒe hame,+ si wòtsɔ eya ŋutɔ Via ƒe ʋu ƒle+ la.
29 Menya be le nye dzodzo megbe la, amegãxi nyanyrawo age ɖe mia dome,+ eye womawɔ nu ɖe alẽha la ŋu le lɔlɔ̃ me o,
30 eye le miawo ŋutɔwo mia dome la, ame aɖewo atso agblɔ nya totrowo be yewoahe nusrɔ̃lawo ne woadze yewo yome.+
31 “Eya ta minɔ ŋudzɔ, eye miɖo ŋku edzi be ƒe etɔ̃ sɔŋ,+ zã kple keli, nyemedzudzɔ nuxɔxlɔ̃ mia dometɔ aɖeke kple aɖatsiwo o.
32 Azɔ la, metsɔ mi le asi dem na Mawu kple eƒe amenuvevenya, si ate ŋu atu mi ɖo ahana domenyinu mi le ame siwo katã ŋu wokɔ la dome.+
33 Ame aɖeke ƒe klosalo, sika, alo nudodo mebiã ŋu nam o.+
34 Miawo ŋutɔwo mienya be nye asi siawoe metsɔ wɔ dɔ kpɔ nye ŋutɔ kple ame siwo le ŋunye la ƒe nuhiahiãwo+ gbɔe.
35 Le nuwo katã me la, meɖee fia mi be miawɔ dɔ sesĩe alea+ akpe ɖe ame siwo gbɔdzɔ la ŋu, eye be Aƒetɔ Yesu ƒe nya siawo nanɔ susu me na mi, esi eya ŋutɔ gblɔ be: ‘Dzidzɔ geɖe le nunana me+ wu nuxɔxɔ.’ ”
36 Esi wògblɔ nya siawo la, eya kple ameawo katã dze klo do gbe ɖa.
37 Nyateƒee, wo katã wofa avi ŋutɔ, eye wokpla asi kɔ na Paulo* hegbugbɔ nu nɛ lɔlɔ̃tɔe,
38 elabena nya si wògblɔ be womagakpɔ yeƒe ŋkume azɔ o la koŋue te ɖe wo dzi.+ Eye woɖoe ɖa va se ɖe tɔdziʋua gbɔ ke.
Etenuŋɔŋlɔ
^ Alo, “elabena eƒe luʋɔ le eme.”
^ Alo, “nu siwo nyo na mi.”
^ Alo, “luʋɔ.”
^ Alo, “Mawu ƒe tameɖoɖo.”
^ Egɔmeɖeɖe tẽe, “wodze Paulo ƒe kɔ dzi.”
