Yeremiya 46:1-28
46 Esiae nye Yehowa ƒe gbe si va na nyagblɔɖila Yeremiya ɖe dukɔwo ŋu:+
2 Hena Egipte,+ ɖe Egipte-fia Farao Neko+ ƒe aʋakɔ si le Frat-tɔsisia nu, ame si dzi Babilon-fia Nebukadnezar* ɖu le Karkemis, le Yuda-fia Yehoyakim,+ Yosiya vi ƒe ƒe enelia me la ŋu:
3 “Midzra akpoxɔnu suewo kple akpoxɔnu gãwo ɖo,Ne miayi aʋa.
4 Mi sɔdolawo, mibla akpa na sɔwo, mide sɔwo dzi.
Eye miɖɔ gakuku miava tɔ ɖi.
Minyre akplɔwo eye miado miaƒe gawuwo.
5 ‘Nu ka ŋuti dzidzi ƒo wo mekpɔ?
Wogbugbɔ ɖe megbe, woɖu woƒe aʋawɔlawo dzi.
Vɔvɔ̃ ɖo wo wosi, eye woƒe aʋawɔlawo metrɔ kpɔ megbe o.
Ŋɔdzi li godoo,’ Yehowa ye gblɔe.
6 ‘Ame ɖeablɛ mate ŋu asi o, eye kalẽtɔwo mate ŋu ade afɔ du me o.
Wokli nu le dziehe le Frat-tɔsisi la toHedze anyi.’+
7 Ame kae nye esia gbɔna abe Nil-tɔsisi ene,Abe tɔsisi siwo me tsiwo dze agbo ene?
8 Egipte gbɔna abe Nil-tɔsisi+ ene, eye eƒe tsiwo leAbe tɔsisi si dze agbo ene,Egblɔ be, ‘Maho aɖagbagba ɖe anyigba la dzi.
Matsrɔ̃ du la kple emenɔlawo siaa.’
9 Mi sɔwo, miho yi!
Mi tasiaɖamwo, minyè zi ge ɖe eme!
Kalẽtɔwo neho,Kus kple Put, ame siwo si me akpoxɔnu le,+Kple Ludtɔwo,+ ame siwo nye aŋutrɔdalawo, eye wovua da me.+
10 “Ŋkeke ma nye Aƒetɔ Dziɖulagã, aʋakɔwo ƒe Yehowa tɔ, enye hlɔ̃biaŋkeke si dzi wòabia hlɔ̃ eƒe ketɔwo le. Yi aɖu nu aɖi ƒo, eye wòano woƒe ʋu wòaɖi kɔ nɛ, elabena Aƒetɔ Dziɖulagã, Yehowa, aʋakɔwo ƒe Mawu la, le vɔ sa ge* le dziehenyigba dzi le Frat-tɔsisi la nu.+
11 Oo Egipte ɖetugbui leaƒe,Yi Gilead nàxɔ balsam-mi.+
Dzodzroe nèle atike geɖe wɔm,Elabena màhaya akpɔ o.+
12 Dukɔwo se ale si wodo vlo wò,+Eye wò ɣlidodo xɔ anyigba la katã dzi.
Elabena kalẽtɔ kli kalẽtɔ,Ale be wo ame evea siaa dze anyi.”
13 Nya si Yehowa gblɔ na nyagblɔɖila Yeremiya ku ɖe ale si Babilon-fia Nebukadnezar* gbɔna Egipte-nyigba si ge ŋu lae nye esi:+
14 “Migblɔe le Egipte, eye miɖe gbeƒãe le Migdol,+
Miɖe gbeƒãe le Nof* kple Tahpanhes.+
Migblɔ be: ‘Tso nàdzra ɖo nàva tɔ ɖi,Elabena yi aɖu nu le ŋuwò godoo va kpe.
15 Nu ka tae wò ŋusẽtɔwo nu yi ale?
Womete ŋu nɔ te o,Elabena Yehowa tutu wo ƒu anyi.
16 Wo dometɔ geɖe kli nu dze anyi.
Wogblɔ na wo nɔewo be:
“Tso! Na míagbugbɔ ayi míaƒe dukɔ kple mía denyigba dziLe yi sẽŋuta la ta.”’
17 Eye wogblɔ le afi ma be:‘Ɣli ƒuƒlu dola koe Egipte-fia Farao nye.Ena mɔnukpɔkpɔa* to eŋu.’+
18 Ale Fia si ŋkɔe nye aʋakɔwo ƒe Yehowa gblɔe nye esi: ‘Zi ale si mele agbe la,Ava,* abe ale si Tabor+ le towo domeKple Karmel+ le atsiaƒu nu ene.
19 Oo Egipte vinyɔnu,Do aboyomeyigba.
Elabena Nof* azu ŋɔdzinu;Woatɔ dzoe,* ale be ame aɖeke maganɔ eme o.+
20 Egipte le abe nyinɔe dzeani aɖe ene,Gake nu dzodzoe téamewo atso dziehe ava ƒo ɖe edzi.
21 Asrafo siwo wòda, eye wole eme la, hã le abe nyivi damiwo ene,Ke woawo hã wogbugbɔ ɖe megbe hesi.
Womete ŋu nɔ te o,+Elabena woƒe xaxagbe ɖo,Eye akɔntabiaɣi de.’
22 ‘Eŋkɔ le ɖiɖim abe da si le yiyim gɔdɔgɔdɔ̃ tɔ ene,Elabena woɖee ɖe enu kple fíawoAbe ŋutsu siwo le atiwo tsom* ene.
23 Woaƒo eƒe ave la, togbɔ be womate ŋu ayi eme o hã,’ Yehowa ye gblɔe.
‘Elabena wosɔ gbɔ wu ʋetsuviwo, womele xexlẽ me o.
24 Ŋukpe alé Egipte vinyɔnu la.
Woatsɔe ade asi na dziehedukɔ la.’+
25 “Aʋakɔwo ƒe Yehowa, Israel ƒe Mawu la, gblɔ be: ‘Kpɔ ɖa, matrɔ ɖe Amon+ si le No*+ ŋu, ɖe Farao ŋu, ɖe Egipte ŋu, ɖe eƒe mawuwo ŋu,+ ɖe eƒe fiawo ŋu—ɛ̃, matrɔ ɖe Farao kple ame siwo katã le ŋu ɖom ɖe eŋu la ŋu.’+
26 “‘Matsɔ wo ade asi na ame siwo le didim be yewoaɖe woƒe agbe* ɖa, eye matsɔ wo ade asi na Babilon-fia+ Nebukadnezar* kple eƒe subɔviwo. Gake emegbe woaganɔ eme abe tsãŋkekewo ene,’ Yehowa ye gblɔe.+
27 ‘Ke wò, nye subɔla Yakob, mègavɔ̃ o,Oo Israel, dzidzi megaƒo wò o.+
Elabena maɖe wò tso didiƒeKple wò dzidzimeviwo tso anyigba si dzi woɖe aboyo wo yii la dzi.+
Yakob atrɔ agbɔ ava nɔ anyi kpoo, eye womaɖe fu nɛ o,Eye ame aɖeke mado voɖi nɛ o.+
28 Yehowa be, ‘Wò nye subɔla Yakob, mègavɔ̃ o, elabena meli kpli wò.’
Matsrɔ̃ amewo le dukɔ siwo katã dome meka wò hlẽ ɖo la me,+Ke nyematsrɔ̃ wò ya o.+
Mahe to na wò* ale si dze,+Gake nyemagbe tohehe na wò o.”
Etenuŋɔŋlɔ
^ Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
^ Alo, “le ame wu ge.”
^ Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
^ Alo, “Memfis.”
^ Egɔmeɖeɖe tẽe, “ɣeyiɣi ɖoɖi la.”
^ Efia, ame si aɖu Egipte dzi le aʋa me.
^ Alo, “Memfis.”
^ Agate ŋu afia, “Azu aƒedo.”
^ Alo, “le nake fɔm.”
^ Efia, Tebes.
^ Alo, “luʋɔ.”
^ Egɔmeɖeɖe tẽe, “Nebukadrezar,” esia nye ŋkɔ Nebukadnezar ŋɔŋlɔ bubui.
^ Alo, “Maɖɔ wò ɖo.”
