KRISTOTƆWO ƑE AGBENƆNƆ
Gbeƒãɖeɖe Kple Nufiafia—Wole Vevie Be Míawɔ Amewo Nusrɔ̃lawo
Yesu de se na eyomedzelawo be woayi ava wɔ amewo woanye nusrɔ̃lawo. (Mt 28:19) Esia bia be míaɖe gbeƒã eye míafia nu. Ele be mí katã míanɔ mía ɖokuiwo biam be, ‘Nu kae mawɔ be nye gbeƒãɖeɖe kple nufiafia nanyo ɖe edzi?’
GBEƑÃÐEÐE
Le esi míanɔ lalam be amewo nava mía gbɔ teƒe la, ele be míadze agbagba boŋ be míadi “ame siwo dze.” (Mt 10:11) Ne míele gbeƒã ɖem la, ɖe míenɔa ŋudzɔ be míawɔ mɔnukpɔkpɔ siwo ʋu ɖi ŋu dɔ aɖi ɖase na ‘ame siwo míedo goea’? (Dw 17:17) Ale si apostolo Paulo ɖe gbeƒã kutrikukutɔe wɔe be Lidia va zu nusrɔ̃la.—Dw 16:13-15.
“Ƒã wò nukuwo le ŋdi, eye wò alɔ megadzudzɔ o va se ɖe fiẽ” (Nyg 11:6)
MIKPƆ VIDEO SI NYE YI EDZI NÀÐE GBEƑÃ “MADZUDZƆMADZUDZƆE”—LE VOME KPLE TSO AƑE ME YI AƑE ME, EYOME MIAÐO BIABIA SIAWO ŊU:
-
Le Samuel ƒe gbe sia gbe dɔwo me la, aleke wòɖee fia be yedi vevie be yeaƒã nyateƒea ƒe kuwo ɖe amewo ƒe dzi me?
-
Nu ka tae wòle be míaku kutri le gbeƒãɖeɖedɔa ƒe akpa sia akpa?
-
Ame kawoe nàte ŋu agblɔ Fiaɖuƒegbedeasia na ne èle wò gbe sia gbe dɔwo wɔm?
NUFIAFIA
Be míawɔ amewo woanye nusrɔ̃lawo la, menye agbalẽwo ko míanɔ wo nam o. Hafi míate ŋu akpe ɖe wo ŋu woayi ŋgɔ le mawusubɔsubɔ me la, ele be míatrɔ ayi wo gbɔ zi geɖe eye míasrɔ̃ Biblia kpli wo. (1Ko 3:6-9) Ke ne míaƒe kutrikuku be míafia Fiaɖuƒe ŋuti nyateƒea amewo mele ku boo tsem o ya ɖe? (Mt 13:19-22) Ele be míayi edzi anɔ ame siwo ƒe dzi le abe “anyigba nyui” ene la dim.—Mt 13:23; Dw 13:48.
“Medo nu, Apolo de tsii, ke Mawue nana wòtsina” (1Ko 3:6)
MIKPƆ VIDEO SI NYE YI EDZI NÀÐE GBEƑÃ “MADZUDZƆMADZUDZƆE”—LE DUTOƑO KPLE AMEWO WƆWƆ NUSRƆ̃LAWO, EYOME MIAÐO BIABIA SIAWO ŊU:
-
Aleke Solomon kple Mary de tsi nyateƒea ƒe ku si woƒã ɖe Ezekiel kple Abigail ƒe dzi me?
-
Taɖodzinu kae wòle be wòanɔ mía si le gbeƒãɖeɖedɔa ƒe akpa sia akpa si me dutoƒoɖaseɖiɖidɔa hã le la me?
-
Nu kae míawɔ wòafia be míaƒe taɖodzinu koŋue nye be míafia nyateƒea amewo?
