Marko 12:1-44
12 Ede asi nuƒoƒo me na wo le lododowo me be: “Ame aɖe de waingble,+ eye wòtɔ kpɔ ƒo xlãe, ewɔ wainfiãƒe ɖe eme, eye wòtu agbledzɔxɔ ɖe eme,+ etsɔe de asi na agbledelawo, eye wòzɔ mɔ yi duta.+
2 Ke esi nuŋeɣi ɖo la, edɔ eƒe kluvi ɖeka ɖe agbledelawo gbɔ be wòaxɔ waingblea me kutsetse aɖewo tso wo gbɔ avɛ.
3 Ke wolée heƒoe, eye wogbugbɔe ɖo ɖa asi ƒuƒlui.
4 Egadɔ kluvi bubu ɖe wo gbɔ, ke woxlã nu ɖe ta nɛ hedo vloe.+
5 Eye wògadɔ bubu ɖa, ke wowu eya hã, egadɔ bubu geɖewo ɖa, ke woƒo ɖewo, eye wowu ɖewo hã.
6 Azɔ viŋutsuvi ɖeka le esi, si gbɔ melɔ̃a nu le o.+ Edɔ eya hã ɖe wo gbɔ gblɔ be, ‘Woasi vinye ŋkume ɖa.’
7 Ke agbledela mawo gblɔ le wo nɔewo dome be, ‘Ame siae nye domenyila la.+ Miva míawui, ne domenyinua nazu mía tɔ.’
8 Ale wolée hewui, eye wokɔe ƒu gbe ɖe waingble la godo.+
9 Nu kae waingbletɔa awɔ? Ava eye wòawu agbledelawo, eye wòatsɔ waingblea ade asi na ame bubuwo.+
10 Ðe miexlẽ ŋɔŋlɔ sia kpɔ be, ‘Kpe si xɔtulawo gbe la, eyae va zu dzogoedzikpe vevitɔ,+
11 Yehowa* gbɔe esia tso, eye wònye nu wɔnuku le mía ŋkume’ oa?”+
12 Ale wodi be yewoalée, elabena wokpɔe dze sii be yewo ŋue wòdo loa ɖo, gake wovɔ̃ ameha la. Eya ta wogblẽe ɖi dzo.+
13 Emegbe wodɔ Farisitɔwo kple Herodes habɔbɔ me nɔla aɖewo ɖe egbɔ be woalée le eƒe nuƒoƒo me.+
14 Esi wova la, wogblɔ nɛ be: “Nufiala, míenyae be ètoa nyateƒe, eye mèdea ame dzi o, elabena mèwɔa nu ɖe ale si ame dzena le gotae la nu o, ke boŋ èfiaa Mawu ƒe mɔ la le nyateƒe me. Ðe se ɖe mɔ* be woaxe adzɔ na Kaisaro loo, alo se meɖe mɔ o?
15 Míaxee loo alo mígaxee o?” Esi wòkpɔ woƒe alakpanuwɔwɔa dze sii la, ebia wo be: “Nu ka tae miele mɔ̃ trem nam? Mitsɔ denario* ɖeka vɛ makpɔ.”
16 Wotsɔ ɖeka vɛ, eye wòbia wo be: “Ame ka ƒe nɔnɔmetata kple nuŋɔŋlɔe nye esia?” Woɖo eŋu nɛ be: “Kaisaro tɔe.”
17 Eya ta Yesu gblɔ be: “Mitsɔ nu siwo nye Kaisaro tɔ la na Kaisaro,+ ke nu siwo nye Mawu tɔ la, na Mawu.”+ Eye eƒe nu wɔ nuku na wo.
18 Eyome Zadukitɔ siwo gblɔna be tsitretsitsi aɖeke meli o+ la va egbɔ hebiae be:+
19 “Nufiala, Mose ŋlɔ ɖi na mí be ne ame aɖe nɔviŋutsu ku hegblẽ srɔ̃a ɖi eye medzi vi aɖeke o la, nɔvia naxɔ nyɔnua aɖe, ne wòado ƒome ɖi nɛ.+
20 Nɔviŋutsu adre nɔ anyi kpɔ. Gbãtɔa ɖe srɔ̃, gake medzi vi aɖeke hafi ku o.
21 Eye evelia hã ɖe nyɔnua, gake eya hã ku evɔ medzi vi aɖeke o, eye etɔ̃lia hã nenema ke.
22 Eye wo ame adreawo katã medzi vi aɖeke o. Mlɔeba nyɔnua hã ku.
23 Le tsitretsitsia me ɖe, wo dometɔ ka srɔ̃ wòanye? Elabena wo ame adreawo katã ɖee kpɔ.”
24 Yesu gblɔ na wo be: “Ðe menye esia tae mieda ƒu le esi mienya Ŋɔŋlɔawo loo alo Mawu ƒe ŋusẽ la oa?+
25 Elabena ne wofɔ tso ame kukuwo dome la, ŋutsuwo maɖe srɔ̃ o, eye womatsɔ nyɔnuwo ana be woaɖe o, ke boŋ woanɔ abe mawudɔla siwo le dziƒo ene.+
26 Ke le ame kukuwo ƒe tsitretsitsi ŋuti la, ɖe miexlẽ ŋuve ŋuti nuŋlɔɖi si le Mose ƒe agbalẽa me, ale si Mawu gblɔ nɛ be: ‘Nyee nye Abraham ƒe Mawu kple Isak ƒe Mawu kpakple Yakob ƒe Mawu’ la oa?+
27 Menye ame kukuwo ƒe Mawue wònye o, ke boŋ agbagbeawo tɔe. Mieda ƒu ŋutɔ.”+
28 Esi agbalẽfialawo dometɔ ɖeka si va afi ma hese woƒe nyaʋiʋlia kpɔe be Yesu ɖo nya ŋu na wo nyuie la, ebiae be: “Se kae nye gbãtɔ* le wo katã dome?”+
29 Yesu ɖo eŋu be: “Gbãtɔe nye, ‘Oo Israel, see, Yehowa* mía Mawu la, Yehowa ɖeka koe,
30 eye nàlɔ̃ Yehowa* wò Mawu kple wò dzi blibo, wò luʋɔ* blibo, wò tamesusu blibo kple wò ŋusẽ blibo.’+
31 Eveliae nye esi, ‘Lɔ̃ hawòvi abe wò ŋutɔ ɖokuiwò ene.’+ Se bubu aɖeke megali si lolo wu esiawo o.”
32 Agbalẽfiala la gblɔ nɛ be: “Nufiala, ègblɔe nyuie le nyateƒe la nu be, ‘Ðeka koe wònye, eye bubu aɖeke megali o, negbe eya ko,’+
33 eye be woalɔ̃e kple dzi blibo kple gɔmesese blibo kpakple ŋusẽ blibo, eye woalɔ̃ ame havi abe ame ɖokui ene la xɔ asi sãsãsã wu numevɔsa blibowo kple vɔsawo katã.”+
34 Esi Yesu kpɔ be eɖo nyaa ŋu nunyatɔe la, egblɔ nɛ be: “Mèle adzɔge tso Mawu Fiaɖuƒe la gbɔ o.” Ke ame aɖeke megado dzi bia nya aɖekee o.+
35 Ke esi Yesu le nu fiam le gbedoxɔa me la, ebia be: “Aleke wɔ agbalẽfialawo gblɔna be David vie Kristo la nye?+
36 Evɔ gbɔgbɔ kɔkɔe+ la na David ŋutɔ gblɔ be, ‘Yehowa* gblɔ na nye Aƒetɔ be: “Bɔbɔ nɔ nye ɖusime va se ɖe esime matsɔ wò futɔwo ade wò afɔ te.”’+
37 Ne David ŋutɔ yɔe be ‘Aƒetɔ’ ɖe, ke aleke wɔ wònye via?”+
Eye ameha gã la ɖo toe dzidzɔtɔe.
38 Eyi eƒe nufiafia dzi gblɔ be: “Mikpɔ mia ɖokui dzi nyuie le agbalẽfiala siwo nɔa awu ʋlayawo me nɔa tsatsam, eye wodina be amewo nado gbe na yewo le ablɔwo* me,+
39 eye wolɔ̃a ŋgɔgbezikpuiwo dzi* nɔnɔ le ƒuƒoƒewo kple bubunɔƒewo nɔnɔ le fiẽnuɖuƒewo la ŋu.+
40 Woawoe daa adzo ahosiwo ƒe aƒewo,* eye wodoa gbe legbewo ɖa be amewo nakpɔ yewo.* Ame siawo ƒe ʋɔnudɔdrɔ̃ asesẽ wu.”
41 Yesu bɔbɔ nɔ anyi dze ŋgɔ nudzɔɖakawo+ hele ŋku lém ɖe ale si amewo le ga dem nudzɔɖakawo mee ŋu, eye kesinɔtɔ geɖewo tsɔa gaku geɖe dea wo me.+
42 Eye ahosi dahe aɖe tsɔ gaku sue eve siwo ƒe home le sue ŋutɔ* la va de eme.+
43 Eya ta eyɔ eƒe nusrɔ̃lawo va eɖokui gbɔ gblɔ na wo be: “Vavã mele egblɔm na mi be, ahosi dahe sia tsɔ geɖe de eme wu ame bubu siwo katã va de nu nudzɔɖakaawo me.+
44 Elabena wo katã wotsɔ woƒe nu gbogboawo ƒe ɖe ko va de eme, ke eya tso eƒe ahedada me tsɔ nu siwo katã le esi, si nu wòanɔ agbe ɖo la, de eme.”+
Etenuŋɔŋlɔ
^ Kpɔ Megbenyawo A5.
^ Alo, “Ðe wòsɔ.”
^ Kpɔ Megbenyawo B14.
^ Alo, “vevitɔ.”
^ Kpɔ Megbenyawo A5.
^ Kpɔ Megbenyawo A5.
^ Kpɔ Nya Tɔxɛwo Gɔmeɖeƒea.
^ Kpɔ Megbenyawo A5.
^ Alo, “asiwo.”
^ Alo, “teƒe nyuitɔwo.”
^ Alo, “nunɔamesiwo.”
^ Alo, “wowɔa ameŋkumenu doa gbe legbewo ɖa.”
^ Egɔmeɖeɖe tẽe, “lepta eve, si nye kuadra.” Kpɔ Megbenyawo B14.
