Lododowo 22:1-29
22 Ŋkɔ nyui tiatia nyo wu kesinɔnu geɖe;+Eye bubunɔameŋu* nyo wu klosalo kple sika.
2 Nu ɖeka si me kesinɔtɔ kple hiãtɔ sɔ lee nye be:*
Yehowae nye wo katã wɔla.+
3 Aɖaŋudzela kpɔa afɔku gbɔna eye wòɣlaa eɖokui,Ke ame makpɔnuteƒe yina ɖadea ta eme, eye wòkpɔa emetsonua.
4 Ðokuibɔbɔ kple Yehowa vɔvɔ̃Hea kesinɔnu, bubu kple agbe vanɛ.+
5 Ŋù kple mɔ̃ le mɔ dzi na ame si ƒe mɔ le gɔdɔ̃gɔdɔ̃,Ke ame sia ame si kpɔa eƒe agbe* ta la, nɔa adzɔge ʋĩi tso wo gbɔ.+
6 Mla ɖevi ɖe mɔ si wòato la ŋu;+Ne eva tsi hã mate ɖa le edzi o.+
7 Kesinɔtɔ ɖua amegã ɖe ame dahe dzi,Eye ame si doa nu le ame si la zua kluvi na ame si si wòdo nua le.+
8 Ame sia ame si ƒãa nu madzɔmadzɔ la, axa gbegblẽ,+Eye eƒe dɔmedzoe ƒe ameƒoti la nu ayi.+
9 Woayra ame si nyoa dɔme* na ame,Elabena emaa eƒe nuɖuɖu kple ame dahewo.+
10 Nya fewuɖula do goe,Ekema dzre ake;Eye nyahehe* kple dzudzu hã nu atso.
11 Ame si lɔ̃a dzi dzadzɛ eye eƒe numenyawo dzea to la,Eyae fia adze xɔlɔ̃e.+
12 Yehowa ƒe ŋkuwo kpɔa nunya ta,Ke etrɔa ame mawɔnuteƒe ƒe nyawo bua anyi.+
13 Kuviatɔ be: “Dzata le xexe!
Ava vuvum le ablɔ me!”+
14 Nyɔnu dzeha* ƒe nu la, ʋe globo wònye.+
Ame si Yehowa bu fɔe la, eyae age dze eme.
15 Bometsitsi bla ɖe ɖevi ƒe dzi ŋu,+Ke ameƒotie* aɖee ɖa le eŋu.+
16 Ame si tafaa ame dahe be nu geɖe nasu ye si+Kple ame si naa nu kesinɔtɔ la,Hiã atui.
17 Ƒu to anyi, ne nàse nunyalawo ƒe nyawo,+Ne wò dzi natrɔ ɖe nye sidzedze ŋu,+
18 Elabena enyo be nàdzra wo ɖo ɖe ɖokuiwò me,+Ne wo katã nanɔ nuyi dzi na wò ɖaa.+
19 Wò la, esi medi be nàɖo ŋu ɖe Yehowa ŋu taeMele nu fiam wò egbe sia ɖo.
20 Ðe nyemeŋlɔ nyaSiwo me aɖaŋuɖoɖo kple sidzedze le la na wò va yi,
21 Ne mafia nya siwo le eteƒe kple nya siwo ŋu kakaɖedzi le la wò,Ne nàtsɔ ŋuɖoɖo nyuitɔ ayi na ame si dɔ wò la oa?
22 Mègada adzo ame dahe le eƒe ahedada ta o,+Eye mègate ame tsɛ ɖe to le dugbo la nu o,+
23 Elabena Yehowa ŋutɔ axɔ woƒe nya ɖe akɔ,+Eye wòaɖe ame siwo daa adzo wo la ƒe agbe* ɖa.
24 Mègade ha kple dɔmedzoetɔ o,Eye mègado ka kple dzikutɔ o,
25 Ne nàva srɔ̃ eƒe mɔwo,Eye wòazu mɔ̃ aɖe wò* o.+
26 Mèganɔ ame siwo naa asi ame tsɔ doa ŋugbeBe yewoada megbe na fenyilawo la dome o.+
27 Ne mèkpɔ naneke tsɔ xe fea o la,Ðeko woava ɖe aba le tewò!
28 Mègatrɔ blemaliƒoSiwo tɔgbuiwòwo do tso blema ke la o.+
29 Èkpɔ ame si bi ɖe eƒe dɔ ŋua?
Fiawo ŋkumee wòado ɖo;*+Mado ɖe ame tsɛwo ŋkume o.*
Etenuŋɔŋlɔ
^ Egɔmeɖeɖe tẽe, “ŋudzedzekpɔkpɔ.”
^ Egɔmeɖeɖe tẽe, “Kesinɔtɔ kple hiãtɔ va do go.”
^ Alo, “luʋɔ.”
^ Egɔmeɖeɖe tẽe, “ame si ƒe ŋku kpɔa nublanui.”
^ Alo, “nyatsɔtsɔ yi ʋɔnu.”
^ Alo, “amehehe ƒe atie.”
^ Alo, “luʋɔ.”
^ Alo, “wò luʋɔ.”
^ Alo, “Fiawoe wòasubɔ.”
^ Alo, “Menye ame tsɛwoe wòasubɔ o.”
