Ezekiel 13:1-23
13 Eye Yehowa ƒe gbe gava nam be:
2 “Amegbetɔvi, gblɔ nya ɖi ɖe Israel ƒe nyagblɔɖilawo ŋu,+ eye nàgblɔ na ame siwo ŋutɔwo kpa nyawo nɔa gbɔgblɔm ɖi*+ la be, ‘Mise Yehowa ƒe nya.
3 Ale Aƒetɔ Dziɖulagã Yehowa gblɔe nye esi: “Baba na nyagblɔɖila tsibome siwo dze woawo ŋutɔwo ƒe gbɔgbɔ yome, evɔ womekpɔ naneke hafi o!+
4 Oo Israel, wò nyagblɔɖilawo zu abe abeiwo le gli gbagbãwo dome ene.
5 Miayi gliawo ƒe gbagbãƒewo aɖagbugbɔ wo aɖɔ ɖo na Israel ƒe aƒe+ la ne Israel nanɔ te ɖe aʋa nu le Yehowa ƒe ŋkeke la dzi o.”+
6 “Wokpɔ aʋatsoŋutegawo, eye wogblɔ alakpanya ɖi le gbɔgblɔm be, ‘Yehowa ƒe gbee nye esi,’ evɔ wònye Yehowa medɔ wo hafi o, eye wole lalam, be yewoƒe nya nava eme.+
7 Ðe menye aʋatsoŋutegae miekpɔ, eye alakpanyae miegblɔ ɖi esi miegblɔ be, ‘Yehowa ƒe gbee nye esi,’ evɔ wònye nyemegblɔ nya aɖeke o hafi oa?”’
8 “‘Eya ta ale Aƒetɔ Dziɖulagã Yehowa gblɔe nye esi: “‘Esi miegblɔ alakpanya, eye miekpɔ aʋatsoŋutega ta la, metso ɖe mia ŋu,’ Aƒetɔ Dziɖulagã Yehowa ye gblɔe.”+
9 Nye asi ava nyagblɔɖila siwo le aʋatsoŋutegawo kpɔm hele alakpanyawo gblɔm ɖi la dzi.+ Womanɔ ame siwo meɖea nye nyawo gblɔna na la dome o; womaŋlɔ woƒe ŋkɔwo ɖe Israel ƒe aƒe la ƒe nuŋlɔɖigbalẽ me o; eye womatrɔ ayi Israel-nyigba dzi o; ne miadze sii be, nyee nye Aƒetɔ Dziɖulagã Yehowa.+
10 Ava eme na wo alea elabena wokplɔ nye dukɔ la trae hele gbɔgblɔm be, “Ŋutifafa li!” evɔ ŋutifafa aɖeke meli o.+ Ne woɖo gli masemasẽ aɖe la, wosia akalo* nɛ.’+
11 “Gblɔ na akalosilaawo be gli la le mumu ge. Tsi le dzadza ge bababa, tsikpewo le* dzadza ge, eye ahom sesẽwo atu ahamui ƒu anyi.+
12 Eye ne glia mu la, woabia mi be, ‘Afi kae akalo si miesi ɖe eŋu la le’?+
13 “Eya ta ale Aƒetɔ Dziɖulagã Yehowa gblɔe nye esi: ‘Mana ahom sesẽwo natu le nye dɔmedzoe me, tsi adza bababa le nye dziku me, eye tsikpewo adza le nye dɔmedzoe me ahagblẽ nu.
14 Mamu gli si miesi akalo na ahana wòaɖo baba ɖe anyi, eye eƒe gɔmeɖoanyi atsi gota. Ne wotsrɔ̃ dua la, miatsrɔ̃ kplii; ne miadze sii be, nyee nye Yehowa.’
15 “‘Ne meɖe nye dziku blibo la ɖe gli la kple ame siwo le akalo sim nɛ ŋu vɔ la, magblɔ na mi be, “Gli la megali o, eye ame siwo le akalo sim nɛ hã megali o.+
16 Israel ƒe nyagblɔɖila siwo le nya gblɔm ɖi le Yerusalem, eye wole ŋutifafaŋutegawo kpɔm nɛ, evɔ ŋutifafa aɖeke meli o la nu yi,”’+ Aƒetɔ Dziɖulagã Yehowa ye gblɔe.
17 “Amegbetɔvi, trɔ mo ɖe wò dukɔ vinyɔnu siwo ŋutɔwo kpa nyawo nɔa gbɔgblɔm ɖi la ŋu, eye nàgblɔ nya ɖi ɖe wo ŋu.
18 Gblɔ na wo be, ‘Ale Aƒetɔ Dziɖulagã Yehowa gblɔe nye esi: “Baba na nyɔnu siwo tɔa avɔnuɖeɖiwo na abɔ sia abɔ,* eye wowɔa tatsyɔnuwo ɖe ta ƒomevi ɖe sia ɖe ƒe lolome nu, be woatsɔ atre mɔ̃ aɖe amewo ƒe agbe!* Miele mɔ̃ trem na nye amewo ƒe agbe* vɔ tso hafi le didim be yewoakpɔ yewo ŋutɔwo yewoƒe agbe* taa?
19 Ðe miado vlom le nye dukɔ la dome le ƒo asiʋlo ʋɛ aɖewo kple abolo kakɛwo ta,+ esi miewua ame* siwo medze ku o la, eye miexɔa ame* siwo dze ku la ɖe agbe, to alakpa siwo miedana na nye dukɔ si ɖoa to miaƒe alakpanyawo la mea?”’+
20 “Eya ta ale Aƒetɔ Dziɖulagã Yehowa gblɔe nye esi: ‘Mi nyɔnu siawo, metso ɖe miaƒe avɔnuɖeɖi siwo mietsɔ le mɔ̃ trem na amewo* abe xeviwo ene la ŋu, malã wo ɖa le miaƒe alɔnu, eye mana ablɔɖe ame siwo mielé abe xeviwo ene la.
21 Mavuvu miaƒe tatsyɔnuawo, eye maɖe nye dukɔ la tso mia si me, eye womaganye nuléle na mi azɔ o; ne miadze sii be, nyee nye Yehowa.+
22 Elabena mieto miaƒe alakpadada dzi ɖe dzi le ame dzɔdzɔe ƒo,+ evɔ nyemedo nuxaxa nɛ hafi o, eye miedo ŋusẽ ame vɔ̃ɖi ƒe alɔ+ ale be wòagatrɔ tso eƒe mɔ vɔ̃ la dzi, ne wòatsi agbe o.+
23 Eya ta mi nyɔnu siawo miagakpɔ aʋatsoŋutegawo azɔ o, eye miagaka afa azɔ o;+ maɖe nye dukɔ la tso mia si me, ne miadze sii be, nyee nye Yehowa.’”
Etenuŋɔŋlɔ
^ Alo, “le nya gblɔm ɖi tso woawo ŋutɔ ƒe dzi me.”
^ Efia, gli masemasẽ ɖoɖo ahasi akalo nɛ be wòadze gli sesẽe.
^ Egɔmeɖeɖe tẽe, “Oo mi tsikpewo miele.”
^ Efia, bokɛ siwo wosana ɖe abɔ alo alɔnu.
^ Alo, “luʋɔ.”
^ Alo, “luʋɔ.”
^ Alo, “luʋɔ.”
^ Alo, “luʋɔ.”
^ Alo, “luʋɔ.”
^ Alo, “luʋɔwo.”
