Kuxi kawoe nèwɔa avu kple gbe sia gbe? Ƒome ƒe ta si dzi agba geɖe lee nènyea? Dzilaɖekɛ si le agbagba dzem be yeakpɔ yeƒe ƒomea dzie nènyea? Sɔhɛ si sukuhatiwo ɖea fu na atraɖiie nènyea? Ðe lãmesẽnyawo alo tsitsimekuxiwo le fu ɖem na wòa? Kuxiwo ɖe kpe na mí katã. Le Kristotɔ geɖe gomea, kuxi geɖewo te ŋu vaa wo dzi le ɣeyiɣi ɖeka me. Ke hã, míenyae be eteƒe madidi o míavo tso kuxi siawo me.—2Ko 4:16-18.

Gake fifia ya, míenya be Yehowa sea nu siwo me tom míelea gɔme, ekpɔa ŋudzedze ɖe míaƒe nuteƒewɔwɔ kple dzidodo ŋu, eye ava yra mí geɖe le etsɔme; esiawo nyanya faa akɔ na mí ŋutɔ. (Yr 29:11, 12) Yesu hã tsɔ ɖe le eme na mí vevie, eye ne míele míaƒe akpa dzi wɔm abe Kristotɔwo enea, míate ŋu aka ɖe ŋugbe si wòdo dzi be: “Meli kpli mi.” (Mt 28:20) Ne míetɔ sẽe de ŋugble le ablɔɖe si míava kpɔ le Mawu Fiaɖuƒea te ŋua, míaƒe mɔkpɔkpɔa me agasẽ ɖe edzi eye míaɖoe kplikpaa wu be míado dzi le xaxa siwo vaa mía dzi fifia me.—Ro 8:19-21.

MIKPƆ VIDEO SI NYE WÒ ŊKU NÈNƆ YESU ŊU TUTUTU ESI AHOMTUGBE LA LE GOGOM! EYOME MIAÐO BIABIA SIAWO ŊU:

• Aleke wòdzɔe be ameƒomea va tra ɖa tso Mawu gbɔ, eye nu kae do tso eme?

• Etsɔme nyui kae le ame siwo wɔa nuteƒe na Yehowa lalam?

• Aleke etsɔme nyui sia awɔ ava eme?

• Yayra siwo asu mía si le xexe yeyea me kae nèle mɔ kpɔm na vevie?