Ezekiel 25:1-17
25 Yehowa ƒe gbe gava nam be:
2 “Amegbetɔvi, trɔ nàdze ŋgɔ Amonitɔwo+ nàgblɔ nya ɖi ɖe wo ŋu.+
3 Gblɔ na Amonitɔwo be, ‘Mise Aƒetɔ Dziɖulagã Yehowa ƒe nya. Ale Aƒetɔ Dziɖulagã Yehowa gblɔe nye esi: “Esi miegblɔ ‘Ehɛ̃!’ ɖe nye kɔkɔeƒe la ŋu esime wogblẽ kɔ ɖo nɛ, ɖe Israel-nyigba la ŋu esi wòzu gbegbe, eye miegblɔe ɖe Yuda ƒe aƒe la ŋu esi wòyi aboyo me la,
4 eya ta kpɔ ɖa, matsɔ wò ana Ɣedzeƒeviwo nàzu wo tɔ. Woatu woƒe nɔƒewo* ɖe mewò, eye woatu woƒe avɔgbadɔwo ɖe dowòme. Woaɖu wò kutsetsewo, eye woano wò notsi.
5 Mana Raba+ nazu kposɔwo ƒe gbeɖuƒe, eye Amon-nyigba nazu lãhawo ƒe gbɔɖemeƒe; ne miadze sii be, nyee nye Yehowa.”’”
6 “Elabena ale Aƒetɔ Dziɖulagã Yehowa gblɔe nye esi: ‘Esi nèsi akpe,+ tu afɔ anyi, eye nètso* aseye heɖu fewu le Israel ŋu ɖe vɔ̃ si dzɔ ɖe edzi ta la,+
7 eya ta nye hã mado nye asi ɖa ɖe ŋuwò, eye matsɔ wò ade asi na dukɔwo woaha. Maɖe wò ɖa le dukɔwo dome, eye matsrɔ̃ wò ɖa le anyigbawo dzi.+ Matsrɔ̃ wò gbidii, ne nàdze sii be nyee nye Yehowa.’
8 “Ale Aƒetɔ Dziɖulagã Yehowa gblɔe nye esi: ‘Esi Moab+ kple Seir+ gblɔ be, “Kpɔ ɖa! Yuda ƒe aƒe la le abe dukɔ bubuwo katã ene” ta la,
9 eya ta mana du siwo le Moab xa le eƒe liƒo dzi, du siwo nye anyigba la ƒe atsyɔ̃, natsi nuvo, tso Bet-Yesimot, Baal-Meon, va ɖo keke Kiriatayim ke.+
10 Matsɔ wo akpe ɖe Amonitɔwo ŋu ana Ɣedzeƒetɔwo+ be woazu wo tɔ, ale be womagaɖo ŋku Amonitɔwo dzi le dukɔwo dome azɔ o.+
11 Eye madrɔ̃ ʋɔnu le Moab,+ ne woadze sii be nyee nye Yehowa.’
12 “Ale Aƒetɔ Dziɖulagã Yehowa gblɔe nye esi: ‘Esi Edom bia hlɔ̃ Yuda ƒe aƒe, eye woɖi fɔ vevie le hlɔ̃biabia wo ŋuti la;+
13 eya ta ale Aƒetɔ Dziɖulagã Yehowa gblɔe nye esi: “Nye hã mado nye asi ɖa ɖe Edom ŋu, matsrɔ̃ amegbetɔwo kple lãwo siaa ɖa le eme, eye mana wòazu aƒedo.+ Woatsi yi nu tso Teman va se ɖe keke Dedan ke.+
14 ‘Mato nye dukɔ Israel ƒe asi dzi abia hlɔ̃ Edom.+ Woahe nye dziku kple nye dɔmedzoe ava Edom dzi, ne mabia hlɔ̃e,’+ Aƒetɔ Dziɖulagã Yehowa ye gblɔe.”’
15 “Ale Aƒetɔ Dziɖulagã Yehowa gblɔe nye esi: ‘Le fuléle kaɖikaɖi si le Filistitɔwo me tso blema ke ta la, woɖo tame vɔ̃ be yewoabia hlɔ̃ ahagblẽ nu.+
16 Eya ta ale Aƒetɔ Dziɖulagã Yehowa gblɔe nye esi: “Kpɔ ɖa, mado nye asi ɖa ɖe Filistitɔwo ŋu,+ maɖe Keretitɔwo ɖa,+ eye matsrɔ̃ ƒuta nɔlawo ƒe susɔea.+
17 Mabia hlɔ̃ wo vevie eye mahe to na wo le dɔmedzoe helĩhelĩ me, eye ne mebia hlɔ̃ wo la, ekema woadze sii be nyee nye Yehowa.”’”
