Efesotɔwo 3:1-21
3 Esia ta nye Paulo, ame si le ga me+ le Kristo Yesu ta, le mi ame siwo nye dukɔwo me tɔwo ƒe viɖe ta . . .
2 ne vavãe miese aƒedzikpɔkpɔdɔ+ si Mawu ve nunye tsɔ de asi nam le mia ta la ŋu nya,
3 be wona menya nya ɣaɣla kɔkɔe la to ɖeɖefia aɖe dzi, abe ale si meŋlɔ nu tso eŋu kpuie do ŋgɔ ene.
4 Eya ta ne miexlẽ nya sia la, miate ŋu anya gɔmesese si su asinye le Kristo la ƒe nya ɣaɣla kɔkɔe+ la ŋu.
5 Womena amegbetɔviwo nya nya ɣaɣla sia le dzidzime tsãtɔwo me, abe ale si woto gbɔgbɔ la dzi ɖee fia eƒe apostolo kɔkɔeawo kple nyagblɔɖilawo fifia ene o,+
6 be dukɔwo me tɔwo nazu hati domenyilawo, woazu ŋutilã ɖeka ƒe ŋutinuwo,+ eye woazu gomekpɔlawo kpli mí le ŋugbedodo la me le ɖekawɔwɔ me kple Kristo Yesu, to nya nyui la dzi.
7 Mezu esia ŋuti subɔla le Mawu ƒe amenuveve ƒe nunana faa si wonam le eƒe ŋusẽ ƒe dɔwɔwɔ nu la nu.+
8 Nye, ame si le sue wu ame kɔkɔewo katã ƒe suetɔ+ la nue wove+ alea be magblɔ Kristo la ƒe kesinɔnu gbogbo manyaxlẽawo ŋuti nya nyui la na dukɔwo,
9 eye mana amewo nakpɔ ale si wole nya ɣaɣla kɔkɔe+ la ŋuti dɔ wɔmee, nya si le ɣaɣla tso blemablema ɖe Mawu ame si wɔ nuwo katã la me.
10 Wowɔ esia, ale be to hame+ la dzi woana dziɖuɖu kple ŋusẽtɔ siwo le dziƒonutowo me la nanya Mawu ƒe nunya si dze le mɔ vovovoawo nu la.+
11 Wowɔ esia le tame mavɔ, si wòɖo to mía Aƒetɔ Yesu, si nye Kristo+ la, dzi la nu,
12 ame si na míeƒoa nu faa alea,+ eye esi míexɔ edzi se ta la, dzi ɖoa mía ƒo míetena ɖe eŋu faa.
13 Le esia ta mele biabiam tso mia si be migana xaxa siwo me tom mele le mia ta la naɖe dzi le mia ƒo o, elabena esia ahe bubu vɛ na mi.+
14 Le esia ta medzea klo na Fofo la,
15 ame si gbɔ ƒome sia ƒome, si le dziƒo kple anyigba dzi la kpɔ eƒe ŋkɔ tsoe.
16 Eye nye gbedodoɖae nye be wòato ŋusẽ si eƒe gbɔgbɔ nana la dzi ana miasẽ ŋu le ame si mienye le ememe la gome,+ le eƒe ŋutikɔkɔe geɖe la nu,
17 ne miato miaƒe xɔse dzi ana Kristo la naxɔ anyinɔ le miaƒe dziwo me le lɔlɔ̃ me.+ Ne miaƒo ke ɖe to+ ali ke sesĩe ɖe gɔmeɖoanyi la dzi,+
18 ale be mia kple ame kɔkɔeawo katã miate ŋu ase nyateƒea ƒe kekeme kple didime kple kɔkɔme kpakple goglome gɔme tsitotsito,
19 eye miadze si Kristo+ la ƒe lɔlɔ̃ si de ŋgɔ sãsãsã wu sidzedze, ale be miagba go le blibonyenye si Mawu nana la me fũu.
20 Ke ame si ate ŋu awɔ nu siwo míebiana alo nu siwo vaa míaƒe susu me la na mí+ wòagbɔ eŋu sãsãsã le eƒe ŋusẽ si le dɔ wɔm le mía me nu la,+
21 eya tɔ nanye ŋutikɔkɔe to hame la kple Kristo Yesu dzi na dzidzimewo katã, tso mavɔ me yi mavɔ me. Amen.
