Yosua 2:1-24
2 Eye Yosua, Nun vi la, dɔ ŋutsu eve tso Sitim+ le adzame be woayi aɖatsa ŋku. Egblɔ na wo be: “Miyi ɖakpɔ ale si anyigba la le, vevietɔ Yeriko.” Eya ta woyi, eye woge ɖe gbolo aɖe si ŋkɔe nye Rahab+ la ƒe me, eye wotsi afi ma.
2 Amewo yi ɖagblɔ na Yeriko-fia be: “Kpɔ ɖa! Israel ŋutsu aɖewo va afi sia zã sia me be yewoatsa ŋku le anyigba la dzi.”
3 Ale Yeriko-fia dɔ ame ɖe Rahab be: “Kplɔ ŋutsu siwo va dze aƒewò me la do goe, elabena ŋku tsa gee wova le anyigba blibo la dzi.”
4 Ke nyɔnu la tsɔ ŋutsu eveawo ɣla. Eye wògblɔ be: “Nyateƒee, ŋutsuawo nya va gbɔnye baa, gake nyemenya afi si wotso o.
5 Esime anyigba tsyɔ, eye agboawo tuɣi ɖo la, ŋutsuawo do go. Nyemenya afi si woɖo tae o, gake ne mieti wo yome kaba la, miatu wo.”
6 (Evɔ wònye ekplɔ wo yi xɔ ta, eye wòɣla wo ɖe ɖetifu* siwo woli kɔ ɖe fliwo me le xɔa ta la dome hafi.)
7 Eye ameawo ti wo yome ɖo ta Yordan tɔtsoƒe+ la, eye esi ame siwo ti wo yome nya do go ko la, wodo agbo la.
8 Hafi ŋutsuawo namlɔ anyi la, nyɔnua va wo gbɔ le xɔa ta.
9 Eye wògblɔ na ŋutsuawo be: “Menya be Yehowa atsɔ anyigba la ana mi,+ eye vɔvɔ̃ si le mia ŋu la lé mí.+ Dzi ɖe le anyigba la dzi nɔlawo katã ƒo le mia ta,+
10 elabena míese ale si Yehowa na Ƒudzĩ la mie le mia ŋgɔ esime mieʋu dzo le Egipte,+ kple nu si miewɔ Amori-fia eve, siwo nye Sihon+ kple Og,+ ame siwo mietsrɔ̃ gbidigbidi le Yordan ƒe go kemɛ* dzi.
11 Esi míesee la, dzi ɖe le mía ƒo,* eye dzi megale ame aɖeke ƒo o* le mia ta, elabena Yehowa mia Mawu lae nye Mawu le dziƒo afi mɛ kple anyigba dzi afii.+
12 Eya ta meɖe kuku, mika atam nam le Yehowa ŋkɔ me, be esi meve mia nu ta la, miawo hã miave fofonye ƒe aƒe la nu; eye mina dzesi si ŋu kakaɖedzi le lam,
13 be miana fofonye kple danye, nɔvinyeŋutsuwo kple nɔvinyenyɔnuwo kple wo ƒemetɔwo katã natsi agbe, eye miaɖe mí* tso ku me.”+
14 Eye ŋutsuawo gblɔ nɛ be: “Míatsɔ míaƒe agbe ana ɖe mia ta!* Ne miegblɔ nu si wɔ ge míeva ame aɖeke se o la, ekema míave nuwò ahawɔ nuteƒe na wò ne Yehowa tsɔ anyigba la na mí.”
15 Ema megbe la, ena woɖiɖi kple ka to eƒe xɔ si le dua ƒe gli dzi la, ƒe fesre nu ɖe anyi. Le nyateƒe me la, glia dzie eƒe aƒe le.+
16 Eye wògblɔ na wo be: “Miyi tonuto la me, ne miabe ɖe afi ma ŋkeke etɔ̃, ale be mia yometilawo nagake ɖe mia ŋu o. Eye ne mia yometilawo trɔ gbɔ la, ekema miate ŋu alé miaƒe mɔ.”
17 Ŋutsuawo ɖo eŋu nɛ be: “Atam+ sia si nèna míeka la ƒe fɔɖiɖi manɔ mía dzi o
18 negbe ne míeva anyigba la dzi, eye nèsa ka dzĩ sia ɖe fesre si nu nèɖiɖi mí toe la ŋu ko hafi. Eye ele be nàƒo fofowò kple dawò kple nɔviwòŋutsuwo kple fofowò ƒe aƒe blibo la katã nu ƒu ɖe gbɔwò le aƒea me.+
19 Eye ne ame aɖe do le wò aƒea me yi gota la, eƒe ʋu anɔ eya ŋutɔ ƒe ta dzi, ke míawo la, míaɖi fɔ o. Gake ne vɔ̃ aɖe dzɔ ɖe ame aɖe si le gbɔwò le aƒea me dzi la,* ekema eƒe ʋu ava míaƒe ta dzi.
20 Gake ne ègblɔ nu si wɔ ge míeva ame aɖe se+ la, ekema atam si nèna míeka la ƒe fɔɖiɖi aɖeke megale mía dzi o.”
21 Eɖo eŋu be: “Neva eme le miaƒe nyawo nu.”
Edo mɔ wo, eye wodzo. Emegbe esa ka dzĩ la ɖe fesrea ŋu.
22 Ale wodzo, eye woyi tonuto la me, eye wonɔ afi ma ŋkeke etɔ̃, va se ɖe esime wo yometilawo trɔ gbɔ. Wo yometilawo di wo le mɔ sia mɔ dzi, gake womeke ɖe wo ŋu o.
23 Azɔ ŋutsu eveawo gbugbɔ tso toawo dzi, eye wotso tɔa va Yosua, Nun vi la gbɔ. Woka nu siwo katã dzɔ ɖe wo dzi la ta nɛ.
24 Eye wogblɔ na Yosua be: “Yehowa tsɔ anyigba blibo la de asi na mí.+ Le nyateƒe me la, dzi ɖe le anyigba la dzi nɔlawo katã ƒo le mía ta.”+
Etenuŋɔŋlɔ
^ Woyɔe le Hebrigbe me be “pista.” Enye ati aɖe si wodona le Egipte, si le abe ɖeti ene. Woɖea ka le eme tsɔ lɔ̃a avɔe.
^ Efia, Yordan ƒe ɣedzeƒe.
^ Egɔmeɖeɖe tẽe, “gbɔgbɔ megaɖo ame aɖeke me o.”
^ Egɔmeɖeɖe tẽe, “míaƒe dziwo lólo.”
^ Alo, “míaƒe luʋɔwo.”
^ Alo, “Míaƒe luʋɔwo naku ɖe mia teƒe.”
^ Alo, “ne woka asi ame aɖe ŋu la.”
