Tso ƒe 2018 me la, magazine siwo míemana le gbeadzi dometɔ ɖe sia ɖe kuna ɖe nyati ɖeka aɖe koŋ ŋu. Magazine siawo katã le Dɔwɔnu Siwo Míetsɔ Fiaa Nui me. Ta míate ŋu azã wo le gbeadzi. Míate ŋu atsɔ ɖewo ɖe asi ne míeyina asi me alo míele mɔ zɔm. Mímezãa magazinewo tsɔ srɔ̃a Biblia kple amewo o, gake woate ŋu ana amewo nava tsɔ ɖe le Biblia me nyateƒea me.

Ne èle dze ɖom kple ame aɖe la, àte ŋu azã ŋɔŋlɔ aɖe eye emegbe nàhe susu yi magazine me nyati aɖe si ado dzidzɔ nɛ la dzi. Le kpɔɖeŋu me, ne ƒome le amea si, ku dzɔ ɖe edzi, alo nu te ɖe edzi la, àte ŋu agblɔ be: “Mexlẽ nyati nyui aɖe tso nya ma ŋu nyitsɔ laa. Màte ŋu atsɔe afia wòa?” Ne èkpɔe be amea tsɔ ɖe le eme la, àte ŋu atsɔ magazinea ɖeka nɛ, alo aɖoe ɖee to mɔ̃ dzi, ne zi gbãtɔe nye ema nèdo go amea gɔ̃ hã. Togbɔ be menye agbalẽwo mama koŋ ye nye míaƒe taɖodzinu o hã la, magazinewo ate ŋu akpe ɖe mía ŋu míake ɖe ame siwo di be yewoawɔ ɖe nu siwo yewosrɔ̃ dzi la ŋu.—Dw 13:48.