Le lɛta si gbɔgbɔ ʋã apostolo Paulo wòŋlɔ na Tito me la, ede dzi ƒo na ɖekakpuiwo, siwo dome Tito hã le be woawɔ wo tɔ sinua ‘aɖo kpɔɖeŋu nyui le dɔ nyuiwo wɔwɔ me le nu sia nu me.’ (Tit 2:6, 7) Emegbe le ta ma ke me la, Paulo gblɔ be Yesu kɔ Yehowa ƒe amewo ŋu ale be “woado vevie nu le dɔ nyuiwo wɔwɔ me.” (Tit 2:14) Dɔ nyui siawo dometɔ ɖekae nye be woaɖe gbeƒã eye woafia nu amewo tso Mawu Fiaɖuƒea ŋu. Ne sɔhɛe nènye la, ɖe nàte ŋu azã wò sɔhɛmeŋusẽ atsɔ awɔ kpekpeɖeŋu mɔɖeɖedɔ alo gbesiagbe mɔɖeɖedɔa?—Lod 20:29.

Ne èdi be yeawɔ mɔɖeɖedɔa la, ekema wɔ ɖoɖo ŋutɔŋutɔ siwo akpe ɖe ŋuwò be nàte ŋu awɔe. (Lk 14:28-30) Le kpɔɖeŋu me, aleke nàwɔ akpɔ wò ganyawo gbɔ ne èva le ɣeyiɣiawo katã ƒe subɔsubɔdɔa wɔm? Aleke nàwɔ akpɔ gaƒoƒo nudidia? Do gbe ɖa tso nɔnɔmea ŋu na Yehowa. (Ps 37:5) Ðo dze tso ɖoɖo si le asiwò la ŋu na dziwòlawo kple mɔɖela siwo doa vevie nu. Azɔ wɔ nu si ana nàɖo wò taɖodzinua gbɔ. Yehowa ayra ɖe agbagba siwo dzem nèle be yeado vevie nu le eƒe subɔsubɔdɔa me la dzi godoo!

MIKPƆ VIDEO SI NYE SƆHƐ SIWO KAFUA YEHOWA, EYOME MIAÐO BIABIA SIAWO ŊU:

• Kuxi kawo dzie ame aɖewo ɖu hafi te ŋu wɔ mɔɖeɖedɔa, eye aleke wowɔ esiae?

• Aleke dzilawo ate ŋu akpe ɖe wo viwo ŋu be woava nye gbesiagbe mɔɖelawo?

• Nu ka tae wòle vevie be gbeadzi ƒe ɖoɖowɔɖi nanɔ ame si?

• Aleke hamea me tɔwo ate ŋu akpe ɖe mɔɖela aɖe ŋu eye woade dzi ƒo nɛ?

• Yayra kawoe mɔɖelawo kpɔna?