Psalmowo 34:1-22
David ƒe ha, esime wòdo tsu+ eɖokui le Abimelek ŋkume, ale be wònyae dzoe.
א [Alef]
34 Makafu Yehowa ɣeawokatãɣi;Eƒe kafukafu anɔ nu nam ɖaa.
ב [Bet]
2 Matsɔ* Yehowa aƒo adegbe;+Ame fafawo asee, eye dzi adzɔ wo.
ג [Gimel]
3 Mido kɔkɔ Yehowa kplim;+Eye mina míawɔ ɖeka ado eƒe ŋkɔ ɖe dzi.
ד [Dalet]
4 Medi Yehowa yome mɔ, etɔ nam.+
Eɖem tso nu siwo katã vɔ̃m mele la me.+
ה [He]
5 Dzidzɔ ɖo mo na ame siwo le esinu kpɔm;Woƒe mo metsi dãa o.
ז [Zayin]
6 Esi hiãtɔ sia yɔe la, Yehowa see.
Eɖee tso eƒe hiãwo katã me.+
ח [Het]
7 Yehowa ƒe dɔla ƒua asaɖa anyi ɖe ame siwo vɔ̃nɛ la ŋu godoo va kpe,+Eye wòɖea wo.+
ט [Tet]
8 Miɖɔe kpɔ, eye miakpɔe be Yehowa nyo;+Dzidzɔtɔe nye ame si sinɛ tsona.
י [Yod]
9 Mivɔ̃ Yehowa, mi eƒe ame kɔkɔewo katã,Elabena hiã metua ame siwo vɔ̃nɛ la o.+
כ [Kaf]
10 Hiã tua dzata* sesẽwo gɔ̃ hã eye dɔ wua wo,Ke ame siwo dia Yehowa la, nu nyui aɖeke mahiã wo o.+
ל [Lamed]
11 Vinyewo, miva, miɖo tom,Ne mafia Yehowa vɔvɔ̃ mi.+
מ [Mem]
12 Mia dometɔ kae lɔ̃a agbeEye wòle didim vevie be yeakpɔ ŋkeke nyui geɖewo?+
נ [Nun]
13 Ekema nekpɔ eƒe aɖe dzi le vɔ̃ ŋu,+Kple eƒe nuyiwo dzi le amebeble ŋu.+
ס [Samek]
14 Trɔ ɖa le vɔ̃ ŋu, ne nàwɔ nyui;+Di ŋutifafa, eye nàti eyome.+
ע [Ayin]
15 Yehowa ƒe ŋkuwo le ame dzɔdzɔewo ŋu,+Eye eƒe towo le woƒe ɣlidodowo ŋu.+
פ [Pe]
16 Ke Yehowa tɔa ŋku nu vɔ̃ɖi wɔlawo,Ne wòatutu nu sia nu si ana woaɖo ŋku wo dzi la ɖa le anyigba la dzi.+
צ [Tsade]
17 Wodo ɣli, Yehowa see;+Eye wòɖe wo tso woƒe xaxawo katã me.+
ק [Kof]
18 Yehowa tsɔ ɖe ame siwo ƒe dzi gbã gudugudu la gbɔ;+Exɔna na ame siwo ƒe gbɔgbɔ ŋu nu te la.*+
ר [Res]
19 Ame dzɔdzɔe ƒe fukpekpewo* sɔ gbɔ,+Ke Yehowa ɖenɛ le wo katã me.+
ש [Sin]
20 Ekpɔa eƒe ƒuwo katã ta;Womeŋe wo dometɔ ɖeka pɛ hã o.+
ת [Taw]
21 Vɔ̃ aɖi kpe ame vɔ̃ɖi wòaku;Eye woabu fɔ ame siwo léa fu ame dzɔdzɔe la.
22 Yehowa ɖea esubɔlawo ƒe agbe;*Womabu fɔ ame siwo sinɛ tsona la dometɔ aɖeke o.+
Etenuŋɔŋlɔ
^ Alo, “Nye luʋɔ atsɔ.”
^ Alo, “dzatatsui.”
^ Alo, “ame siwo ƒo dzi ɖe le.”
^ Alo, “xaxawo.”
^ Alo, “luʋɔ.”
