Tsɔe be Galileae nèle le Yesu ƒe ɣeyiɣiawo me. Èzɔ mɔ yi Yerusalem be yeava ɖu Agbadɔŋkekenyuia. Dua me yɔ fũu kple hatitadeagula siwo tso didiƒewo va. Èdi be yeasa vɔ na Yehowa. Eya ta ètsɔ gbɔ̃ aɖe ɖe asi eye nèto ameha siwo le dua me la dome ɖo ta gbedoxɔa gbɔ. Esi nèɖo la, èkpɔe be ame siwo hã di be yewoasa vɔ na Mawu la yɔ gbedoxɔa me. Mlɔeba eɖo dziwò be nàtsɔ wò gbɔ̃a na nunɔlaa. Gake ɣemaɣi tututue nèɖo ŋku edzi be nya aɖe le nɔviwò, si hã anya nɔ amehaawo dome le afi aɖe alo le dua me la si ɖe ŋuwò. Yesu gblɔ nu si wòle be nàwɔ. (Xlẽ Mateo 5:24.) Nu kae wòle be wò kple nɔviwòa miawɔ be ŋutifafa nava aƒe abe ale si Yesu gblɔe ene? Le aɖaka siwo le ete me la, wɔ dzesi ɖe nyaŋuɖoɖo nyuitɔ gbɔ.

ELE BE . . . 

• nàƒo nu kple nɔviwòa ne èsusu be yewɔ nane wòvee hafi ko

• nàdze agbagba be yeaɖɔ nɔviwòa ƒe susu ɖo ne èse le ɖokuiwò me be nu venɛ kabakaba akpa alo be nu si dzɔ la ƒe akpa aɖe tso egbɔ

• nàlé ɖokuiwò kpoo aɖo to ase nya si gblɔm wòle, ne mèse nanewo gɔme gɔ̃ hã o, eye nàɖe kuku nɛ vevie ɖe ale si wò nuwɔna te ɖe edzi alo gblẽ nu le eŋu ta

ELE BE NƆVIWÒA . . . 

• nagblɔ nu gbegblẽ si nèwɔ ɖe eŋu la na ame bubuwo le hamea me

• naka mo na wò, aƒo nu tso vodadaa ŋu tsitotsito eye wòabia tso asiwò be nàlɔ̃ ɖe wò vodadaa dzi

• natsɔe ake faa tso dzi me elabe ekpɔe be ɖe nèbɔbɔ ɖokuiwò helé dzi ɖe ƒo hafi te ŋu te ɖe ye ŋu

Togbɔ be míegatsɔa lãwo saa vɔe le míaƒe subɔsubɔ me egbea o hã la, kadodo kae Yesu gblɔ be ele ŋutifafa me nɔnɔ kple mía nɔviwo kpakple subɔsubɔ si dzea Mawu ŋu dome?