Yoel 2:1-32
2 “Miku kpẽ le Zion!+
Mido aʋaɣli le nye to kɔkɔe la dzi.
Anyigbadzinɔlawo katã nedzo nyanyanya,Elabena Yehowa ƒe ŋkeke la gbɔna!+ Etu aƒe!
2 Viviti kple blukɔ dogbee,+Alilikpo kple tsizi dogbee;+Anɔ abe ale si agudzedze ƒe kekeli xɔa towo tame ene.
Dukɔ aɖe li, si me tɔwo sɔ gbɔ, eye wòsẽ ŋu;+Etɔgbi menɔ anyi kpɔ o,Eye ɖeke mava ɖe eyome o,Tso dzidzime yi dzidzime.
3 Dzo le nu bim le eŋgɔ,Eye dzoƒaɖe le nu fiãm le emegbe.+
Anyigba la le eŋgɔ abe Eden-bɔ ene;+Ke emegbe nye gbegbe ɖeɖe sɔŋ,Eye naneke mate ŋu asi le enu o.
4 Wole abe sɔwo ene,Eye woƒua du abe sɔwoe le aʋagbe dzi ene.+
5 Wole kpo tim eye woƒe nuwɔna le ɖiɖim abe tasiaɖamwo ƒe hoowɔwɔ le towo tame ene,+Abe dzoe le gbe ƒuƒu bim ene.
Ele abe dukɔ sẽŋu aɖe si ho le aʋalɔgowo me ene.+
6 Dukɔwo adzo nyanyanya le wo ta.
Mowo katã afu kpii.
7 Woƒua du abe aʋawɔlawo ene,Woliaa gli abe aʋamewo ene,Wo dometɔ ɖe sia ɖe le eƒe mɔ dzi,Eye womedzena le woƒe toƒewo o.
8 Wo dometɔ aɖeke memimi nɔvia o;Wo dometɔ ɖe sia ɖe lé eƒe mɔ tsɔ;
Ne wo dometɔ aɖe tsi aŋutrɔ* nu hã la,Mamlɛawo metɔna o.
9 Wolũ ɖe du la dzi hege ɖe eme, woƒu du to gliwo dzi.
Wolia aƒewo, eye woto fesrewo nu ge ɖe eme abe fiafitɔ ene.
10 Anyigba la dzo kpekpekpe le eŋgɔ, dziƒo ʋuʋu.
Ɣe kple ɣleti do viviti,+Eye ɣletiviwo hã megale keklẽm o.
11 Yehowa aɖe gbe le eƒe aʋakɔ la ŋgɔ,+ elabena eƒe aʋakɔ la me tɔwo sɔ gbɔ ŋutɔ.+
Eya ame si wɔa eƒe nya dzi la tri akɔ;Elabena Yehowa ƒe ŋkeke la nye ŋkeke gã aɖe eye ŋɔdzi le eŋu ŋutɔ.+
Ame kae ate ŋu anɔ te ɖe enu?”+
12 Yehowa be: “Azɔ la, mitsɔ dzi blibo,+Nutsitsidɔ,+ avifafa kple konyifafa va gbɔnye.
13 Midze miaƒe dziwo,+ menye miaƒe awuwo o,+Eye migbugbɔ va Yehowa mia Mawu la gbɔ,Elabena esea veve ɖe ame nu, eye wòkpɔa nublanui, medoa dziku kabakaba o,+ eƒe lɔlɔ̃ si nu metsina o la sɔ gbɔ,+Eye wòagbugbɔ vɔ̃ la ŋu abu.*
14 Ame kae nya ne atrɔ, eye wòagbugbɔ eŋu abu,+Ale be wòagblẽ yayra ɖe megbe,Ne woatsɔ nuɖuvɔsa kple nunovɔsa ana Yehowa mia Mawu la?
15 Miku kpẽ le Zion!
Miɖe gbeƒã nutsitsidɔ kɔkɔe; miyɔ takpekpe tɔxɛ.+
16 Miƒo dukɔ la nu ƒu; mikɔ ameha la ŋu.+
Miƒo amegãɖeɖiwo* nu ƒu; miƒo ɖeviwo kple vi nonowo nu ƒu.+
Ŋugbetɔsrɔ̃ nedo tso eƒe xɔgã me, eye ŋugbetɔ nedo tso eƒe xɔ me.
17 Nunɔla siwo wɔa subɔsubɔdɔ na Yehowa la nefa aviLe akpata la kple vɔsamlekpui+ la dome agblɔ be:
‘Oo Yehowa, kpɔ nublanui na wò dukɔ la dzro;Mègana wò domenyinu la nazu vlodonu,Ne dukɔwo naɖu fia ɖe wo dzi o.
Nu ka tae dukɔwo agblɔ be, “Afi kae woƒe Mawu la le?”’+
18 Yehowa aʋã ŋu ɖe eƒe anyigba la nu,Eye eƒe dɔme atrɔ ɖe eƒe dukɔ la ŋu.+
19 Yehowa aɖo eŋu na eƒe dukɔ la be:
‘Kpɔ ɖa, mele agblemenuku, wain yeye kple ami ɖom ɖe mi,Ne miaɖu aɖi ƒo;+Nyemagana miazu vlodonu le dukɔwo dome azɔ o.+
20 Manya dziehetɔ la ɖa le mia ŋu ayi adzɔge ʋĩi;Manyae ɖo ɖe kuɖiɖinyigba dzi kple gbegbe,Atrɔ mo ɖe ɣedzeƒeƒu* la ŋu,Eye wòatrɔ megbe ade ɣetoɖoƒeƒu* la.
Eƒe ʋeʋẽ ade dzi,+Eye eƒe ʋeʋẽ kũu la axɔ yame katã;Elabena Mawu awɔ nu gãgãwo.’
21 Oo anyigba, mègavɔ̃ o.
Dzi nedzɔ wò, eye nàtso aseye; elabena Yehowa le nu gãwo wɔ ge.
22 Mi gbemelãwo, migavɔ̃ o,Elabena gbeɖuƒewo ada ama le gbegbe,+Eye atiwo atse ku;+Gboti kple wainka atse kplanyaa.+
23 Mi Zion viwo, dzi nedzɔ mi, eye mitso aseye ɖe Yehowa mia Mawu la ŋu;+Elabena ana keletsi ale si nu asu mi la godoo,Ana tsi nadza na mi,Keletsi kple adatsi adza na mi abe tsã ene.+
24 Nukuƒoƒewo ayɔ fũu kple nuku nyui,Wain yeye ayɔ wainfiãƒewo agbagba, eye ami ado agbogbo ɖe amiɖaƒewo.+
25 Maɖo ƒe siwoƲetsuviwo ƒe ha gã, abɔwo, ʋetsuvi gblẽnuwo kple ʋetrawo ɖu nuwo la teƒe na mi;Woawoe nye nye aʋakɔ gã si medɔ ɖe mia ŋu.+
26 Miaɖu nu, aɖi ƒo,+Eye miakafu Yehowa mia Mawu,+Ame si wɔ nukunu siawo na mi la ƒe ŋkɔ;Ŋu magakpe nye dukɔ la azɔ o.+
27 Eye miadze sii be, mele nye dukɔ Israel dome,+Be nyee nye Yehowa mia Mawu,+ eye ɖeke megali o!
Ŋu magakpe nye dukɔ la azɔ o.
28 Le nu siawo megbe la, matrɔ nye gbɔgbɔ+ la akɔ ɖe ŋutilãwo katã ƒomevi dzi,Eye mia viŋutsuwo kple mia vinyɔnuwo agblɔ nya ɖi.Miaƒe amegãɖeɖiwo aku drɔ̃ewo.Eye miaƒe ɖekakpuiwo akpɔ ŋutegawo.+
29 Matrɔ nye gbɔgbɔ la akɔ ɖeNye kluviwo kple nye kosiwo gɔ̃ hã dzi le ŋkeke mawo me.
30 Mana dzesi wɔnukuwo nado ɖe dziƒo kple anyigba dzi:Ʋu, dzo kple dzudzɔ babla kɔtɔɔ.+
31 Ɣe ado viviti, eye ɣleti azu ʋu,+Hafi Yehowa ƒe ŋkeke gã dziŋɔ la nava ɖo.+
32 Eye ame sia ame si yɔa Yehowa ƒe ŋkɔ la, woaɖee;+Elabena amewo ado le eme dedie+ le Zion To dzi kple Yerusalem, abe ale si tututu Yehowa gblɔe ene,Woawoe nye agbetsila siwo Yehowa yɔ.”
Etenuŋɔŋlɔ
^ Alo, “aʋawɔnu.”
^ Alo, “vɔ̃ la ate ɖe edzi.”
^ Alo, “ametsitsiwo.”
^ Efia, Ƒukuku.
^ Efia, Domeƒu.
