Yeremiya 16:1-21
16 Yehowa ƒe gbe gava nam be:
2 “Mègaɖe srɔ̃ o, eye mègadzi ŋutsuviwo kple nyɔnuviwo ɖe teƒe sia o.
3 Elabena ale Yehowa gblɔ ɖe ŋutsuvi kple nyɔnuvi siwo dzim wole ɖe teƒe sia, kple wo dada siwo dzi wo kpakple wo fofo siwo dzi wo ɖe anyigba sia dzi la ŋue nye esi:
4 ‘Dɔvɔ̃ awu wo,+ womafa na wo o, eye womaɖi wo hã o; woazu abe aɖu ene le anyigba la dzi.+ Yi kple dɔwuame atsrɔ̃ wo,+ eye woƒe kukuawo azu nuɖuɖu na dziƒoxewo kpakple anyigbadzilãwo.’
5 Elabena ale Yehowa gblɔe nye esi,‘Mègayi aƒe si me konyifalawo ɖo nuɖukplɔ̃ ɖo o,Eye mègayi ɖafa konyi ahado baba na wo o.’+
‘Elabena meɖe nye ŋutifafaKple amenuveve kpakple nublanuikpɔkpɔ ɖa le dukɔ sia dzi,’+ Yehowa ye gblɔe.
6 Amegãwo kple ame tsɛwo siaa aku ɖe anyigba sia dzi.
Ame aɖeke maɖi wo loo,Alo afa na wo o,Eye ame aɖeke masi eɖokui alo alũ ta kokoe le wo ta o.*
7 Ame aɖeke mana nuɖuɖu konyifalawoAtsɔ afa akɔ na wo le ame si ku na wo la ta o;Eye ame aɖeke mana akɔfakplu si me aha le hã woWoano le wo fofo alo wo dada ƒe ku ta o.
8 Eye mègayi aglotuƒeNe nàbɔbɔ nɔ anyi aɖu nu ahano nu kpli wo o.’
9 “Elabena ale aʋakɔwo ƒe Yehowa, Israel ƒe Mawu la, gblɔe nye esi, ‘Kpɔ ɖa, mana aseyetsotso kple dzidzɔɣli, ŋugbetɔsrɔ̃ ƒe gbe kple ŋugbetɔ ƒe gbe nu natso le teƒe sia le mia ŋkume le mia ŋɔli.’+
10 “Ne ègblɔ nya siawo katã na dukɔ sia, eye wobia wò be, ‘Nu ka tae Yehowa gblɔ vɔ̃ gã sia katã ɖe mía ŋu? Vo kae míeda, eye nu vɔ̃ kae míewɔ ɖe Yehowa mía Mawu la ŋu?’+ hã la,
11 Ekema nàɖo eŋu na wo be, ‘Ale Yehowa gblɔe nye esi: “Elabena mia tɔgbuiwo gblẽm ɖi,+ eye wodze mawu bubuwo yome, wosubɔ wo hede ta agu na wo.+ Ke wogblẽm ɖi, eye womelé nye se la me ɖe asi o.+
12 Ke miawo miewɔ nu gbegblẽ wu mia tɔgbuiwo,+ eye mia dometɔ ɖe sia ɖe dze eƒe dzimesesẽ vɔ̃ɖi yome, eye miegbe toɖoɖom.+
13 Eya ta matsɔ mi aƒu gbe tso anyigba sia dzi aɖo ɖe anyigba si mia tɔgbuiwo loo alo miawo ŋutɔwo mienya o la dzi,+ eye miasubɔ mawu bubuwo le afi ma zã kple keli,+ elabena nyemave mia nu o.”’
14 “Yehowa be, ‘Gake ŋkekewo li gbɔna, esime womagagblɔ azɔ be, “Zi ale si Yehowa, ame si kplɔ Israel-viwo tso Egipte-nyigba dzi la le agbe!”+ o,
15 ke boŋ woagblɔ be: “Zi ale si Yehowa, ame si kplɔ Israel-viwo tso dziehenyigba dzi kple anyigba siwo katã dzi wòka wo hlẽ ɖo dzi la le agbe!” eye makplɔ wo agbɔe va woƒe anyigba si metsɔ na wo tɔgbuiwo la dzi.’+
16 Yehowa be: ‘Madɔ tɔƒodela geɖewo ɖa,Eye woaɖe wo.
Emegbe madɔ adela geɖewo ɖa,Eye woayɔ wo ɖe nu le towo kple togbɛwo katã dziKpakple agatowo katã me.
17 Elabena nye ŋku le nu siwo katã wowɔna la ŋu.*
Womeɣla ɖem o,Eye woƒe vodadawo hã mele ɣaɣla ɖe nye ŋkuwo o.
18 Gbã la, maxe woƒe vodadawo kple woƒe nu vɔ̃wo ŋuti fe la katã na wo,+Elabena wotsɔ woƒe legba nyɔŋu siwo me agbe mele o* la, gblẽ kɔ ɖo na nye anyigba la.Eye wotsɔ woƒe ŋunyɔnuwo yɔ nye domenyinu la dzi fũu.’”+
19 Oo Yehowa, nye ŋusẽ kple nye mɔ́ sesẽ,Nye sitsoƒe le xaxagbe,+Gbɔwòe dukɔwo atso anyigba ƒe mlɔenuwo avaEye woagblɔ be: “Alakpa,Tofloko kple nu maɖinuwo sɔŋ koe mía tɔgbuiwo tsɔ nyi domee.”+
20 Ðe amegbetɔ ate ŋu awɔ mawuwo na eɖokuiEsime womenye mawu aɖeke oa?+
21 “Eya ta mana woadze sii,Azɔ mana woadze si nye ŋusẽ kple nye ŋutete,Eye woadze sii be ŋkɔnyee nye Yehowa.”
Etenuŋɔŋlɔ
^ Anye be enye trɔ̃subɔlawo ƒe ame kukuwo fafa kɔnu si Israel gbexɔse la srɔ̃.
^ Egɔmeɖeɖe tẽe, “le woƒe mɔwo katã ŋu.”
^ Egɔmeɖeɖe tẽe, “legba kukuwo.”
