Amos 7:1-17
7 Nu si Aƒetɔ Dziɖulagã Yehowa na mekpɔe nye esi: Kpɔ ɖa! Edɔ ʋetsuviwo ƒe ha gã aɖe ɖa, esime nuku megbetɔwo de asi miemie me.* Kpɔ ɖa, nuku siwo woƒã esime woya gbe na fia la vɔ megbee.
2 Esi ʋetsuviwo ƒe ha la ɖu anyigbadzinu miemiewo vɔ keŋkeŋ la, megblɔ be: “Oo Aƒetɔ Dziɖulagã Yehowa, meɖe kuku, tsɔe ke dzro!+ Aleke Yakob awɔ anɔ te?* Elabena ŋusẽ mele eŋu o!”+
3 Ale Yehowa trɔ susu.*+ Eye Yehowa gblɔ be: “Madzɔ o.”
4 Nu si Aƒetɔ Dziɖulagã Yehowa na mekpɔe nye esi: Kpɔ ɖa! Aƒetɔ Dziɖulagã Yehowa yɔ dzo vɛ, be wòatsɔ ahe toe. Dzo la bi heno tsi goglowo eye wòfiã anyigba la ƒe akpa aɖe.
5 Eye megblɔ be: “Oo Aƒetɔ Dziɖulagã Yehowa, meɖe kuku, mègawɔe o.+ Aleke Yakob awɔ anɔ te?* Elabena ŋusẽ mele eŋu o!”+
6 Ale Yehowa trɔ susu.*+ Eye Aƒetɔ Dziɖulagã Yehowa gblɔ be: “Esia hã madzɔ o.”
7 Nu si wòna megakpɔe nye esi: Kpɔ ɖa! Yehowa le tsitre ɖe gli si wotsɔ tsumikpe* dzidzee la dzi, eye wòlé tsumikpe ɖe asi.
8 Eye Yehowa gblɔ nam be: “Amos, nu ka kpɔm nèle?” Eye meɖo eŋu be: “Tsumikpee.” Eye Yehowa gagblɔ be: “Kpɔ ɖa, mada tsumikpe ɖe nye dukɔ Israel dome. Nyemagatsɔe akee azɔ o.+
9 Isak ƒe nuxeƒewo+ azu gbegbe, eye Israel ƒe kɔkɔeƒewo azu aƒedo;+ matsɔ yi aho ɖe Yeroboam ƒe aƒe la ŋu.”+
10 Amaziya, si nye nunɔla le Betel,+ dɔ ame ɖo ɖe Israel-fia Yeroboam,+ ne woagblɔ nɛ be: “Amos ɖo nugbe ɖe ŋuwò le Israel ƒe aƒe la dome.+ Anyigba la mate ŋu ado dzi atsɔ eƒe nyawo katã o.+
11 Elabena ale Amos gblɔe nye esi: ‘Yeroboam atsi yi nu, eye woaɖe aboyo Israel tso eƒe anyigba dzi kokoko.’”+
12 Eye Amaziya gblɔ na Amos be: “Oo ŋutegakpɔla, dzo, si nàyi Yuda-nyigba dzi, ne nàɖu wò abolo* le afi ma, eye nàgblɔ nya ɖi le afi ma.+
13 Ke mègagblɔ nya ɖi le Betel azɔ o,+ elabena fia ƒe kɔkɔeƒee,+ eye wònye fiaɖuƒe la nɔƒe.”
14 Eye Amos ɖo eŋu na Amaziya be: “Menye nyagblɔɖilae menye tsã o, eye menye nyagblɔɖila ƒe vi hãe menye o; ke boŋ lãkplɔvi+ kple gbotigble dzi kpɔla* menye.
15 Ke Yehowa ɖem le lãhawo yome, eye Yehowa gblɔ nam be: ‘Yi ɖagblɔ nya ɖi na nye dukɔ Israel.’+
16 Azɔ se Yehowa ƒe nya: ‘Ègblɔ be, “Mègagblɔ nya ɖi ɖe Israel ŋu o,+ eye mègagblɔ nya+ aɖeke tsi tsitre ɖe Isak ƒe aƒe la ŋu o.”
17 Eya ta ale Yehowa gblɔe nye esi: “Srɔ̃wò azu gbolo le dua me, eye viwòŋutsuwo kple viwònyɔnuwo atsi yi nu. Woatsɔ dzidzeka ama wò anyigba, eye wò ŋutɔ àku ɖe anyigba makɔmakɔ dzi; eye woaɖe aboyo Israel tso eƒe anyigba dzi godoo.”’”+
Etenuŋɔŋlɔ
^ Efia be woċ wo le Dzove kple Dzodze me.
^ Egɔmeɖeɖe tẽe, “awɔ atso?”
^ Alo, “Ale wòve Yehowa.”
^ Egɔmeɖeɖe tẽe, “awɔ atso?”
^ Alo, “Ale wòve Yehowa.”
^ Alo, “glidzidzeka.”
^ Egɔmeɖeɖe tẽe, “nàɖu abolo.”
^ Alo, “gbotsetseŋɔla.”