Marko 7:1-37
7 Farisitɔwo kple agbalẽfiala siwo tso Yerusalem va la dometɔ aɖewo ƒo ƒu ɖe eŋu.+
2 Eye wokpɔ be eƒe nusrɔ̃la aɖewo le nu ɖum kple asi ƒoɖiwo, si fia be womeklɔ asi o.*
3 (Elabena Farisitɔwo kple Yudatɔwo katã la, ne womeklɔ asi va se ɖe abɔklugui o la, womeɖua nu o, eye wolé blematɔwo ƒe kɔnyinyiwo me ɖe asi goŋgoŋ,
4 eye ne wotso asi me gbɔ la, ne womele tsi o la, womeɖua nu o. Kɔnyinyi bubu geɖewo hã li siwo me wolé ɖe asi vevie, abe kpluwo, zewo, kple akɔbligbawo nyɔnyrɔ ɖe tsi me ene.)+
5 Eya ta Farisitɔwo kple agbalẽfiala siawo biae be: “Nu ka tae wò nusrɔ̃lawo mewɔna ɖe blematɔwo ƒe kɔnyinyiwo dzi o, ke boŋ woɖua nu kple asi ƒoɖi?”+
6 Eɖo eŋu na wo be: “Yesaya gblɔe ɖi nyuie le mi alakpanuwɔlawo ŋuti, abe ale si woŋlɔe ɖi ene be, ‘Dukɔ sia le buyem kple woƒe nuyiwo, ke woƒe dzi te ɖa xaa tso gbɔnye.+
7 Dzodzroe wole subɔyem, elabena amegbetɔwo ƒe sededewoe wofiana.’+
8 Mieɖe asi le Mawu ƒe se la ŋu, ke mielé amegbetɔwo ƒe kɔnyinyiwo ya me ɖe asi goŋgoŋ.”+
9 Eye wògagblɔ na wo be: “Mieto ayemɔ dzi gbe Mawu ƒe se la, ne miawɔ ɖe miaƒe kɔnyinyiwo dzi.+
10 Le kpɔɖeŋu me, Mose gblɔ be, ‘Bu fofowò kple dawò,’+ eye be, ‘Woawu ame si dzua fofoa alo dadaa la.’+
11 Ke miawo ya miegblɔna be, ‘Ne ame aɖe gblɔ na fofoa alo dadaa be: “Nu si le asinye, si me nàkpɔ viɖe le tso gbɔnye hafi la, zu kɔrban (si gɔmee nye nunana si wotsɔ ɖe adzɔgbe na Mawu) la,”’
12 miegaɖea mɔ nɛ be wòawɔ naneke na fofoa alo dadaa o.+
13 Ale miena Mawu ƒe nya la zu dzodzro to miaƒe kɔnyinyi siwo mieɖo anyi la me.+ Eye miewɔa nu sia tɔgbi geɖewo.”+
14 Yesu gayɔ ameha la va eɖokui gbɔ, eye wògblɔ na wo be: “Mi katã miɖo tom, ne miase nye nyawo gɔme.+
15 Naneke metsoa gota gena ɖe ame me si ate ŋu aƒo ɖii o; ke boŋ nu siwo doa go tso ame me la, woawoe ƒoa ɖii.”+
16 * ——
17 Ke esi wòdzo le ameha la gbɔ yi ɖe aƒe aɖe me la, eƒe nusrɔ̃lawo bia nyae tso lododoa ŋu.+
18 Eye wògblɔ na wo be: “Ðe miawo hã miese egɔme oa? Ðe mienya be naneke metsoa gota gena ɖe ame me, si ate ŋu aƒo ɖii oa?
19 Elabena megena ɖe eƒe dzi me o, ke boŋ eƒe dɔ me wògena ɖo, eye wòdenɛ le nugodo oa?” Ale Yesu ɖee fia be nuɖuɖuwo katã ŋu kɔ.
20 Egagblɔ be: “Nu si doa go tso ame me lae ƒoa ɖii.+
21 Elabena ame ƒe dzi me+ kee susu vɔ̃wo doa go tso: matrewɔwɔwo,* fififiwo, amewuwuwo,
22 ahasiwɔwɔwo, ŋukeklẽ, nu vɔ̃ɖi wɔwɔwo, amebeble, aglãdzegbenɔnɔ,* ŋubiabiã,* busunyagbɔgblɔ, ɖokuidodoɖedzi kple movidzɔdzɔ.
23 Nu vɔ̃ɖi siawo katã doa go tso ame me, eye woawoe ƒoa ɖi ame.”
24 Eye Yesu dzo le afi ma yi Tiro kple Sidon nutowo me.+ Ege ɖe aƒe aɖe me, eye medi be ame aɖeke nanya o, gake mete ŋu ɣla eɖokui o.
25 Enumake nyɔnu aɖe si ƒe vinyɔnuvi me gbɔgbɔ makɔmakɔ aɖe le la se eŋkɔ, eye wòva tsyɔ mo anyi ɖe eƒe afɔnu.+
26 Enye Hela-nyɔnu aɖe si nye Sirofoiniketɔ,* eye wòle kuku ɖem nɛ be wòanya gbɔgbɔ vɔ̃ la ado goe le ye vinyɔnua me.
27 Ke Yesu gblɔ nɛ be: “Na ɖeviwo naɖi ƒo gbɔ, elabena mesɔ be woatsɔ ɖeviwo ƒe abolo aƒu gbe ɖo ɖe avuviwo o.”+
28 Ke nyɔnua ɖo eŋu nɛ be: “Aƒetɔ, ele eme baa, gake avuvi siwo le kplɔ̃a te la ɖua ɖeviwo ƒe nuɖuɖu wuwlui siwo duduna.”
29 Egblɔ nɛ be: “Esi nèɖo eŋu alea ta la, heyi; gbɔgbɔ vɔ̃ la do go le viwònyɔnuvia me.”+
30 Ale nyɔnu la dzo yi aƒe me, eye wòkpɔ ɖevi la wòmlɔ anyi ɖe aba dzi, eye gbɔgbɔ vɔ̃ la do go le eme.+
31 Esi Yesu trɔ tso Tiro nutoa me la, eto Sidon heva to Dekapoli* yi Galilea-ƒua nu.+
32 Wokplɔ ŋutsu tokunɔ aɖe si metea ŋu ƒoa nu nyuie o la va egbɔ le afi ma,+ eye woɖe kuku nɛ vevie be wòada asi ɖe edzi.
33 Ekplɔe do le ameha la dome yi adzɔge. Eye wòtsɔ eƒe asibidɛwo de ŋutsua ƒe to me, eɖe ta, eye wòka asi eƒe aɖe ŋu.+
34 Ekpɔ dziƒo, eɖe hũ, eye wògblɔ nɛ be: “Efata,” si gɔmee nye: “Ʋu.”
35 Ale eƒe towo ʋu,+ eye eƒe aɖeka hã ɖɔ ɖo wòde asi nuƒoƒo me nyuie.
36 Ede se na wo be womegagblɔe na ame aɖeke o;+ gake zi ale si wòde se na woe la, zi nenemae wokakaa nya lae.+
37 Vavãe, ewɔ nuku na wo ale gbegbe+ be wogblɔ be: “Ewɔa nuwo katã nyuie. Enana tokunɔwo gɔ̃ hã sea nu, eye aɖetututɔwo ƒoa nu.”+
Etenuŋɔŋlɔ
^ Efia, womekɔ wo ɖokui ŋuti le Yudatɔwo ƒe kɔnyinyi nu o.
^ Kpɔ Megbenyawo A3.
^ Helagbe, pornia. Kpɔ Nya Tɔxɛwo Gɔmeɖeƒea.
^ Alo, “ŋukpenanuwɔwɔ.” Helagbe aselgia. Kpɔ Nya Tɔxɛwo Gɔmeɖeƒea.
^ Alo, “ŋku si biãa ŋu.”
^ Alo, “Sirofoinike vidzidzi.”
^ Alo, “Du Ewoawo Ƒe Nuto Me.”
